លោក យ៉ាំ ស៊ីងម៉ៅ បានរបូតតំណែងប្រធាននាយកដ្ឋានកណ្ដាលយុត្តិធម៌ ក្រោយកាន់តំណែងនេះបានជាង១ខែ  

ក្រោយកាន់តំណែងត្រឹមរយៈពេលជាងមួយខែប៉ុណ្ណោះ លោកឧត្តមសេនីយ៍ឯក យ៉ាំ ស៊ីងម៉ៅ ត្រូវបានសម្ដេចនាយករដ្ឋមន្ត្រីនៃកម្ពុជា សម្រេចដកចេញពីតំណែងប្រធាននាយកដ្ឋានកណ្ដាលនគរបាលយុត្តិធម៌វិញ។

តាមអនុក្រឹត្យរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ចុះថ្ងៃទី៣ ខែមេសា ឆ្នាំ២០២៤ បានសម្រេចបញ្ចប់មុខតំណែងលោកឧត្តមសេនីយ៍ឯក យ៉ាំ ស៊ីងម៉ៅ អត្តលេខ ៦៦៣១៥ ពីប្រធាននាយដ្ឋានកណ្ដាលនគរបាលយុត្តិធម៌ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ។ មាត្រា២ នៃអនុក្រឹត្យដដែលនេះ បានបញ្ញត្តិថា បទប្បញ្ញត្តិទាំងឡាយណាដែលផ្ទុយនឹងអនុក្រឹត្យនេះ ត្រូវទុកជានិរាករណ៍។

ការបញ្ចប់មុខតំណែងរបស់លោក យ៉ាំ ស៊ីងម៉ៅ ពេលនេះ មិនត្រូវបានបញ្ជាក់ថា ដោយសារមូលដ្ឋានអ្វីនោះឡើយ។ ប៉ុន្តែ ការបញ្ចប់មុខតំណែងនេះ គឺធ្វើឡើងត្រឹមរយៈពេលជាងមួយខែប៉ុណ្ណោះ ក្រោយការតែងតាំងលោក យ៉ាំ ស៊ីងម៉ៅ ជាប្រធាននាយកដ្ឋានកណ្ដាលនគរបាលយុត្តិធម៌នេះ ពោល គឺត្រូវបានតែងតាំងកាលពីថ្ងៃទី១៦ ខែកុម្ភៈ ឆ្នាំ២០២៤ កន្លងទៅ។

បន្ទាប់ពីការតែងតាំងនាពេលនោះ ក៏មានការផ្សព្វផ្សាយព័ត៌មាននៅលើបណ្ដាញសង្គមមួយចំនួន ដោយបានចោទមកលើលោក លោក យ៉ាំ ស៊ីងម៉ៅ ថា ជាអគ្គនាយកក្រុមហ៊ុន ប៊ី ភី អេ បូព៌ាអេស៊ា ឯ.ក និងថា លោក យ៉ាំ ស៊ីងម៉ៅ ជាអ្នកនាំចូលជនជាតិចិនខុសច្បាប់មកកម្ពុជា ក៏ដូចជារកស៊ីឈើខុសច្បាប់ ជាដើម។ ប៉ុន្តែជុំវិញការចោទប្រកាន់នេះ ត្រូវបានអ្នកនាំពាក្យរងក្រសួងមហាផ្ទៃ លោក ទូច សុខៈ ចេញមកបំភ្លឺ និងច្រានចោលការផ្សព្វផ្សាយចោទប្រកាន់បែបនេះ៕