សិល្បករបុរាណត្រៀមរួចរាល់សម្រាប់បុណ្យវប្បធម៌នៅថ្ងៃស្អែក

សិល្បករបុរាណបានត្រៀមខ្លួនរួចជាស្រេចសម្រាប់បុណ្យវប្បធម៌នៅថ្ងៃទី ២៨ ខែតុលា ស្អែកនេះ។

យុវតី ស្ងួនកវី សេរីរត្ន័ ជាអ្នករៀបចំក្រុមការងារតាំងឧបករណ៍ពិណ និងតន្ត្រីបុរាណខ្មែរ និងការសម្តែងវង់ភ្លេងពិណពាទ្យបានធ្វើការហាត់សមចំនួន១ដងរួចមកហើយ ដោយបានបញ្ចូលជាមួយឧបករណ៌ចាប៉ីដងវែងផងដែរ។

កញ្ញាបានឱ្យដឹងថា ចំពោះការហាត់សមមានការលំបាកបន្តិច ដោយសារតែឧបករណ៍ចាប៉ីពិបាកក្នុងការបញ្ចូលគ្នារវាងវង់ពិណពាទ្យ ដោយឧបករណ៍ចាប៉ីមានសំឡេងខ្សោយ បូករួមទាំងលេង និងច្រៀងក្នុងពេលតែមួយផង។ ប៉ុន្តែមិនជាថ្វីទេ ការហាត់សមរបស់ក្រុមខ្លួនបានដំណើរការយ៉ាងរលូន។

អ្នកគ្រូ សំ សត្យា មកពីសកលវិទ្យាល័យ ភូមិន្ទវិចិត្រសិល្បៈ ព្រឹទ្ធបុរសរងផ្នែក​មហាវិទ្យាល័យ​សិល្បៈនីតិសាស្ត្រប្រាប់ថា អ្នកគ្រូបានជ្រើសរើសរបាំលក្សីបុទុម ដើម្បីចូលរួមនៅក្នុងកម្មវិធី មហោស្រពនេះ។

អ្នកគ្រូ សំ សត្យាបន្តថា៖ «ខ្ញុំជ្រើសរើសសំណួរទី៣ មកដល់ពេលនេះ ពួកយើងខ្ញុំកំពុងតែត្រៀម​លក្ខណៈដើម្បីហាត់នៅថ្ងៃទី២៧ ចាប់ពីម៉ោង៥ ទៅប្រហែលជាយើងត្រូវហាត់សមរហូតដល់ ម៉ោង៨ ឬ៩យប់ ដោយសារនិស្សិតមួយចំនួនគាត់រៀននៅសាលាមធ្យម អញ្ចឹងនៅសាលាមធ្យម​គាត់មានបេសសកកម្មមួយ គាត់ហាត់ដើម្បីថ្ងៃខួបទី៧០ ៩ វិច្ឆិកាហ្នឹង»។

​សូមជំរាបថា “បុណ្យវប្បធម៌” នឹងមាន ពិព័រណ៍អំពីវប្បធម៌កម្ពុជា ប្រចាំឆ្នាំ២០២៣ ក្នុងគោលបំណង លើកតម្កើង​វប្បធម៌​ អរិយធម៌ខ្មែរ ឱ្យទូលំទូលាយ ផ្សព្វផ្សាយពីភាពអស្ចារ្យរបស់ខ្មែរទៅ​កាន់ពិភព​លោក ពិសេសចង់ឱ្យអ្នកចូលរួម ​ទទួលបាននូវបទពិសោធន៍ទាក់ទងទៅនឹងវប្បធម៌ខ្មែរ។

“បុណ្យវប្បធម៌” នឹងប្រព្រឹត្តឡើង ពីម៉ោង ៩ព្រឹក ដល់ ៩យប់ នៅថ្ងៃសៅរ៍ អាទិត្យ ទី២៨ ២៩ ខែតុលា ឆ្នាំ២០២៣ ខាងមុខនៅ Friend Future Factory (F3) វិថីព្រះអង្គអេង ផ្លូវលេខ១៣ ខាងជើងសារមន្ទីរជាតិ៕