លោក ផៃ ផុងរ៉ាក់ តារាចម្រៀងខ្មែរសុរិន្ទ ឃ្លាតឆ្ងាយសិល្បៈ តើពេលនេះលោកនៅឯណា?

តារាចម្រៀងជើងចាស់ខ្មែរសុរិន្ទ លោក ផៃ ផុងរ៉ាក់ ប្រិយមិត្តមួយចំនួនធំនៅចាំបានហើយថា លោកគឺជាសិល្បករល្បីល្បាញនាអំឡុងឆ្នាំ១៩៨០ ជាង ជំនាន់ លោក ណូយ វ៉ាន់ណេត និងលោក នូ សុិប ខណ: លោកមានស្នាដៃបទចម្រៀងល្បីៗជាច្រើនបទសម្រាប់បំពេរអារម្មណ៍មហាជន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញក្រោយពេលសាងប្រជាប្រិយភាព និងកេរ្តិ៍ឈ្មោះល្បីរន្ទឺ លោក ផៃ ផុងរ៉ាក់ បានស្ងប់ស្ងាត់ពីវិថីសិល្បៈមួយរយៈ។ បន្ទាប់មកទៀត ស្រាប់តែ លោក ផៃ ផុងរ៉ាក់ បានផ្ទុះការគាំទ្រ និងចាប់អារម្មណ៍តាមរយៈបទ “រង្វាន់បានពេទ្យ” ដែលបទចម្រៀង​នេះបាន​បង្ហាញ​ពីអត្ថន័យអប់រំស៊ីជម្រៅពិសេស សម្រាប់អ្នកនិយមផឹកស្រាតាមរករង្វាន់។

ថ្វីត្បិតពេលនេះ លោក ផៃ ផុងរ៉ាក់ ហាក់បានឃ្លាតឆ្ងាយពីសិល្បៈច្រើនឆ្នាំហើយក្តី ក៏មានទស្សនិកជនមួយចំនួនបានរម្លឹកចង់ដឹងសុខទុក្ខរបស់លោក តើពេលនេះយ៉ាងណាហើយ?

តារាចម្រៀង លោក សុះ ម៉ាច បានបង្ហើបឱ្យដឹងថា បច្ចុប្បន្ន លោក ផុងរ៉ាក់ ឃ្លាតឆ្ងាយពីសិល្បៈ ដោយមករស់នៅឯខេត្តសៀមរាប។ លោក សុះ ម៉ាច បានភ្ជាប់រូបថតមួយសន្លឹកដោយខ្លឹមសារថា៖ “ជួបសប្បាយជាមួយរៀមច្បង ផៃ ផុងរ៉ាក់ អតីតជ័យលាភីលេខ១ ប្រឡងចម្រៀងឆ្នាំ១៩៨១ ដែលក្នុងសម័យនោះក៏រួមមាន លោក ណូយ វ៉ាន់ណេត និងលោក នូ សុិប ផងដែរ។ សព្វថ្ងៃ លោក ផុងរ៉ាក់ ហាក់ឃ្លាតឆ្ងាយពីសិល្បៈដោយមករស់នៅខេត្តសៀមរាប”។

តារាចម្រៀង សុះ ម៉ាច បានបន្ថែមថា លោក ផុងរ៉ាក់ ធ្លាប់បានបម្រើវិស័យសិល្បៈជាង ៤០ ឆ្នាំ ដោយមានស្នាដៃ និងប ទចម្រៀងល្បីៗជាច្រើនតែ បើនិយាយពីការផ្តល់កិត្តិយស និងគ្រឿងឥស្សរិយយសនៅពុំទាន់មាននៅឡើយទេ នេះតាមការអះអាងពីគាត់៕

អត្ថបទ៖ ចាន់រ៉ា