ព័ត៌មានអន្ដរជាតិ

ស្ដេចថ្មីម៉ាឡេស៊ី ទិញស្លាកលេខរថយន្តមាស ក្នុងតម្លៃ ៣១ម៉ឺនដុល្លារ

បានផុស

២ years មុន

នៅ

ថ្ងៃសៅរ៍ ២៤ កុម្ភៈ ២០២៤

ដោយ

ក្សត្រស៊ុលតង់ថ្មីនៃប្រទេសម៉ាឡេស៊ីមកពីរដ្ឋ Johor និងជាមហាសេដ្ឋីដ៏មានឥទ្ធិពលបានទិញស្លាកលេខរថយន្តពិសេស GOLD 1 ក្នុងតម្លៃ ១.៥ លានរីងហ្គីត (៣១៤,៧០០ ដុល្លារអាមេរិក) ជាចំនួនខ្ពស់បំផុតមិនធ្លាប់មាន ដែលបានចំណាយសម្រាប់ស្លាកលេខនៅក្នុងប្រទេស។

កាសែត Straits Times បានរាយការណ៍កាលពីថ្ងៃទី ២០ ខែកុម្ភៈថា មូលនិធិដែលបានមកពីការដេញថ្លៃនេះ នឹងត្រូវបញ្ជូនទៅរដ្ឋាភិបាលសហព័ន្ធរបស់ប្រទេសម៉ាឡេស៊ី។ ចំណែកឯស៊េរីផ្លាកលេខ GOLD ត្រូវបានណែនាំនៅក្នុងការប្រារព្ធខួបលើកទី ៥០ ឬ Golden Jubilee នៃទឹកដីសហព័ន្ធម៉ាឡេស៊ី។

ការដេញថ្លៃសម្រាប់ស៊េរី GOLD បានធ្វើឡើងចាប់ពីថ្ងៃទី០១ដល់ថ្ងៃទី ០៥ ខែកុម្ភៈ ដោយការចាប់ផ្តើមដេញថ្លៃសម្រាប់ស្លាកលេខដែលមានលេខតែមួយខ្ទង់ត្រូវបានកំណត់តម្លៃ ២០,០០០ រីងហ្គីតម៉ាឡេស៊ី (៤,១៧២ដុល្លារ)។ ការទិញយកចុងក្រោយបង្អស់របស់ស្តេច Sultan Ibrahim Iskandar មិនត្រឹមតែដណ្តើមបានស្លាកលេខដ៏មានកិត្យានុភាពប៉ុណ្ណោះទេ ថែមទាំងបានលើសកំណត់ត្រាចាស់របស់ទ្រង់ថែមទៀតផង។ នៅខែមិថុនា ឆ្នាំ ២០២៣ ស្ដេចថ្មីអង្គនេះបានជោគជ័យក្នុងការដេញថ្លៃ ១.២ លានរីងហ្គីតម៉ាឡេស៊ី (២៥០,៣០០ ដុល្លារ) សម្រាប់ស្លាកលេខ FF1 ដែលទ្រង់ចង់បានបំផុត។

ស្តេចស៊ុលតង់ Ibrahim Iskandar (ឆ្វេង) ទទួលបានស្លាកលេខរថយន្ត GOLD 1 ពីរដ្ឋមន្ត្រីដឹកជញ្ជូន លោក Anthony Loke នៅថ្ងៃទី ២០ ខែកុម្ភៈ ឆ្នាំ ២០២៣

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែក ងាកទៅកាន់សារព័ត៌មាន Business Insider ក៏បានរាយការណ៍ដែរថា ស្តេចថ្មីរបស់ប្រទេសម៉ាឡេស៊ី ត្រូវបានគេស្គាល់ដោយសារចំណង់ចំណូលចិត្តរបស់ទ្រង់ចំពោះភាពប្រណីត និងចូលចិត្តរថយន្តប្លែកៗ ជារឿយៗទ្រង់តែងតែវិនិយោគទ្រព្យសម្បត្តិផ្ទាល់ព្រះកាយនៅក្នុងរថយន្តចាស់ៗ ម៉ូតូ យន្តហោះឯកជន និងសត្វកម្រដែលពិភពលោកពុំមានដូច។ ជាពិសេស ស្តេច Sultan Ibrahim Iskandar តែងតែបង្ហាញការប្រមូលរថយន្ត Ferraris និងម៉ូតូរបស់ទ្រង់នៅលើវេទិកាប្រព័ន្ធផ្សព្វផ្សាយសង្គមជានិច្ចកាល។

លើសពីនេះទៀតសោត ស្តេចម៉ាឡេស៊ីដែលយាងឡើងគ្រងរាជ្យថ្មីនេះ គឺជាមហាសេដ្ឋីដែលមានជាងគេក្នុងប្រទេស ពោលគឺក្សត្រ Sultan Ibrahim អង្គនេះទ្រង់មានជំនួញក្នុងព្រហស្តជាច្រើនរាប់តាំងពីអចលនទ្រព្យ បណ្តាញទូរគមនាគមន៍ និងរោងចក្រថាមពលរាប់មិនអស់។

យ៉ាងណាមិញ យោងទៅតាមការប៉ាន់ប្រមាណរបស់សារព័ត៌មាន Bloomberg បានដាក់ទ្រព្យសម្បត្តិរួមរបស់ស្តេចថ្មីនៃប្រទេសម៉ាឡេស៊ី និងគ្រួសាររបស់ទ្រង់មានប្រហែល ៥.៧ពាន់លានដុល្លារឯណោះ៕