ហុងស៊ុយដាំផ្កា និងដើមរុក្ខជាតិ បង្កើនសំណាង បណ្ដេញធាតុអាក្រក់ចេញពីផ្ទះ

ជាធម្មតា ការបង្កើតសួនដាំផ្កា និងរុក្ខជាតិបៃតងនានា មិនថាតូចឬធំ សុទ្ធតែជួយលម្អលំនៅដ្ឋាន ថែមទាំអផ្ដល់នូវអារម្មណ៍ស្រស់ស្រាយដល់ម្ចាស់ផ្ទះទៀតផង។ ដាំរុក្ខជាតិនៅផ្ទះផ្ដល់ប្រយោជន៍ជាច្រើនទាំងម្លប់ លម្អ និងជំនួយសុខភាព។ ប៉ុន្តែអ្នកមានជំនឿលើហុងស៊ុយ ការដាំផ្កា ឬរុក្ខជាតិតូចធំផ្សេងៗ ត្រូវគិតដល់ថាមលល្អនិងមិនល្អ ដើម្បីទាក់ទាញលាភសំណាង និងបណ្ដេញអពមង្គលចេញលំនៅដ្ឋានរបស់ពួកគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្កា ឬរុក្ខជាតិមុតស្រួច

បើគិតតាមជំនឿហុងស៊ុយ ទាំងដើមផ្កា និងដើមរុក្ខជាតិលម្អស្លឹកនានា មិនគួរជ្រើសរើស ប្រភេទមានបន្លាមុតស្រួចនោះទេ ព្រោះគេជឿថា វាអាចបង្កជាអំពើហិង្សាក្នុងសមាជិកគ្រួសារ ព្រមទាំងទាក់ទាញមនុស្សឱ្យបង្កបញ្ហាផងដែរ។ មិនតែប៉ុណ្ណោះគេជឿថា រុក្ខជាតិស្លឹកបន្លា អាចនាំឱ្យកើតជម្លោះជាមួយអ្នក​ភូមិ ឬ​បង្ក​ចលាចល​ក្នុងភូមិទៀតផង។

ផ្កា ឬរុក្ខជាតិស្លឹកក្រហម

បើដាំផ្កាពណ៌ក្រហម ឬរុក្ខជាតិស្លឹកក្រហមនឹងនាំឱ្យថាមពលភ្លើង ​សក្តិសម​សម្រាប់ដាំនៅទិស​ទិស​ខាងត្បូង ព្រោះវាជួយ​លើក​ហុងស៊ុយ​កូនស្រី​​ឱ្យ​លេចធ្លោនៅក្នុងសង្គម។ ផ្ទុយទៅវិញបើដាំនៅទិសខាងលិច នឹងនាំឱ្យកូនប្រុសជួប​សំណាង​អាក្រក់។

ចម្ងាយនៃការដាំផ្កា ឬរុក្ខជាតិ

ចំពោះដើមឈើធំៗ ត្រូវដាំនៅចម្ងាយយ៉ាងតិច ៥ម៉ែត្រពីផ្ទះ ក្រៅពីការពារកុំឱ្យឫសដើមឈើបង្ខូចសសរផ្ទះឬកម្រាលឥដ្ឋ គេជឿថា វានឹងឱ្យប៉ះពាល់ដល់ឆ្អឹងមនុស្ស ​ព្រមទាំង​កាត់​បន្ថយ​សំណាងល្អថែមទៀត។

ទិសនៃការដាំផ្កា ឬរុក្ខជាតិ

នៅទិស​ខាង​កើត គួរដាំរុក្ខជាតិពណ៌បៃតងសុទ្ធ ព្រោះតាមជំនឿ វាជាទិសដែលនាំឱ្យមានភាពចុះសម្រុងក្នុងគ្រួសារ បើទោះបីជារុក្ខជាតិទាំងនោះមិនមានផ្កាក៏ពុំថ្វីដែរ។

ដើម្បីទាក់ទាញមនុស្សជុំវិញឱ្យជួយជ្រោមជ្រែង នៅទិសខាងត្បូង គួរដាំតែរុក្ខជាតិដែលមានពណ៌ស្រស់ឆើតឆាយមិនថា បៃតង ក្រហម និងផ្កាឈូកជាដើម។

ចំណែកនៅទិសខាងលិច គួរដាំដាំ​ដើម​ឈើ​ធំៗដែលអាចផ្ដល់​ម្លប់ ​និងដើមផ្កាដែលមានពណ៌លឿង ឬពណ៌ស ព្រោះគេជឿថា វាជួយកាត់សំណាងអាក្រក់ និងផ្ដល់ឱ្យចិត្តត្រជាក់ស្ងប់៕

អត្តបទ៖​ សន្យា

ចុចអាន៖ ៤ ចំណុច បង្កើនហុងស៊ុយបន្ទប់គេង ទាក់ទាញសំណាង និងថាមពលវិជ្ជមាន

ចុចអាន៖ ​រុក្ខជាតិ ៣ប្រភេទ តាមជំនឿហុងស៊ុយ មិនគួរដាំក្បែរផ្ទះ ព្រោះអាចនាំចង្រៃ

ចុចអាន៖ ដើមឈើជុំវិញផ្ទះមិនចេះតែដាំទេ! ទាល់តែត្រូវទិស ទើបអាចនាំសំណាងល្អ