កីឡា

Pochettino រំពឹងលើ Palmer អាចនឹងឈានដល់កម្រិតកំពូលដូច Di Maria

បានផុស

២ years មុន

នៅ

ថ្ងៃអង្គារ ២ មករា ២០២៤

ដោយ

លោក Mauricio Pochettino គ្រូបង្វឹកក្លិបបាល់ទាត់តោខៀវ Chelsea មានជំនឿចិត្តលើខ្សែបម្រើ Cole Palmer នឹងមានសមត្ថភាពប្រកបដោយសក្តានុពលឈានដល់កម្រិតកំពូលមួយដូចកីឡាករ Angel Di Maria នៅពេលខាងមុខ។

ខ្សែបម្រើស្លាបវ័យក្មេង Cole Palmer បានផ្លាស់ទៅ Chelsea កាលពីថ្ងៃទី១ ខែកញ្ញា ឆ្នាំ២០២៣ ក្នុងតម្លៃខ្លួន៤០លានផោន និងបានជាប់ឈ្មោះក្នុងជម្រើស១១នាក់ដំបូងរបស់លោក Pochettino។ រូបគេជាបេក្ខភាពម្នាក់ទទួលបន្ទុកទាត់បាល់ពិន័យ១១ម៉ែត្រ។ រូបគេជាអ្នកបញ្ចូនបាល់ឲ្យកីឡាករ Curtis Jones ស៊ុតបញ្ចូលទីក្នុងវគ្គផ្តាច់ព្រ័ត្រ UEFA U-21 Euros ដែលបានជួយក្រុមយុវជនជម្រើសជាតិអង់គ្លេសឈ្នះពានរង្វាន់ឆ្នាំ២០២៣។ កីឡាករវ័យ២១ឆ្នាំក៏បានបង្ហាញខ្លួនលើកដំបូងជាមួយក្រុមឈុតធំរបស់អង់គ្លេសដឹកនាំដោយលោក Gareth Southgate បន្ទាប់ពីការបង្ហាញទម្រង់ដ៏ល្អក្នុងរដូវកាលនេះ។

លោក Pochettino បាននិយាយថា ៖«សមត្ថភាពលើទីលាន គាត់មានជំនាញប្រើជើងឆ្វេង និងមានបច្ចេកទេសស្រដៀងកីឡាករ Angel Di Maria ទាំងគុណភាព និងបច្ចេកទេសមួយចំនួនទៀត»។ Di Maria ជាសមាជិកដែលបានជួយក្រុមជម្រើសជាតិអាហ្សង់ទីនឈ្នះជើងឯកពិភពលោក ឆ្នាំ២០២២។

លោក Pochettino បច្ចុប្បន្នជាគ្រូបង្វឹកក្លិប Chelsea ហើយលោកក៏ធ្លាប់ដឹកនាំក្លិប PSG នៅប្រទេសបារាំងជាកន្លែងដែលលោកធ្លាប់ការងារជាមួយកីឡាករ Di Maria។ ហេតុនេះហើយបានជាគ្រូបង្វឹកស្គាល់ពីសមត្ថភាពរបស់ខ្សែបម្រើឆ្នើមរបស់អាហ្សង់ទីនច្បាស់។

លោក Pochettino បានបន្ថែមថា ៖«Palmer មានសក្ដានុពលអាចឈានដល់កម្រិតខ្ពស់មួយ។ ឥឡូវនេះ គាត់ហាក់នៅមានកម្រិត។ គាត់អាចក្លាយជាអ្នកនាំលេងមួយរូប។ គាត់មានប្រសិទ្ធភាពក្នុងការបញ្ចប់ទី បញ្ចូនបាល់ល្បឿន។ នេះហើយជាភាពស្រដៀងគ្នានឹង Di Maria»៕

ប្រែសម្រួល៖ ផា រតនា
ប្រភព៖ Eurosport