ព័ត៌មានអន្ដរជាតិ

លោក Netanyahu ៖ ការវាយលុករបស់ អ៊ីស្រាអែល លើក្រុមហាម៉ាស់ ទើបចាប់ផ្ដើមប៉ុណ្ណោះ ហើយពួកគេនឹងចាំតជំនាន់

បានផុស

៣ years មុន

នៅ

ថ្ងៃអង្គារ ១០ តុលា ២០២៣

ដោយ

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយនៅក្នុងសុន្ទរកថាតាមទូរទស្សន៍ជាតិកាលពីថ្ងៃចន្ទថា ការវាយលុកប្រឆាំងនឹងក្រុមសកម្មប្រយុទ្ធហាម៉ាស់ គឺទើបតែចាប់ផ្តើមប៉ុណ្ណោះ ហើយអ្វីដែលយើងធ្វើចំពោះសត្រូវរបស់យើងនៅប៉ុន្មានថ្ងៃខាងមុខនេះ គឺនឹងឲ្យពួកគេចងចាំ និងភ័យខ្លាចតជំនាន់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ លោក Netanyahu ក៏បានបង្ហោះវីដេអូនៅលើបណ្ដាញ X របស់គាត់ផងដែរ ដោយបញ្ជាក់ម្តងហើយម្ដងទៀតថា “អ៊ីស្រាអែលទើបតែចាប់ផ្តើមវាយប្រហារលើក្រុមហាម៉ាស់ប៉ុណ្ណោះ ។ យើងបានកម្ចាត់ភេរវកររាប់រយនាក់ ហើយយើងក៏នឹងមិនឈប់ត្រឹមប៉ុណ្ណឹងនោះដែរ” ។

លោកនាយករដ្ឋមន្ត្រីបានលើកឡើងទៀតថា ជាក់ស្ដែងអ៊ីស្រាអែលបានបើកការវាយប្រហារសងសឹកដោយកាំជ្រួចមីស៊ីល ក៏ដូចជាទម្លាក់គ្រាប់បែកលើគោលដៅតំបន់ហ្គាហ្សាស្ទ្រីបរបស់ក្រុមហាម៉ាស់ ស្របពេលដែលកងកម្លាំងអ៊ីស្រាអែលក៏កំពុងកែនទ័ពបម្រុងប្រមាណ ៣០ ម៉ឺននាក់សម្រាប់ការលុកលុយតាមដីគោកផងដែរ ។

ក្រុមសកម្មប្រយុទ្ធប៉ាឡេស្ទីនហាម៉ាស់ដែលបានកាន់កាប់តំបន់ហ្គាហ្សាក្នុងឆ្នាំ ២០០៧ បានបើកការវាយប្រហារដ៏គួរឲ្យភ្ញាក់ផ្អើលមួយនៅតាមបណ្តោយព្រំដែនភាគខាងត្បូងនៃប្រទេសអ៊ីស្រាអែលកាលពីព្រឹមព្រលឹមថ្ងៃសៅរ៍ ខណៈក្រុមសកម្មប្រយុទ្ធបានរុលចូលព្រំដែនអ៊ីស្រាអែលដោយប្រើឆ័ត្រយោង ម៉ូតូ និងទូកជាដើម ។

គួរបញ្ជាក់ថា ការវាយប្រហារមិនធ្លាប់មានរបស់ក្រុមហាម៉ាស់បណ្ដាលឲ្យជនជាតិអ៊ីស្រាអែលជាង ៩០០ នាក់ស្លាប់ ខណៈខាងប៉ាឡេស្ទីនវិញមានពលរដ្ឋ ៦៨០ នាក់ត្រូវបានសម្លាប់ បន្ទាប់ពីការវាយប្រហារតាមអាកាសរបស់អ៊ីស្រាអែល ហើយភាគីទាំងសងខាងសុទ្ធតែមានអ្នករងរបួសរាប់ពាន់នាក់ដូចគ្នា ៕