ឥណ្ឌូនេស៊ីប្រាប់កាលបរិច្ឆេទបង្ហាញទិន្នន័យបឋមនៃការធ្លាក់យន្តហោះ Sriwijaya Air

អ្នកស៊ើបអង្កេតគ្រោះថ្នាក់ផ្លូវអាកាសរបស់ប្រទេសឥណ្ឌូនេស៊ីរំពឹងថានឹងចេញផ្សាយរបាយការណ៍បឋមនៃការធ្លាក់យន្ដហោះរបស់ក្រុមហ៊ុនអាកាសចរណ៍ Sriwijaya Air កាលពីខែមុននៅថ្ងៃទី ១០ ខែកុម្ភៈ ខាងមុខនេះ ។

លោក Soerjanto Tjahjono ប្រធានអ្នកស៊ើបអង្កេតគ្រោះថ្នាក់ផ្លូវអាកាសបានប្រាប់ Reuters តាមសារជាអក្សរថា របាយការណ៍នេះនឹងត្រូវដាក់បញ្ចូលទៅក្នុងគេហទំព័ររបស់គណៈកម្មាធិការជាតិសុវត្ថិភាពដឹកជញ្ជូន (KNKT) ។

យន្តហោះ Boeing 737-500 ដែលមានអាយុកាល ២៦ ឆ្នាំបានធ្លាក់ចូលសមុទ្រជ្វាភ្លាមៗ បន្ទាប់ពីហោះចេញពីទីក្រុងហ្សាការតានៅថ្ងៃទី ៩ ខែមករាដោយបានសម្លាប់មនុស្សទាំងអស់ ៦២ នាក់នៅលើយន្តហោះ ។

ក្រុមអ្នកស៊ើបអង្កេតបានកំណត់ទីតាំង និងពិនិត្យមើលឧបករណ៍ថតទិន្នន័យហោះហើររបស់យន្តហោះ ឬប្រអប់ខ្មៅភ្លាមៗ ហើយបញ្ជូនផ្នែកខ្លះនៃយន្តហោះរួមទាំងប្រព័ន្ធស្វ័យបើកបរដែលគ្រប់គ្រងថាមពលម៉ាស៊ីនដោយស្វ័យប្រវត្តិទៅកាន់សហរដ្ឋអាមេរិក និងអង់គ្លេសដើម្បីធ្វើការពិនិត្យ ។

ទន្ទឹមនោះអ្នកមុជទឹកនៅតែមិនទាន់រកឃើញឧបករណ៍ថតសម្លេងនៅកាប៊ីនយន្ដហោះនៅឡើយទេដែលនឹងជួយអ្នកស៊ើបអង្កេតឲ្យយល់កាន់តែច្បាស់អំពីកត្តាមនុស្សដែលទាក់ទងនឹងការធ្លាក់នេះ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ បណ្ដុំរូបភាពកំសត់ៗក្រុមគ្រួសារជនរងគ្រោះនៃការធ្លាក់យន្តហោះឥណ្ឌូនេស៊ីធ្វើពិធីរំឭកវិញ្ញាណក្ខន្ធនៅសមុទ្រ

ចុចអាន ៖ តាមពិតយន្តហោះ Boeing ដែលធ្លាក់ក្នុងឥណ្ឌូនេស៊ីអាក់ខានហោះហើរជិតមួយឆ្នាំមកហើយ