អ្នកនាំពាក្យរាជរដ្ឋាភិបាលជប៉ុន ប្តេជ្ញាស្តារទំនុកចិត្តសាធារណជនឡើងវិញ

អ្នកនាំពាក្យថ្មីរបស់រាជរដ្ឋាភិបាលទីក្រុងតូក្យូលោក Hayashi Yoshimasa បានប្តេជ្ញាថា នឹងធ្វើឲ្យសាធារណជន មានទំនុកចិត្តលើនយោបាយជប៉ុនសាជាថ្មី ក្រោមការដឹកនាំរបស់លោកនាយករដ្ឋមន្ត្រី Kishida Fumio។

ក្នុងសន្និសីទសារព័ត៌មានលើកដំបូង ក្នុងនាមជាអ្នកនាំពាក្យរាជរដ្ឋាភិបាល, លោក Hayashi ដែលជាអតីតរដ្ឋមន្ត្រីការបរទេសបាននិយាយថា លោក Kishida បានប្តេជ្ញាដឹកនាំកិច្ចខិតខំប្រឹងប្រែងកំណែទម្រង់នៅក្នុងគណបក្សប្រជាធិបតេយ្យសេរី (LDP) និងស្តារការជឿទុកចិត្តពីសាធារណៈជនក្នុងរឿងនយោបាយឡើងវិញ។

លោក Hayashi ក៏និយាយដែរថា ការងារតាក់តែងផែនការកំណែទម្រង់ថវិកានិងពន្ធ សម្រាប់ឆ្នាំសារពើពន្ធបន្ទាប់ ឥឡូវនេះបានឈានដល់ដំណាក់កាលចុងក្រោយហើយ។ រដ្ឋាភិបាល​នឹង​បន្ត​ដោះស្រាយ​បញ្ហា​សំខាន់ៗ​ដែល​ទាក់ទង​ ​នឹង​ការ​រស់នៅ​របស់​ប្រជាពលរដ្ឋ​ជាបន្ទាន់។

កាល​ពី​ថ្ងៃ​ព្រហស្បតិ៍ទី១៤ខែធ្នូ លោក Kishida បានផ្លាស់ប្តូរ​តំណែង​រដ្ឋមន្ត្រី​ខុទ្ទកាល័យចំនួន៤រូប ​ជុំវិញ​រឿង​អាស្រូវបក្សពួកនិយម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទឹកប្រាក់ជាង៥០០លានយ៉េន (៣.៤លានដុល្លារ) ត្រូវបានគេចោទប្រកាន់ថា បានធ្លាក់ចូលទៅក្នុងមូលនិធិសម្ងាត់នារយៈពេល៥ឆ្នាំរហូតដល់ឆ្នាំ២០២២។

តាមការចុះផ្សាយរបស់សារព័ត៌មាន Nikkei, ព្រះរាជអាជ្ញាទីក្រុងតូក្យូ ក៏បានបើកការស៊ើបអង្កេតករណីអំពើពុករលួយផងដែរ។

រដ្ឋមន្ត្រីដែលត្រូវបញ្ចប់តំណែងទាំង៤មានដូចជាប្រធានខុទ្ទកាល័យគណៈរដ្ឋមន្ត្រី និងជាអ្នកនាំពាក្យរដ្ឋាភិបាលកំពូល លោក Hirokazu Matsuno, រដ្ឋមន្ត្រីសេដ្ឋកិច្ច និងឧស្សាហកម្ម Yasutoshi Nishimura, រដ្ឋមន្ត្រីកិច្ចការផ្ទៃក្នុង Junji Suzuki និងរដ្ឋមន្ត្រីកសិកម្ម Ichiro Miyashita៕

ប្រែសម្រួល៖ Vann Vann

ប្រភព៖ NHK, BBC

ចុចអាន៖ នាយករដ្ឋមន្ត្រី ជប៉ុន រុះរើសមាជិកគណៈរដ្ឋមន្ត្រីកាលជំនាន់លោក Abe ចំនួន ៤ រូប ក្រោយរឿងអាស្រូវពុករលួយ