Paul Pogba ត្រូវផ្អាកជាបណ្តោះអាសន្នក្រោយពាក់ព័ន្ធសារធាតុហាមឃាត់

ខ្សែបម្រើ Paul Pogba របស់ក្លិប Juventus ត្រូវបានផ្អាកពីសកម្មភាព​បាល់ទាត់​ជាបណ្ដោះអាសន្ន បន្ទាប់​ពី​រក​ឃើញ​ជាប់​ពាក់ព័ន្ធ​នឹង​សារធាតុហាមឃាត់។

តុលាការជាតិប្រឆាំងសារធាតុហាមឃាត់ (Nado) របស់ប្រទេសអ៉ីតាលី បាននិយាយថា ការ​ធ្វើ​តេស្ត​ Pogba រក​ឃើញ​សារធាតុ​ហាម​ឃាត់​កម្រិតអ័រម៉ូន Testosterone បន្ទាប់ពី Juventus បាន​ឈ្នះ ៣-០ លើក្លិប Udinese កាលពីថ្ងៃទី ២០ ខែសីហា។

Pogba អាយុ​៣០ឆ្នាំ​ជាកីឡាករបម្រុងដែលមិនបានដាក់ឲ្យលេងទេ ប៉ុន្តែត្រូវបានជ្រើសរើសដោយចៃដន្យសម្រាប់ការធ្វើតេស្តសារធាតុហាមឃាត់ក្រោយការប្រកួត។ ប្រសិនបើរកឃើញថា មានពិរុទ្ធ​ពាក់​ព័ន្ធ​នឹង​សាធារធាតុ​ហាមឃាត់​មែន​នោះ​ រូបគេអាចប្រឈម​នឹង​ជាប់​ពិន័យ​ពី​បាល់ទាត់ ២ ទៅ ៤ ឆ្នាំ។

Juventus បាននិយាយ​ក្នុងសេចក្តីថ្លែងការណ៍មួយថា ៖«ក្លិប Juventus សូមប្រកាសថា ថ្ងៃនេះទី១១ ខែកញ្ញា ឆ្នាំ ២០២៣ កីឡាករ Paul Labile Pogba បានទទួលដីកាព្យួរជាបណ្តោះអាសន្នពីតុលាការជាតិប្រឆាំងសារធាតុហាមឃាត់ បន្ទាប់ពីលទ្ធផលនៃការធ្វើតេស្តដែលបានធ្វើ​កាល​ពី​ថ្ងៃទី២០ ខែសីហា ឆ្នាំ២០២៣។ ក្លិបរក្សាសិទ្ធិក្នុងការពិចារណាលើ​នីតិវិធីបន្ទាប់»៕

ប្រែសម្រួល៖ ផា រតនា
ប្រភព៖ BBC