ព័ត៌មានជាតិ

លោកអភិបាលរងខេត្តកោះកុង បន្តអរគុណពលរដ្ឋឃុំជ្រោយស្វាយដែលបោះឆ្នោតជូនគណបក្សប្រជាជនកម្ពុជាឈ្នះលើសលប់

បានផុស

៣ years មុន

នៅ

ថ្ងៃសៅរ៍ ២៩ កក្កដា ២០២៣

ដោយ

កោះកុង ៖ លោក ហាក់ ឡេង អភិបាលរងខេត្តកោះកុង បន្តថ្លែងអំណរអរគុណយ៉ាងជ្រាលជ្រៅជូនចំពោះយាយតា ប្រជាពលរដ្ឋ និងយុវជននៅឃុំជ្រោយស្វាយ ស្រុកស្រែអំបិល ដែលស្រឡាញ់គាំទ្រ និងជឿជាក់មកលើគណបក្សប្រជាជនកម្ពុជាឈ្នះលើសលុប កន្លងទៅនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសអរគុណរបស់លោកអភិបាលរងខេត្តកោះកុងនៅពេលនេះ ធ្វើឡើងដែលលោក និងភរិយាតំណាងលោកស្រីមិថុនា ភូថង អភិបាលខេត្ត អញ្ជើញប្រគេនទៀនវស្សា និងទ័យវត្ថុទៅប្រគេនព្រះសង្ឃគង់នៅវត្តមុនីជលទ្ធារាម ហៅវត្តជ្រោយស្វាយ កាលពីព្រឹកថ្ងៃទី២៩ ខែកក្កដា ឆ្នាំ២០២៣។

លោក ហាក់ ឡេង បានពាំនាំការសួរសុខទុក្ខពីសម្តេចតេជោ ហ៊ុន សែន នាយករដ្ឋមន្ត្រី ឯកឧត្តមបណ្ឌិត ហ៊ុនម៉ាណែត បេក្ខជននាយករដ្ឋមន្ត្រីថ្មី និងលោកស្រីអភិបាលខេត្តចំពោះប្រជាពលរដ្ឋគ្រប់រូបរស់នៅក្នុងឃុំជ្រោយស្វាយ។ បើតាមលោកអភិបាលរងខេត្ត ការគាំទ្រគណបក្សប្រជាជនកម្ពុជារបស់ប្រជាពលរដ្ឋពិតជាត្រឹមត្រូវតាមកាលៈទេសៈ ពីព្រោះប្រទេសកម្ពុជាយើងឆ្លងកាត់សង្គ្រាមរាប់រយឆ្នាំមកហើយ។

ក្នុងសម័យតេជោ ហ៊ុន សែន ជានាយករដ្ឋមន្ត្រី សម្តេចបានលះបង់គ្រប់បែបយ៉ាងដើម្បីស្វែងរកសន្តិភាព និងការអភិវឌ្ឍន៍ប្រទេសជាតិ ជូនប្រជាពលរដ្ឋហើយធ្វើមានកេរ្តិ៍ឈ្មោះល្បីល្បាយពេញនៅលើឆាកអន្តរជាតិបន្ថែមទៀតផង។ ដើម្បីសន្តិភាព ស្ថេរភាពនយោបាយឈ្នះឈ្នះ សម្តេចបានជ្រើសតាំងលោកបណ្ឌិត ហ៊ុន ម៉ាណែត ដើម្បីបន្តដឹកនាំប្រទេសរក្សាសន្តិភាពជូនប្រជាពលរដ្ឋ និងប្រទេសជាតិ។

ឆ្លៀតឱកាសនោះ លោក ហាក់ ឡេង ក៏បានផ្សព្វផ្សាយជូនលោកយាយលោកតា មីងមា ពុទ្ធបរិស័ទ ជាពិសេសដែលមានកូនមានចៅ ចង់បន្តសិក្សានៅមហាវិទ្យាល័យ សកលវិទ្យាល័យ ហើយខ្វះលទ្ធភាពបង់ថ្លៃសាលា គឺអាចទាក់ទងមករូបលោកផ្ទាល់ ដែលជាប្រធានក្រុមការងារ អមត ខេត្ត។

ការផ្តល់ព័ត៌មានអំពីការសិក្សាអាហារូបករណ៍ឥតគិតថ្លៃ ដោយមើលឃើញពីភាពខ្វះខាតចំពោះគ្រួសារងាយរងគ្រោះដែលមិនអាចឱ្យកូនបន្តការសិក្សានៅថ្នាក់មហាវិទ្យាល័យ បន្ទាប់ពីចប់បាក់ឌុប ទើបឯកឧត្តមបណ្ឌិតហ៊ុន ម៉ាណែត បានបង្កើតសមាគមសិស្ស-និស្សិតក្រីក្រនៅទូទាំងប្រទេស សម្រាប់និស្សិតក្រីក្របន្តការសិក្សា សម្រាប់អាណត្តិទី៧ អាជ្ញាធរខេត្តកោះកុង ក៏ជឿជាក់ថា រាជរដ្ឋាភិបាល នឹងបង្កើនការអភិវឌ្ឍន៍ហេដ្ឋារចនាសម្ព័ន្ធក្នុងឃុំជ្រោយស្វាយ ជាពិសេសផ្លូវថ្នាលចូលឃុំជ្រោយស្វាយកំពុងតែកសាង និងបញ្ចប់នៅពេលឆាប់ៗខាងមុខ។ ក្រោយពីផ្លូវកសាងរួច គឺមានប្រជាពលរដ្ឋ ភ្ញៀវទេសចរណ៍នឹងមកកម្សាន្តនៅឃុំនេះកាន់តែច្រើនបន្ថែមទៀត ហើយបងប្អូនអាចលក់ដូរផលនេសាទកាន់តែបានច្រើន៕

អត្ថបទ ៖ សិរីវឌ្ឍនៈ

Related Topics:ខេត្តកោះកុង