ក្បាលម៉ាស៊ីនរដ្ឋសភា និងគណៈរដ្ឋមន្ត្រីថ្មី នឹងត្រូវបោះឆ្នោតជ្រើសតាំង នៅថ្ងៃទី២២ ខែសីហា

រដ្ឋសភា នីតិកាលទី៧ នឹងបន្តសម័យប្រជុំលើកទី១ ដើម្បីបោះឆ្នោតជ្រើសរើសក្បាលម៉ាស៊ីនរដ្ឋសភា និងបោះឆ្នោតផ្ដល់សេចក្ដីទុកចិត្តដល់រាជរដ្ឋាភិបាលថ្មី នៅថ្ងៃទី២២ ខែសីហា ឆ្នាំ២០២៣។ សម័យប្រជុំលើកទី១របស់រដ្ឋសភា ធ្វើឡើងក្រោយព្រះមហាក្សត្រនៃកម្ពុជា បានយាងជាព្រះរាជអធិបតីភាពបើកសម័យប្រជុំលើកដំបូង នៅព្រឹកថ្ងៃចន្ទនេះ។

បន្ទាប់ពីព្រះមហាក្សត្រ បានថ្លែងព្រះរាជសុន្ទរកថាបើកសម័យប្រជុំលើកដំបូងរដ្ឋសភារួចមក នៅព្រឹកថ្ងៃចន្ទដដែលនេះ សម្ដេចពញាចក្រី ហេង សំរិន ក្នុងនាមជាសមាជិករដ្ឋសភាមានវ័យច្រើនជាងគេ (ព្រឹទ្ធសមាជិករដ្ឋសភា) បានចាប់ផ្ដើមដឹកនាំសម័យប្រជុំលើកទី១ លើរបៀបវីរៈចំនួន២។ ក្នុងនោះ របៀបវីរៈទី១ គឺការប្រកាសអំពីសុពលភាពនៃអាណត្តិរបស់សមាជិកនីមួយៗ ដែលសរុបចំនួន១២៥រូប មកពីគណបក្សប្រជាជនកម្ពុជាចំនួន១២០រូប និងមកពីគណបក្សហ្វ៊ុនស៊ិនប៉ិចចំនួន៥រូប ខណៈរបៀបវីរៈទី២ គឺការអនុម័តយល់ព្រមទៅលើបទបញ្ជាផ្ទៃក្នុងនៃរដ្ឋសភា សម្រាប់នីតិកាលទី៧នេះ។

ដោយឡែក នៅថ្ងៃទី២២ ខែសីហា ឆ្នាំ២០២៣ រដ្ឋសភា នឹងបន្តសម័យប្រជុំលើកទី១ របស់ខ្លួន ដើម្បីបោះឆ្នោតជ្រើសតាំងសមាសភាពក្បាលម៉ាស៊ីនដឹកនាំរបស់រដ្ឋសភា រួមមាន បោះឆ្នោតជ្រើសតាំងប្រធាន និងអនុប្រធានរដ្ឋសភា រួមទាំងសមាសភាពគណៈកម្មការជំនាញទាំង១០ នៃរដ្ឋសភា។ បើតាមការបង្ហើបឱ្យដឹងដោយសម្តេចតេជោ ហ៊ុន សែន នាពេលកន្លងមក គឺតំណែងប្រធានរដ្ឋសភា នឹងប្រគល់ឱ្យលោកស្រី ឃួន សុដារី តំណែងជាអនុប្រធានទី១ គឺលោក ជាម យៀប និងលោក វង សូត ជាអនុប្រធានទី២ រដ្ឋសភា។

ទន្ទឹមនេះ សម័យប្រជុំរដ្ឋសភា ក៏នឹងបោះឆ្នោតផ្ដល់សេចក្ដីទុកចិត្តដល់សមាសភាពរាជរដ្ឋាភិបាលថ្មី ដឹកនាំដោយឯកឧត្តមបណ្ឌិត ហ៊ុន ម៉ាណែត ផងដែរ។ ការបោះឆ្នោតគាំទ្រឯកឧត្តមបណ្ឌិត ហ៊ុន ម៉ាណែត ធ្វើជានាយករដ្ឋមន្ត្រីកម្ពុជា នាអាណត្តិនេះ គឺបន្ទាប់ពីសម្ដេចតេជោ ហ៊ុន សែន បានប្រកាសមិនបន្តធ្វើជានាយករដ្ឋមន្ត្រី ដោយទុកឱកាសឱ្យអ្នកបន្តវេនជំនាន់ក្រោយមកដឹកនាំបន្ត។

សម្ដេចតេជោ ហ៊ុន សែន ធ្លាប់លើកឡើងថា នេះ គឺជាការផ្លាស់ប្តូរជាប្រវត្តិសាស្ត្រក្នុងរបត់នយោបាយរបស់កម្ពុជា ដោយសម្ដេចជាអ្នកដែលបានលះបង់ធំជាងគេ ដើម្បីធានាថានេះ ជាការផ្លាស់ប្ដូរដោយសន្តិវិធី ពិសេស ធានាដល់សន្តិភាព ស្ថិរភាព និងការអភិវឌ្ឍរបស់កម្ពុជាសម្រាប់រយៈកាលយូរអង្វែងតទៅមុខទៀត៕

ដោយ៖ ធឿន វ៉ាន់សុង