ធ្លាយវីដេអូ ប៉ូលិសបាញ់លើក្រុមបាតុករប្រឆាំងរដ្ឋប្រហារនៅមីយ៉ាន់ម៉ា

ការបាញ់ប្រហារជាច្រើនត្រូវបានគេរាយការណ៍នៅក្នុងទីក្រុង Myawaddy ដែលជាទីក្រុងមួយនៅរដ្ឋ Kayin ភាគអាគ្នេយ៍ប្រទេសមីយ៉ាន់ម៉ានៅថ្ងៃអាទិត្យនេះ ខណៈដែលប៉ូលិសកំពុងតែបំបែកក្រុមបាតុករ ។ រដ្ឋ Kayin មានទីតាំងស្ថិតនៅជិតព្រំដែនមីយ៉ាន់ម៉ា និងថៃ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រព័ន្ធផ្សព្វផ្សាយបាននិយាយថា “វីដេអូផ្សាយផ្ទាល់លើហ្វេសប៊ុកបានបង្ហាញពីរបៀបដែលមន្រ្តីប៉ូលិសឯកសណ្ឋានកាន់កាំភ្លើងកំពុងធ្វើដំណើរឆ្លងកាត់ហ្វូងបាតុករនៅទីក្រុង Myawaddy ហើយបន្ទាប់មកសម្លេងស្រដៀងទៅនឹងការបាញ់កាំភ្លើងត្រូវបានគេឮ ។

វីដេអូដែលចែកចាយនៅលើបណ្តាញសង្គមដែលត្រូវបានគេជឿថាមកពីប្រទេសមីយ៉ាន់ម៉ាបង្ហាញពីរលកនៃការបែកខ្ញែកគ្នារបស់ប្រជាជននៅលើដងផ្លូវដែលស្តាប់ទៅដូចជាស្នូរកាំភ្លើងត្រូវបានគេបាញ់ ។

ការវិវឌ្ឍន៍នេះបានកើតឡើងនៅពេលប្រជាជនរាប់ពាន់នាក់នៅក្នុងប្រទេសមីយ៉ាន់ម៉ាបានធ្វើដំណើរតាមផ្លូវនៅថ្ងៃអាទិត្យដើម្បីប្រឆាំងនឹងការធ្វើរដ្ឋប្រហារយោធាដែលបានកើតឡើងនៅក្នុងប្រទេសកាលពីដើមសប្តាហ៍នេះ ។

ការធ្វើបាតុកម្មនេះបានកើតឡើងចាប់តាំងពីថ្ងៃសៅរ៍ដោយក្រុមបាតុករអំពាវនាវឲ្យមានការដោះលែងមេដឹកនាំជាប់ឆ្នោតលោកស្រី អ៊ុងសាន ស៊ូជី ។

គួររម្លឹកសាជាថ្មីថា កាលពីថ្ងៃចន្ទយោធាបានចាប់ឃុំខ្លួនមេដឹកនាំជាប់ឆ្នោតរបស់ប្រទេសគឺលោកស្រី អ៊ុងសាន ស៊ូជី ប្រធានាធិបតី Win Myint និងអ្នកនយោបាយសំខាន់ៗដទៃទៀតក្នុងរដ្ឋប្រហារ ហើយបានប្រកាសដាក់ប្រទេសក្នុងស្ថានភាពអាសន្នរយៈពេលមួយឆ្នាំ បន្ទាប់ពីមានការចោទប្រកាន់ថាបានក្លែងបន្លំការបោះឆ្នោតកាលពីខែវិច្ឆិកា ឆ្នាំ ២០២០ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik