ត្រឹម ២៤ម៉ោង អ៊ីស្រាអែលវាយប្រហារគោលដៅក្រុមហាម៉ាស់ចំនួន ៤៥០កន្លែង

យោធាអ៊ីស្រាអែលនិយាយនៅថ្ងៃចន្ទថា យន្តហោះចម្បាំងអ៊ីស្រាអែលបានវាយប្រហារគោលដៅក្រុមហាម៉ាស់ចំនួន ៤៥០កន្លែងនៅក្នុងតំបន់ហ្គាហ្សា ហើយកងទ័ពបានរឹបអូសយកបរិវេណក្រុមសកម្មប្រយុទ្ធក្នុងរយៈពេល ២៤ ម៉ោងចុងក្រោយនេះ។

អ្នកកាសែតរ៉យទ័រម្នាក់នៅតំបន់ហ្គាហ្សាស្ទ្រីបបានពណ៌នាការទម្លាក់គ្រាប់បែកពេញមួយយប់ពីលើអាកាស ដី និងសមុទ្រថា ជាការវាយប្រហារដ៏ខ្លាំងក្លាបំផុតមួយចាប់តាំងពីអ៊ីស្រាអែលបានបើកការវាយលុករបស់ខ្លួនក្នុងការឆ្លើយតបទៅនឹងការវាយប្រហារដ៏គួរឱ្យភ្ញាក់ផ្អើលដោយក្រុមហាម៉ាស់លើភាគខាងត្បូងអ៊ីស្រាអែល កាលពីមួយខែមុន។

មន្ត្រីសុខាភិបាលនៅតំបន់ហ្គាហ្សាដែលគ្រប់គ្រងដោយក្រុមហាម៉ាស់បាននិយាយថា ប្រជាជនប៉ាឡេស្ទីនជាង ៩,៧៧០នាក់ត្រូវបានសម្លាប់នៅក្នុងសង្គ្រាមចាប់តាំងពីក្រុមហាម៉ាស់បានសម្លាប់មនុស្ស ១,៤០០នាក់ និងចាប់ចំណាប់ខ្មាំងជាង ២៤០នាក់ កាលពីថ្ងៃទី៧ ខែតុលា។

ក្រសួងសុខាភិបាលនៅហ្គាហ្សាបាននិយាយថា មនុស្សរាប់សិបនាក់ត្រូវបានសម្លាប់ដោយការវាយប្រហារតាមអាកាសរបស់អ៊ីស្រាអែលនៅក្នុងទីក្រុងហ្គាហ្សា និងភាគខាងត្បូងបន្ថែមទៀតនៅក្នុងសង្កាត់ហ្គាហ្សាដូចជា Zawaida និង Deir Al-Balah ។ ទូរទស្សន៍ Al-Aqsa ដែលមានទំនាក់ទំនងជាមួយក្រុមហាម៉ាស់ បានដកស្រង់ប្រភពវេជ្ជសាស្រ្តដោយនិយាយថា យ៉ាងហោចណាស់ប្រជាជនប៉ាឡេស្ទីន ៧៥នាក់ត្រូវបានសម្លាប់ និង ១០៦ នាក់រងរបួស នៅក្នុងការវាយប្រហារចុងក្រោយនេះ។

ជាមួយគ្នានោះ កងទ័ពអ៊ីស្រាអែលបាននិយាយថា ការវាយប្រហាររបស់ខ្លួនបានវាយប្រហារលើ “ផ្លូវរូងក្រោមដី ភេរវករ បរិវេណយោធា ប៉ុស្តិ៍សង្កេតការណ៍ និងទីតាំងបាញ់មីស៊ីលប្រឆាំងរថក្រោះ” ។ កងទ័ពជើងគោកបានសម្លាប់យុទ្ធជន ហាម៉ាស់ ជាច្រើននាក់ ខណៈពេលកំពុងកាន់កាប់ បរិវេណសកម្មប្រយុទ្ធ ដែលមានប៉ុស្តិ៍សង្កេតការណ៍ តំបន់ហ្វឹកហាត់ និងផ្លូវរូងក្រោមដី៕

ប្រែសម្រួល៖ សន្យា

ប្រភព៖ Reuters

ចុចអាន៖ ទើបវាយចូលបានប៉ុន្មានថ្ងៃ ពេលនេះ កងទ័ពអ៊ីស្រាអែល ដកថយចេញពី ហ្គាហ្សាភាគខាងជើង វិញ