“បុណ្យវប្បធម៌” នៅចុងខែតុលានេះ នឹងលើកតម្កើងអរិយធម៌ខ្មែរ ឱ្យទូលំទូលាយ

​“បុណ្យវប្បធម៌” នឹងមាន ពិព័រណ៍អំពីវប្បធម៌កម្ពុជា ប្រចាំឆ្នាំ២០២៣ ក្នុងគោលបំណង លើកតម្កើង​វប្បធម៌​ អរិយធម៌ខ្មែរ ឱ្យទូលំទូលាយ ផ្សព្វផ្សាយពីភាពអស្ចារ្យរបស់ខ្មែរទៅកាន់ពិភពលោក ពិសេសចង់ឱ្យអ្នកចូលរួម ​ទទួលបាននូវបទពិសោធន៍ទាក់ទងទៅនឹងវប្បធម៌ខ្មែរ។

ក្រុមការងាររៀបចំនូវកម្មវិធី “បុណ្យវប្បធម៌” ប៊ិន សុឌីណា បានឱ្យ កម្ពុជាថ្មី ដឹងថា “បុណ្យវប្បធម៌” នឹងប្រព្រឹត្តឡើង ពីម៉ោង ៩ព្រឹក ដល់ ៩យប់ នៅថ្ងៃសៅរ៍ អាទិត្យ ទី២៨ ២៩ ខែតុលា ឆ្នាំ២០២៣ ខាងមុខ នៅ Friend Future Factory (F3) វិថីព្រះអង្គអេង ផ្លូវលេខ១៣ ខាងជើង សារមន្ទីរជាតិ។

បុណ្យវប្បធម៌ នឹងនាំ សិស្សនិសិ្សត ភ្ញៀវជាតិ និងអន្តរជាតិ ឱ្យទទួលបាននូវបទពិសោធន៍ប្លែកៗ និងមានឱកាសសិក្សា ឈ្វេងយល់នូវសិល្បៈវប្បធម៌កម្ពុជាកាន់តែស៊ីជម្រៅ។ ក្នុងនោះរួមមាន៖ របាំក្បាច់បុរាណ របាំប្រពៃណី ល្ខោនបុរាណចម្រុះ គុនល្បុក្កតោ ការដើរបង្ហាញនូវសម្លៀកបំពាក់ ការតាំងបង្ហាញពីស្នាដៃសិល្បករ និងសិល្បការទីខ្មែរ ឧបករណ៍ភ្លេងបុរាណ និងការលេងល្បែងកម្សាន្តផ្សេងៗ មិនត្រឹមតែប៉ុណ្ណោះក៏មានការចូលរួមសម្ដែងពីសិល្បករសម័យផងដែរ។

លើសពីនេះទៅទៀត ព្រឹត្តិការណ៍បុណ្យវប្បធម៌ ក៏មាននូវការប្រគុំតន្ត្រីបែបសម័យសប្បាយៗ មានលក់ម្ហូបអាហារ, ភេសជ្ជៈ និងបង្អែមយ៉ាងសម្បូរបែប រួមទាំងមានការតាំងពិព័រណ៍ផលិតផលផ្សេងៗពីបណ្ដាលអជីវករកម្ពុជាផងដែរ។

​

“បុណ្យវប្បធម៌” គឺជាកម្មវិធីដែលរៀបចំឡើងដោយសភាយុវជន (Youth Assembly) និងទទួលបានការសហការគាំទ្រពី UYFC ស្វាយរៀង (ស.ស.យ.ក ស្វាយរៀង)៕