ព័ត៌មានអន្ដរជាតិ

លោក Netanyahu ព្រមានថា ការឆ្លើយតបរបស់អ៊ីស្រាអែល ចំពោះក្រុមហាម៉ាស់ នឹងផ្លាស់ប្តូរមជ្ឈិមបូព៌ា

បានផុស

៣ years មុន

នៅ

ថ្ងៃអង្គារ ១០ តុលា ២០២៣

ដោយ

នៅពេលនិយាយទៅកាន់អភិបាលក្រុងព្រំដែនភាគខាងត្បូង ដែលរងគ្រាប់រ៉ុកកែតកាលពីថ្ងៃសៅរ៍ទី៧ខែតុលា នាយករដ្ឋមន្រ្តីអ៊ីស្រាអែល លោក Benjamin Netanyahu បានប្រកាសថា ការឆ្លើយតបរបស់អ៊ីស្រាអែល ចំពោះការវាយប្រហារដ៏គួរឲ្យភ្ញាក់ផ្អើល របស់ក្រុមហាម៉ាស់ ពីតំបន់ហ្គាហ្សាស្ទ្រីប គឺនឹងផ្លាស់ប្តូរតំបន់មជ្ឈិមបូព៌ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Benjamin Netanyahu ក៏បានប្តេជ្ញាថានឹងកម្ទេចទីតាំងរបស់ក្រុម ហាម៉ាស់ ទាំងអស់ឲ្យទៅជាផេះ ហើយព្រមានជនស៊ីវិលនៅតំបន់ ហ្គាហ្សា ឲ្យចេញឆ្ងាយពីកន្លែងទាំងនោះផងដែរ។

ភាពតានតឹងនៅមជ្ឈិមបូព៌ា បានឡើងកម្តៅខ្លាំង នៅពេលអ៊ីរ៉ង់និងក្រុម Hezbollah សរសើរការវាយប្រហាររបស់ក្រុមហាម៉ាស់ បើទោះបីជាទីក្រុងតេហេរ៉ង់ បដិសេធតួនាទីណាមួយក៏ដោយ។ ទន្ទឹមនោះ សហរដ្ឋអាមេរិកបានសន្យាគាំទ្រអ៊ីស្រាអែល ហើយនិយាយថា ខ្លួននឹងបញ្ជូនជំនួយដល់អ៊ីស្រាអែល និងបង្វែរក្រុមនាវាផ្ទុកយន្តហោះ ទៅកាន់សមុទ្រមេឌីទែរ៉ាណេភាគខាងកើត។

រឿងនេះកើតឡើងខណៈមនុស្សជាង៩០០នាក់ ត្រូវបានសម្លាប់ក្នុងប្រទេសអ៊ីស្រាអែល ហើយក្រុមមន្ត្រីនិយាយថា ទីក្រុង Tel Aviv បានសងសឹកជាមួយនឹងការវាយប្រហារម្តងហើយម្តងទៀតលើតំបន់ហ្គាហ្សា ដែលបណ្តាលឲ្យមនុស្ស៥៦០នាក់ត្រូវបានសម្លាប់។

មួយថ្ងៃបន្ទាប់ពីការប្រកាសសង្រ្គាមជាផ្លូវការ យោធារបស់អ៊ីស្រាអែលបានធ្វើការដើម្បីកម្ទេចក្រុមសកម្មប្រយុទ្ធហាម៉ាស់នៅក្នុងទីក្រុងភាគខាងត្បូង និងបានបង្កើនការទម្លាក់គ្រាប់បែក ទៅលើតំបន់ហ្គាហ្សា។

ការប្រកាសសង្គ្រាមនេះ បានបើកភ្លើងខៀវឲ្យអ៊ីស្រាអែល ចាត់វិធានការយោធាដ៏សំខាន់ប្រឆាំងនឹងក្រុមហាម៉ាស់ បន្ទាប់ពីនោះ កងទ័ពបានហៅទាហានបម្រុងប្រមាណ ៣០ ម៉ឺននាក់ឲ្យចូលរួមផងដែរ ៕

ប្រែសម្រួល៖ Vann Vann

ប្រភព៖ Hindustan Times