លោក ប៊ុន ហុន ប្រាប់បក្សភ្លើងទៀនថា ក្រសួងមហាផ្ទៃមិនអាចចេញលិខិតច្បាប់ដើមបានទេ ព្រោះគ្មានច្បាប់អនុញ្ញាត

លោក ប៊ុន ហុន តំណាងក្រសួងមហាផ្ទៃ និងជាប្រធានអង្គប្រជុំរវាងក្រសួងមហាផ្ទៃជាមួយគណបក្សភ្លើងទៀន បានប្រាប់ភាគីគណបក្សភ្លើងទៀនថា ក្រសួងមហាផ្ទៃមិនអាចចេញលិខិតបញ្ជាក់ច្បាប់ដើមជូនបានឡើយ ព្រោះគ្មានច្បាប់អនុញ្ញាត។ លោក ប៊ុន ហុន​ បានបញ្ជាក់ប្រាប់បែបនេះ នៅក្នុងជំនួបជាមួយភាគីបក្សភ្លើងទៀន នៅព្រឹកថ្ងៃទី២១ ខែកញ្ញានេះ​ នៅក្នុងសាលប្រជុំខេត្តស្ទឹងត្រែង នៃអគារទីស្ដីការក្រសួងមហាផ្ទៃ។

បើតាមកំណត់ហេតុកម្រាស់បីទំព័រ ស្ដីពីកិច្ចប្រជុំពិភាក្សារវាងតំណាងក្រសួងមហាផ្ទៃ និងគណបក្សភ្លើងទៀន នៅក្នុងទំព័រទីពីរ ចំណុចទី៣ បានសរសេរថា លោក ប៊ុន ហុន ដែលជាប្រធានអង្គប្រជុំបានប្រាប់ភាគីបក្សភ្លើងទៀនថា៖ “ច្បាប់ស្តីពីគណបក្សនយោបាយ ច្បាប់ស្តីពីការបោះឆ្នោត ច្បាប់ និងលិខិតបទដ្ឋានគតិយុត្តពាក់ព័ន្ធ មិនមានបទប្បញ្ញត្តិចែងកំណត់ឱ្យក្រសួងមហាផ្ទៃចេញជូនឯកសារចុះបញ្ជីច្បាប់ដើមជាថ្មី  ឬឯកសារច្បាប់ទុតិយតា នៃប្រកាសស្តីពីការចុះបញ្ជីគណបក្សនយោបាយ ជូនគណបក្សនយោបាយដែលបាត់ ឬខូចខាតនោះឡើយ”។

ជាមួយគ្នានេះ លោក ប៊ុន ហុន បានប្រាប់បក្សភ្លើងទៀនថា ក្រសួងមហាផ្ទៃមានសមត្ថកិច្ចក្នុងការអនុញ្ញាតឱ្យបង្កើត និងចុះបញ្ជីគណបក្សនយោបាយ ស្របតាមច្បាប់ស្តីពីគណបក្សនយោបាយ។ ចំពោះការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះសម្រាប់ការបោះឆ្នោត គឺស្ថិតក្នុងដែនសមត្ថកិច្ចរបស់គណៈកម្មាធិការជាតិរៀបចំការបោះឆ្នោត។ ដូច្នេះ ក្រសួងមហាផ្ទៃមិនអាចជ្រៀតជ្រែកកិច្ចការរបស់ស្ថាប័ន គ.ជ.ប បានឡើយ។

បើតាមកំណត់ហេតុដដែល លោក ប៊ុន​ ហុន បានបន្តប្រាប់ភាគីបក្សភ្លើងទៀនថា៖ “ទោះបីគណបក្សភ្លើងទៀនមិនបានបំពេញតាមស្មារតីកំណត់ហេតុចុះថ្ងៃទី២៤ ខែមេសា ឆ្នាំ២០២៣ ក៏ដោយ ក្រសួងមហាផ្ទៃក៏បានសម្របសម្រួលទទួលជួបលើកទីពីរ កាលពីថ្ងៃទី៥ ខែឧសភា ឆ្នាំ២០២៣ ព្រមទាំងបានចេញលិខិតបញ្ជាក់លេខ០៤៣ប ចុះថ្ងៃទី៥ ខែឧសភា ឆ្នាំ២០២៣ តាមសំណូមពររបស់គណបក្សភ្លើងទៀនផងដែរ”។

