សត្វស្មោញក្លាយជាមេដែក​ឆក់ទាញ​ភ្ញៀវទេសចរ​សម្រុក​ទៅ​ទស្សនា​ដែន​បឹងទន្លេសាប

កំណើន​ភ្ញៀវ​ទេសចរក្នុង​ដែនបឹងទន្លេសាបក្នុង​ខេត្តបាត់ដំបងបានងើបឡើងជាបណ្តើរៗ ជាមួយ​សន្ទុះភ្ញៀវកើនឡើងជាបន្តបន្ទាប់​។

ប្រធានសហគមន៍អេកូទេសចរណ៍ លោក តន់ ណៃ បានឲ្យដឹងថា នៅតំបន់ដែនបឹងទន្លេសាប ក្នុងទឹកដី​នៃ​ខេត្តបាត់ដំបងមានកំណើនភ្ញៀវទេសចរក្នុងស្រុក​និងក្រៅស្រុក​មកកម្សាន្ត​យ៉ាងច្រើន​ ក្រោយស្ថានភាព​ជំងឺ​កូវីដ១៩ បានធូរស្រាល​។

ក្នុង ១ ខែ មានភ្ញៀវជាតិនិងអន្តរជាតិចន្លោះពី ១០០ ទៅ ១៥០ នាក់ ហើយលោកសង្ឃឹមថា ក្នុងឆ្នាំ២០២៤ នឹងបានល្អប្រសើរជាងនេះ តាមរយះភាពទាក់ទាញនៃ​ហ្វូងសត្វស្លាប (សត្វស្មោញ)។

លោកបន្តថា ភ្ញៀវ​មកទស្សនាមើលហ្វូងសត្វស្លាបជាពិសេស​សត្វស្មោញ​ ទស្សនាផ្ទះបណ្តែតទឹក និង​បានស្វែងយល់ក្នុងការរស់នៅប្រចាំថ្ងៃរបស់អ្នកភូមិ រួមទស្សនាកន្លែងលក់សម្ភារ:​អនុស្សាវរីយ៍​របស់សហគមន៍ផង។

ប្រជាពលរដ្ឋរស់នៅភូមិបាក់ព្រា និងព្រែកត្រប់បានលើកឡើងប្រហាក់ប្រហែលគ្នាថា ឆ្នាំនេះសត្វស្មោញបានកើនឡើងគួរឲ្យ​កត់សម្គាល់ ខណះភ្ញៀវទេសជាតិនិងអន្តរជាតិតែងចូលចិត្តទស្សនាហ្វូងសត្វប្រភេទនេះជាងសត្វប្រភេទផ្សេងទៀត។

“ពួកខ្ញុំឃើញមានសត្វកើនឡើងសប្បាយចិត្ត ពួកខ្ញុំគិតថាការកើនឡើងនេះ តាមរយះការទប់ស្កាត់ក្រុមព្រានបានល្អហើយសត្វផ្សេងក៏មានការកើនឡើងដែរក្នុងឆ្នាំ២០២៤នេះ”។ នេះបើតាមពលរដ្ឋ​ប្រាប់​ឲ្យ​ដឹង​។

បើតាម​អាជ្ញាធរមូលដ្ឋានបានលើកឡើងថា តាមការសង្កេតទាំងខ្មែរទាំងបរទេស គឺចូលចិត្តមើលហ្វូងសត្វ​ស្មោញ ខណៈ​ដែល​អាជ្ញាធរមូលដ្ឋានភូមិឃុំក៏ចូលរួមពង្រឹងការទប់ស្កាត់ ការបរបាញ់សត្វឬដាក់អន្ទាក់ជាប្រចាំផងដែរ។

រហូតមកដល់ពេលនេះ មិនទាន់មានមន្ត្រីជំនាញបញ្ជាក់ថា តើប្រភេទសត្វស្មោញដែលជាមេដែកឆក់ទាញកំណើនភ្ញៀវរហូតដល់ពេលនេះបានកើនដល់កម្រិតណានៅឡើយ។

ហ្វូងសត្វស្មោញមានជម្រកនៅចំណុចព្រែកទាល់ និងចំណុច​ស្ទឹងសែនក្នុងស្រុកឯកភ្នំ ដែល​ចំនួនកើន​ឡើង​យ៉ាង​ខ្លាំង​ពី​ ៥០០ ក្បាល ឡើងជិតដល់ ៨ ០០០ ក្បាល ដែលចំនួននេះមន្ត្រីជំនាញបានចាត់ទុកថាជាចំនួនច្រើនជាងគេនៅប៉ែក​អាសុីអាគ្នេយ៍​សម្រាប់សត្វដ៏កម្រមួយប្រភេទនេះ។

លោក ហម អរុណ អនុប្រធានមន្ទីរទេសចរណ៍ខេត្តបានលើកឡើងដែរថា នៅតំបន់ទេសចរណ៍ដែនបឹងទន្លេសាបក្នុង ១ ឆ្នាំ ភ្ញៀវទេសចរអាចធ្វើដំណើរកម្សាន្តបានតែ ៦ ខែចាប់ពី​ចន្លោះ​ខែកក្កដា ហើយ​ចាប់ពីខែមករា​ដល់​ខែកុម្ភះ ទឹកមានស្ថានភាពរាក់ ធ្វើដំណើរមិនកើត។

លោកថា ក្រោយពីមានការធ្លាក់កំណើនភ្ញៀវក្នុងកាល:ទេស:កូវីដ១៩ តំបន់បឹងទន្លេសាក្នុងឆ្នាំ ២០២៣ បានកើនឡើងវិញជាបន្តបន្ទាប់ ហើយលោកសង្ឃឹមថា ក្នុងឆ្នាំ២០២៤ នឹងកំណើនហក់ឡើង តាមរយះមន្ត្រីមន្ទីរធ្វើការណែនាំនិងផ្សព្វផ្សាយ​អំពីសក្តានុពលនៅតំបន់នោះ រួមនិងតំបន់រមនីយ៍ដ្ឋាននានាក្នុងខេត្ត ដែលបានពង្រឹងសេវាកម្ម ធ្វើយ៉ាងណាឲ្យបានប្រសើរ ដើរទន្ទឹមនិងផាសុខភាព និងសន្តិសុខសណ្តាប់ធ្នាប់ល្អប្រសើរ សម្រាប់ភ្ញៀវទៅកម្សាន្តទាំងអ្នកក្នុងស្រុកនិងក្រៅ​ស្រុកឲ្យមានទំនុកចិត្ត​និង​កក់ក្តៅ ក្នុងដំណើរកម្សាន្តរបស់ពួកគេ៕

អត្ថបទ៖ សៅ សារិទ្ធ