ព័ត៌មានជាតិ

ទៅលេងជីផាត ចំណាយពេល ៣ យប់ ៤ ថ្ងៃ ទើបគ្រប់គ្រាន់ បានទៅដើរលេងគ្រប់កន្លែង

បានផុស

៣ years មុន

នៅ

ថ្ងៃសុក្រ ១៤ កក្កដា ២០២៣

ដោយ

បើអ្នកទេសចរចង់ធ្វើដំណើរកម្សាន្តទៅតំបន់អេកូទេសចរណ៍សហគមន៍ជីផាតនៅតំបន់ជួរភ្នំក្រវាញ ត្រូវចំណាយពេលយ៉ាងហោចណាស់ ៣ យប់ ៤ ថ្ងៃ។ នេះបើតាមការឲ្យដឹងរបស់លោក អន សុវណ្ណ ប្រធានសហគមន៍អេកូទេសចរណ៍ជីផាតនៅស្រុកថ្មបាំង ខេត្តកោះកុង។

នៅតំបន់អេកូទេសចរណ៍ជីផាតមានភាពទាក់ទាញ ហើយមានកន្លែងកម្សាន្តប្លែកគ្នាច្រើន ហើយអ្នកទេសចរត្រូវចំណាយពេលយ៉ាងហោចណាស់ ៣ យប់ ៤ ថ្ងៃ ទើបបានដើរសព្វគ្រប់កន្លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អន សុវណ្ណ ប្រធានសហគមន៍សហគមន៍អេកូទេសចរណ៍ជីផាតបានឲ្យដឹងថា នៅជីផាតមានតំបន់ទេសចរណ៍ផ្សេងៗគ្នាតាមឆ្ងាយតាមជិត ក្នុងនោះមានតំបន់ទឹកធ្លាក់ ៣ កន្លែង មានទឹកធ្លាក់ឆាយខ្ពស់ ទឹកធ្លាក់អូរម្លូ និងទឹកធ្លាក់អូរទឹកវេទ។ ក្រៅពីនេះអ្នកទេសចរអាចជិះទូកមើលសត្វព្រៃ សត្វស្លាប ជីវៈចម្រុះតាមស្ទឹងព្រាត់ ទស្សនាការចាក់បង្កង មើលថ្ងៃលិចជាដើម។ សហគមន៍ក៏បានរៀបចំកន្លែងដែលភ្ញៀវទេសចរមានឱកាសអាចមើលសត្វព្រៃដោយផ្ទាល់។

ជាមួយគ្នានេះ អ្នកទេសចរក៏អាចទៅទស្សនាមឈូសបុរាណអាយុកាល ៥០០ ឆ្នាំ ជាទីតាំងទាក់ទាញជាពិសេសភ្ញៀវទេសចរបរទេស។

បើតាមប្រធានសហគមន៍ ការស្នាក់នៅកម្សាន្តនៅជីផាតការចំណាយពេល ៣ យប់ ៤ ថ្ងៃគឺសមស្រប។ តែយ៉ាងណាមិញ លោកកត់សម្គាល់ថាភ្ញៀវខ្មែរភាគច្រើនមកលេងមួយថ្ងៃពីរថ្ងៃត្រឡប់ទៅវិញហើយ។

សម្រាប់ការមកលេងនៅជីផាត លោកប្រធានសហគមន៍ណែនាំឲ្យអ្នកទេសចរអាចមកចាប់ពីចុងខែតុលាដល់ខែឧសភា។ បើនៅចន្លោះខែកក្កដា ដល់ខែ កញ្ញា ចំខែវស្សាអាចពិបាកដោយសារមានភ្លៀងធ្លាក់ច្រើនពិបាកផ្លូវធ្វើដំណើរ។

ការមកជីផាត ភ្ញៀវទេសចរអាចធ្វើដំណើរពីភ្នំពេញចម្ងាយជាង ២០០ គីឡូម៉ែត្រ តាមផ្លូវជាតិលេខ ៤ និងតាមផ្លូវជាតិលេខ ៤៨ ដល់បង្គោលគីឡូម៉ែត្រលេខ ៤៧ បត់តាមផ្លូវលំជាង ២០ គីឡូម៉ែត្រ ឬអាចជ្រើសរើសមធ្យោបាយដោយទូកចំណាយពេលពី ២ ម៉ោងទៅ ២ ម៉ោង កន្លះចេញពីគល់ស្ពានអណ្ដូងទឹកនឹងមកដល់សហគមន៍ជីផាត៕