បន្ថែមពីនេះ ក្នុងកំណត់ហេតុនោះ ក៏បានសរសេរថា តំណាងគណបក្សភ្លើងទៀន បានទទូចស្នើសុំក្រសួងមហាផ្ទៃចំនួនបីចំណុចដូចជា៖ ១/ស្នើសុំចេញនូវលិខិតបញ្ជាក់ម្ដងទៀត ដោយយោងប្រកាសលេខ១៩៣ប្រក ចុះថ្ងៃទី២៣ ខែមីនា ឆ្នាំ១៩៩៨ របស់ក្រសួងមហាផ្ទៃ ស្តីពីការចុះបញ្ជីគណបក្សនយោបាយ។ ២/ស្នើសុំធ្វើទុតិយតាលើប្រកាសលេខ១៩៣ប្រក ចុះថ្ងៃទី២៣ ខែមីនា ឆ្នាំ១៩៩៨ របស់ក្រសួងមហាផ្ទៃ ឬចេញនូវប្រកាសចុះបញ្ជីជូនគណបក្សភ្លើងទៀនម្ដងទៀត។ ៣/ស្នើសុំក្រសួងមហាផ្ទៃជួយអន្តរាគមន៍ណែនាំទៅរដ្ឋបាលរាជធានី ខេត្ត ដើម្បីធ្វើនីត្យានុកូលកម្មលើប្រកាសលេខ១៩៣ប្រក ចុះថ្ងៃទី២៣ ខែមីនា ឆ្នាំ១៩៩៨ របស់ក្រសួងមហាផ្ទៃ ច្បាប់ចម្លងជូនគណបក្សភ្លើងទៀន។

តំណាងក្រសួងមហាផ្ទៃ បានបញ្ជាក់ជូនតំណាងគណបក្សភ្លើងទៀនវិញថា៖ “ទោះបីបក្សភ្លើងទៀនស្នើឱ្យក្រសួងមហាផ្ទៃចេញលិខិតបញ្ជាក់ថ្មីទៀត ក៏ក្រសួងមហាផ្ទៃមិនអាចចេញលិខិតបញ្ជាក់ណាខុសពីលិខិតលេខ០៤៣ប ចុះថ្ងៃទី៥ ខែឧសភា ឆ្នាំ២០២៣ឡើយ។ ហើយចំពោះការស្នើសុំឱ្យក្រសួងធ្វើឯកសារ ទុតិយតាលើប្រកាសលេខ១៩៣ ប្រក ចុះថ្ងៃទី២៣ ខែមីនា ឆ្នាំ១៩៩៨ របស់ក្រសួងមហាផ្ទៃ ឬចេញប្រកាសចុះ បញ្ជីឡើងវិញជូនគណបក្សភ្លើងទៀននោះ ក្រសួងមិនអាចធ្វើបានទេ ដោយសារគ្មានបទប្បញ្ញត្តិនៃច្បាប់ណាអនុញ្ញាត”។

កំណត់ហេតុបានសរសេរបន្តថា ការស្នើឱ្យក្រសួងមហាផ្ទៃជួយអន្តរាគមន៍ណែនាំទៅរដ្ឋបាលរាជធានី ខេត្ត ដើម្បីធ្វើនីត្យានុកូលកម្មលើប្រកាសលេខ១៩៣ប្រក ចុះថ្ងៃទី២៣ ខែមីនា ឆ្នាំ១៩៩៨ របស់ក្រសួងមហាផ្ទៃ ច្បាប់ចម្លង ក៏ក្រសួងមហាផ្ទៃ មិនអាចធ្វើបានដែរ ព្រោះគ្មានបទប្បញ្ញត្តិ នៃច្បាប់អនុញ្ញាត។

បើតាមខ្លឹមសារនៃកំណត់ហេតុក្នុងទំព័រទីបីបានសរសេរថា៖ “ប៉ុន្តែទោះបីយ៉ាងណាក៏ដោយ ក្រុមការងារក្រសួងមហាផ្ទៃ នឹងធ្វើរបាយការណ៍អំពីសំណូមពរនេះ ដើម្បីគោរពរាយការណ៍ជូនលោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស្នើសុំគោលការណ៍ ដឹកនាំដ៏ខ្ពង់ខ្ពស់”៕

ដោយ៖ ង៉ិល ណារ៉ាត់