ព័ត៌មានអន្ដរជាតិ

សីតុណ្ហភាពថ្ងៃត្រង់នៅ ថៃ ឡើងដល់ ៤០ អង្សាសេ តែពេលល្ងាចបែរជាអាចមានផ្គររន្ទះ

បានផុស

២ years មុន

នៅ

ថ្ងៃចន្ទ ២៥ មីនា ២០២៤

ដោយ

នាយកដ្ឋានឧតុនិយមថៃបានព្រមានពីអាកាសធាតុក្តៅខ្លាំង ចាប់ពីថ្ងៃទី២៤ ខែមីនាតទៅនៅតំបន់ភាគខាងជើង និងកណ្តាល ដោយសីតុណ្ហភាពឡើងដល់ ៤០ អង្សាសេ ខណៈនៅទីក្រុងបាងកកអាចមានឱកាសភ្លៀងធ្លាក់ ១០ ភាគរយ ។ នេះបើយោងតាមការចេញផ្សាយដោយសារព័ត៌មាន The Nation កាលពីថ្ងៃទី២៤ ខែមីនាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ពាធបរិយាកាសទាបដែលបណ្តាលមកពីកម្ដៅគ្របដណ្តប់តំបន់ខាងលើនៃប្រទេសថៃ នឹងនាំឲ្យមានអាកាសធាតុក្តៅខ្លាំងនៅពេលថ្ងៃត្រង់ ហើយនាយកដ្ឋានក៏បានចេញការបញ្ជាក់ជូនទៅកាន់ប្រជាពលរដ្ឋផងដែរត្រូវថែរក្សាសុខភាព ដែលបណ្ដាលមកពីអាកាសធាតុក្តៅខ្លាំងនេះ ។

ទន្ទឹមនឹងជួបរលកក្ដៅខ្លាំងនៅពេលថ្ងៃត្រង់ ប៉ុន្តែតំបន់ដាច់ស្រយាលមួយចំនួនរបស់ថៃក៏អាចនឹងកើតមានបាតុភូតព្យុះផ្គររន្ទះនៅពេលល្ងាចផងដែរ ដោយសារខ្យល់បក់ពីទិសនិរតី និងអាគ្នេយ៍នាំមកនូវសំណើមពីឈូងសមុទ្រថៃ និងសមុទ្រចិនខាងត្បូង មកគ្របដណ្តប់តំបន់ភាគឦសាន ប៉ែកខ្ពង់រាប កណ្តាល និងភាគខាងកើត ។

នាយកដ្ឋានបានបន្ថែមថា ដូច្នេះសូមប្រជាពលរដ្ឋនៅតំបន់ខាងលើត្រូវប្រុងប្រយ័ត្នចំពោះគ្រោះថ្នាក់ដែលអាចកើតឡើងពីខ្យល់ព្យុះផ្គររន្ទះក្នុងរយៈពេលប៉ុន្មានថ្ងៃនេះ ស្របពេលដែលខ្យល់បក់ពីទិសខាងកើត និងអាគ្នេយ៍ដែលគ្របដណ្តប់លើឈូងសមុទ្រថៃ តំបន់ភាគខាងត្បូង និងសមុទ្រ Andaman នឹងបង្កឲ្យមានផ្គររន្ទះផ្សេងមួយទៀតនៅតំបន់មួយចំនួននៃភាគខាងត្បូងប្រទេស ។

ចំណែកនៅឈូងសមុទ្រថៃ និងសមុទ្រ Andaman ជាពិសេសនៅក្នុងតំបន់ដែលកើតមានព្យុះផ្គររន្ទះ រលកកម្ពស់ដែលជាមធ្យមមានប្រហែល ១ ម៉ែត្ររំពឹងថានឹងបោកបក់ខ្ពស់ជាងមុន ខណៈនាយកដ្ឋានថែមទាំងបានព្រមានទៅដល់ប្រជានេសាទក្នុងតំបន់ទាំងនេះផងដែរថា ដាច់ខាតមិនត្រូវចេញទូកក្នុងអំឡុងពេលមានព្យុះផ្គររន្ទះនោះឡើយ ៕