កសិករស្រុកបរវេលដាំដំណាំស្អំ ទទួលបានចំណូលបន្ថែមដើម្បីផ្គត់ផ្គង់គ្រួសារបន្ទាប់ពីធ្វើស្រែ

ដំណាំស្អំជាដំណាំមួយប្រភេទដែលប្រជាពលរដ្ឋភាគច្រើននិយមទទួលទានជាសម្ល ស្ងោរ ចៀន ឬធ្វើជាអន្លក់ផ្សេងៗផងដែរ។ មួយវិញទៀតដំណាំប្រភេទនេះងាយស្រួលដាំដុះមិនរើសដី មិនចំណាយដើមទុនច្រើន និងឆាប់ទទួលបានផលលឿនផងដែរ។

កំពុងឈរកាត់ត្រួយស្អំដើម្បីយកទៅលក់នៅឯផ្សារបរវេល លោក មី មុយ មានវ័យ៦៧ឆ្នាំ រស់នៅភូមិសួនស្លា ឃុំក្ដុលតាហែន ស្រុកបរវេល ខេត្តបាត់ដំបង បានលើកឡើងថា លោកបានណាំស្អំនេះក្រោយផ្ទះប្រហែលជាង​៣០០​ដើម លើដីទទឹង៥ម៉ែត្រ និងបណ្ដោយ២០ម៉ែត្រ។ លោកបន្ដថា ដំណាំស្អំត្រូវការស្រោចទឹកក្នុងមួយសប្ដាហ៍ពីរដងសម្រាប់រដូវប្រាំង ចំណែកឯរដូវវស្សាមិនចាំបាចស្រោចទឹកវាទេ។

លោកបានបន្ដថា ដំណាំស្អំចាប់ផ្ដើមដាំដំបូងប្រើរយៈពេលតែ១ខែប៉ុណ្ណោះអាចកាត់ត្រួយខ្ចីៗលក់បានហើយ បើគិតរហូតដល់ពេលនេះ ដំណាំស្អំលោកមានរយៈពេលបីឆ្នាំហើយ។ លើសពីនេះលោកបានបន្ថែមថា ដំណាំស្អំមិនពិបាកដាំទេ គេអាចទុកកម្ពស់វាត្រឹម១ម៉ែត្រជាង កុំឲ្យវាលូតខ្ពស់ពេកពិបាកកាត់។ មួយទៀតវិញ ដោយសារដំណាំស្អំនេះនៅជាប់រោងចិញ្ចឹមកណ្ដុរកូនប្រុសលោកស្រាប់ ដូច្នេះមិនហត់ដាក់ជី និងបាញ់ថ្នាំអ្វីឡើយ។

កសិកររូបនេះបានបន្ដលើកឡើងថា ដំណាំស្អំនេះ ពីរថ្ងៃកាត់ត្រួយម្តង កាត់ម្ដងបានផលពី៥គីឡូក្រាម​ ទៅ៧គីឡូក្រាម​តម្លៃចន្លោះពី ២០០០រៀល ទៅ៤០០០រៀល ក្នុង១គីឡូក្រាម ក្នុងរដូវវស្សា ចំពោះរដូវប្រាំងបានតម្លៃថ្លៃគួរសមពេលខ្លះលោតដល់១ម៉ឺនរៀលក៏មានដែរ។

ដូចនេះ កសិករមានដីទំនេរគួរងាកមកសាកដាំដំណាំស្អំនេះ គ្រាន់បានចំណូលថវិកាខ្លះដើម្បីផ្គត់ផ្គង់ជីវភាព មួយចំណែកផងដែរ។ មិនតែប៉ុណ្ណោះក៏អាចកាត់បន្ថយការចំណាយលុយទិញបន្លែផ្សេងៗបានមួយកំរិតថែមទៀតផង៕

អត្ថបទ៖ សោ និយមរ័ត្ន