សម្ដេចធិបតី យករាជធានី-ខេត្តចំនួន៣ សម្រាប់ការតភ្ជាប់វិស័យអាកាសចរណ៍

រាជធានីភ្នំពេញ ខេត្តសៀមរាប និងខេត្តព្រះសីហនុ ត្រូវបានរាជរដ្ឋាភិបាលកំណត់ជាប៉ូលអាទិភាពដ៏សំខាន់សម្រាប់ការតភ្ជាប់ និងលើកកម្ពស់វិស័យអាកាសចរណ៍របស់កម្ពុជា។ នេះជាការគូសបញ្ជាក់របស់សម្ដេចធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា។

ថ្លែងចេញពីវេទិកាសំណេះសំណាល និងចុះពិនិត្យវឌ្ឍនភាពនៃគម្រោងសាងសាង់ព្រលានយន្តហោះអន្តរជាតិតេជោ នៅខេត្តកណ្ដាល នាព្រឹកថ្ងៃទី១២ ខែមីនា ឆ្នាំ២០២៤នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ការសម្រេចកសាងអាកាសយានដ្ឋានអន្តរជាតិថ្មី នៅខេត្តកណ្ដាលនេះ គឺជាចក្ខុវែងឆ្ងាយរបស់រាជរដ្ឋាភិបាល ដើម្បីពង្រីកការតភ្ជាប់ផ្លូវអាកាសរបស់កម្ពុជា ខណៈព្រលានយន្តហោះនៅខេត្តសៀមរាប និងខេត្តព្រះសីហនុ ក៏បាននិងកំពុងកែលម្អ និងពង្រីកបន្ថែមដូចគ្នា។  

សម្ដេចនាយករដ្ឋមន្រ្តី ថ្លែងដូច្នេះថា៖ «ឆ្នាំនេះ យើងរុញខេត្តសៀមរាប លើវិស័យទេសចរណ៍ ខេត្តព្រះសីហនុ លើការ វិនិយោគ ដោយយើងដាក់គោលការណ៍លើកទឹកចិត្តវិនិយោគជាច្រើន ដែលប៉ូលទាំង៣នេះ ជាមជ្ឈមណ្ឌលនៃសេដ្ឋកិច្ច​ ពាណិជ្ជកម្ម ឧស្សាហកម្ម សេវា និងទេសចរណ៍»។

សម្ដេចធិបតី ចាត់ទុកការកសាង និងពង្រីកព្រលានយន្តហោះនៅប៉ូលទាំង៣នេះ គឺពិតជាមានសារៈសំខាន់ណាស់ក្នុងការតភ្ជាប់វិស័យអាកាសចរណ៍ ហើយក៏ជានិមិត្តរូបជាក់ស្ដែងនៃការអភិវឌ្ឍដ៏រីកចម្រើនរបស់កម្ពុជា ហើយជាចលករដ៏ធំមួយនៃការរុញច្រានកំណើនសេដ្ឋកិច្ចជាតិផងដែរ៕