ព័ត៌មានអន្ដរជាតិ

សង្ឃថៃ២អង្គ ទាញកំភ្លើងបាញ់ប្រហារគ្នាផ្អើលវត្ត រួចរត់គេចខ្លួនបាត់ស្រមោលឈឹង

បានផុស

១១ ខែ មុន

នៅ

ថ្ងៃអង្គារ ៥ សីហា ២០២៥

ដោយ

ហេតុការណ៍ដ៏អាម៉ាស់មួយទៀតនៅក្នុងប្រទេសថៃ បន្ទាប់ពីជម្លោះរវាងព្រះសង្ឃជាន់ខ្ពស់២អង្គ គង់នៅស្រុក Chiang Khan និងព្រះសង្ឃវត្ត Phon Sawang មានទំនាស់ពាក្យសម្ដីជាមួយគ្នា ដល់ថ្នាក់ទាញកំភ្លើងបាញ់ប្រហារផ្អើលពុទ្ធបរិស័ទ្ធចំណុះជើងវត្តទាំងយប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយពី news1live តាមសាក្សីនៅកន្លែងកើតហេតុបានប្រាប់អ្នកយកព័ត៌មានថា នៅវេលាម៉ោងប្រមាណ ១១៖៣០នាទីយប់មិញ (ថ្ងៃទី៤ ខែសីហា) មន្ត្រីនគរបាលប៉ុស្តិ៍ឈៀងខាន់ បានទទួលសេចក្តីរាយការណ៍ថា មានករណីបាញ់ប្រហារនៅវត្ត Ban Nam Om ស្រុក Chiang Khan ខេត្ត Loei បណ្តាលឲ្យជនរងគ្រោះរងរបួសធ្ងន់។

នៅកន្លែងកើតហេតុ ព្រះសង្ឃមួយអង្គព្រះនាម Phra Mahayothin Khemiyo ព្រះជន្ម ៣៩ ព្រះវស្សា និងជាចៅអធិការវត្ត Paphatthanaram ស្រុកឈៀងខាន់ ត្រូវបានគេប្រទះឃើញ មានរបួសចំត្រចៀកខាងឆ្វេង និងរបួសធ្ងន់នៅរាងកាយ។ នៅកន្លែងកើតហេតុ ព្រះចៅអធិការដែលជាជនសង្ស័យនៃការបាញ់ប្រហារលើសង្ឃគ្នាឯងនេះ ក៏មានវត្តមាននៅទីនោះដែរ។

សាក្សីដដែលបានរៀបរាប់ទៀតថា ព្រះចៅអធិការវត្ត Phon Sawang គឺជាអ្នកដែលបាញ់ប្រហារលើចៅអធិការវត្ត Paphatthanaram ពីខាងក្រោយ ដោយកាំភ្លើងមិនស្គាល់អត្តសញ្ញាណ។ ក្រោយពេលបាញ់រួច ជនសង្ស័យជាសង្ឃ បានជិះរថយន្តម៉ាក Mazda 2 ពណ៌ខ្មៅ រត់គេចបាត់ស្រមោលសូន្យឈឹង។

យ៉ាងណាក៏ដោយ មុនពេលកើតហេតុ គេបានឮសំឡេងព្រះចៅអធិការទាំង២អង្គឈ្លោះប្រកែកគ្នាយ៉ាងខ្លាំង ។ ក្រោយមកក៏ឮស្នូរកាំភ្លើងមួយគ្រាប់រួចមក ព្រះសង្ឃដែលមានព្រះនាមថា Phra Athikan Manop Thanawiro ជាព្រះចៅអធិការវត្ត Phon Sawang ត្រូវគេឃើញចាកចេញពីកុដិ ហើយបើករថយន្តចេញពីវត្តយ៉ាងលឿន។

មកដល់ពេលនេះ ប៉ូលិសខេត្តឈៀងខាន់ បានដាក់ពង្រាយកម្លាំងដើម្បីចាប់ខ្លួនខ្មាន់កាំភ្លើង ហើយនាំសង្ឃទៅសាកសួរ ដើម្បីកំណត់ពីមូលហេតុនៅពីក្រោយការឈ្លោះប្រកែកគ្នា រវាងព្រះសង្ឃទាំងពីរអង្គ ដែលឈានទៅដល់ការបាញ់ប្រហារឡើងមក៕