ជីវិតកម្សាន្ដ

ក្រោយផ្ទុះការរិះគន់! ក្រុមតន្រ្តី កុសល់ ប្រម៉ូតតន្រ្តី ធ្វើកិច្ចសន្យាបញ្ឈប់ការប្រើពាក្យពេចន៍អសីលធម៌

បានផុស

២ years មុន

នៅ

ថ្ងៃព្រហស្បតិ៍ ២៣ វិច្ឆិកា ២០២៣

ដោយ

ថ្មីៗនេះ បន្ទាប់ពីមានការចែករំលែកនូវឃ្លីបវីដេអូចម្រៀងខ្លីមួយ ច្រៀងដោយអ្នកចម្រៀងស្រីអកកាដង់ម្នាក់លើកយកបទ មរតកដើមមកបកស្រាយកែកាឡៃខ្លឹមសារបញ្ចូលពាក្យពេចន៍ស្មោកគ្រោក និងអាសអាភាសនោះ គឺមានមហាជន និងអ្នកប្រើប្រាស់បណ្តាញសង្គមបានផ្ទុះការរិះគន់យ៉ាងចាស់ដៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាក្រោយ មានប្រតិកម្មរិះគន់ពីសំណាក់ទស្សនិកជន និងអ្នកប្រើប្រាស់បណ្តាញសង្គម ភ្លាមៗនោះមន្ទីរវប្បធម៌ និងវិចិត្រសិល្បៈខេត្តកំពង់ចាម ក៏បានមានវិធានការកោះហៅក្រុមតន្ត្រីកុសល់ប្រម៉ូតន្រ្តី មកធ្វើការអប់រំណែនាំ និងធ្វើកិច្ចសន្យាបញ្ឈប់ការប្រើប្រាស់ពាក្យពេចន៍អសីលធម៌ដែលប៉ះពាល់ប្រពៃណី វប្បធម៌ និងសីលធម៌សង្គម។

នៅក្នុងកិច្ចសន្យាលោក កាយ កុសល់ ដែលជាម្ចាស់ផេក «កុសល់ប្រម៉ូតន្រ្តី» បានបញ្ជាក់ថា សូមធ្វើការសន្យាថានឹងឈប់ផុសមាតិការ និងរូបភាព ឬវីដេអូ និងចម្រៀងដែលមានប៉ារ៉ូលអសុរសដែលធ្វើឲ្យប៉ះពាល់ដល់តម្លៃវប្បធម៌ជាតិខ្មែរដ៏ផូរផង់ ក៏ដូចជាកាយវិការណាមួយដែលមិនសមរម្យនៅក្នុងបណ្តាញសង្គម, Facebook, Youtube ,TikTokជាដើម។

ប្រភពដដែលបានបន្ថែមថា «ប្រសិនខ្ញុំបានមិនគោរពតាមកិច្ចសន្យានេះទេ ខ្ញុំសូមទទួលខុសត្រូវមុខច្បាប់ជាធរមាន»។

សូមបញ្ជាក់ថា បទចម្រៀងមរតកដើមដែលអ្នកចម្រៀងលើកយកមកច្រៀងមានចំណងជើងថា “ខ្ញុំយកប្តីក្មេង” ជាសំនៀងលោកស្រី ប៉ែន រ៉ន ។ ប៉ុន្តែរឿងដែលមហាជនប្រតិកម្មបង្ហាញការហួសចិត្តខ្លាំងនោះ គឺក្រោយឃើញអ្នកចម្រៀងស្រីតាមវង់តន្រ្តីអកកាដង់រូបនេះបែរជាយកទៅច្រៀងការឡៃច្នៃខុសបារ៉ូលដើមលក្ខណៈអាសអាភាសដោយប្រើពាក្យសម្តីអសុរសមិនសមរម្យជាស្រ្តីខ្មែរដែលថ្លៃថ្នូរទៅវិញ៕

អត្ថបទ៖ ចាន់រ៉ា