តួកគី លើកទឹកចិត្តក្រុមហ៊ុនក្នុងស្រុកឱ្យចាប់ផ្តើមជើងហោះហើរត្រង់មកកម្ពុជា

ដើម្បីឆ្លើយតបទៅនឹងតម្រូវការលើវិស័យពាណិជ្ជកម្ម និងការវិនិយោគ កម្ពុជា និងតួកគី បានឯកភាពគ្នាលើតម្រូវការសម្រាប់ការហោះហើរត្រង់រវាងប្រទសទាំងពីរ។ ជាមួយគ្នានេះ ក្រុមហ៊ុន Türkiye នឹងខិតខំលើកទឹកចិត្តក្រុមហ៊ុនអាកាសចរណ៍របស់ខ្លួនឱ្យចាប់ផ្តើមជើងហោះហើរត្រង់មកកម្ពុជាឱ្យបានឆាប់តាមដែលអាចធ្វើទៅបាន ដើម្បីសម្រួលដល់ពាណិជ្ជកម្ម ការវិនិយោគ និងទេសចរណ៍។
នេះបើតាមសេចក្តីប្រកាសព័ត៌មាន ស្តីពីលទ្ធផលដំណើរទស្សនកិច្ចរបស់លោក សុខ ចិន្តាសោភា ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ ទៅកាន់សាធារណរដ្ឋតួកគី ក្នុងខែ ឧសភា​ឆ្នាំ ២០២៤។

បន្ថែមពីនេះ ភាគីទាំងពីរបានទទួលស្គាល់សក្ដានុពលដ៏ធំសម្រាប់ការវិនិយោគនាពេលអនាគតលើវិស័យដូចជា កសិឧស្សាហកម្ម ការអប់រំ ការកែច្នៃម្ហូបអាហារ ការអភិវឌ្ឍន៍ថាមពលបៃតង និងទេសចរណ៍។

ក្នុងឱកាសនោះលោក សុខ ចិន្តាសោភា បានជំរុញឱ្យម្ចាស់ផ្ទះតួកគីចាត់ទុកប្រទេសកម្ពុជាជាផ្នែកនៃទីផ្សារអាស៊ីអាគ្នេយ៍ដ៏ធំដែលមានប្រជាជនជាង ៦៥០ លាននាក់ ដែលតភ្ជាប់ដោយបណ្តាញកិច្ចព្រមព្រៀងពាណិជ្ជកម្មក្នុងតំបន់ និងទ្វេភាគី។ ទាំងនេះរួមមានកិច្ចព្រមព្រៀងពាណិជ្ជកម្មសេរីអាស៊ាន (AFTA) ភាពជាដៃគូសេដ្ឋកិច្ចទូលំទូលាយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីរបស់កម្ពុជាជាមួយប្រទេសចិន និងសាធារណរដ្ឋកូរ៉េ។

លោករដ្ឋមន្រ្តីកម្ពុជា ក៏បានលើកឡើងពីឱកាសវិនិយោគនៅកម្ពុជាដែលអាចទាញប្រយោជន៍រួមគ្នា ខណៈក្រុមហ៊ុនតួកគីចំនួន៣ ​បានបង្ហាញ​បំណង​ពង្រីក​អាជីវកម្ម​របស់​ពួកគេ​មក​កម្ពុជា​៕

អត្ថបទ៖ ឡាយ សាមាន