ព័ត៌មានអន្ដរជាតិ

អូស្ត្រាលី និងនូវែលសេឡង់ ឲ្យប្រាក់២៨លានដុល្លារធ្វើឃ្លាំងជំនួយក្នុងប្រទេសប្រជុំកោះប៉ាស៊ីហ្វិក

បានផុស

២ years មុន

នៅ

ថ្ងៃសៅរ៍ ១០ សីហា ២០២៤

ដោយ

Chheang

អូស្ត្រាលី និងនូវែលសេឡង់ នឹងផ្តល់ប្រាក់ចំនួន ២៨,០៥លានដុល្លារសម្រាប់បណ្តាប្រទេសប្រជុំកោះប៉ាស៊ីហ្វិក ដែលលាតសន្ធឹងរាប់លានគីឡូម៉ែត្រនៃមហាសមុទ្រ ក្នុងគោលបំណងបង្កើតជាឃ្លាំងផ្ទុកជំនួយមនុស្សធម៌នៅក្នុងតំបន់ ដើម្បីជាការត្រៀមខ្លួនសម្រាប់ការកើនឡើងនៃគ្រោះមហន្តរាយអាកាសធាតុ។

តំបន់កោះប៉ាស៊ីហ្វិក កំពុងជួបប្រទះព្យុះស៊ីក្លូនកាន់តែអាក្រក់ទៅៗ ខណៈតំបន់ខ្សែក្រវាត់ភ្នំភ្លើងប៉ាស៊ីហ្វិក ឬហៅថា «Pacific Ring of Fire» មានការរញ្ជួយដីយ៉ាងសកម្មជាងមុន ដែលអាចបង្កឲ្យមានរលកយក្សស៊ូណាមិ និងបន្ទុះភ្នំភ្លើងក្រោមសមុទ្រ Hunga Tonga–Hunga Haʻapai។

បណ្ដាប្រទេសកោះប៉ាស៊ីហ្វិកជាច្រើន ស្ថិតនៅតំបន់ដាច់ស្រយាល ពិបាកក្នុងការដឹកជញ្ជូន ហើយក្រោយពេលគ្រោះមហន្តរាយម្ដងៗ ត្រូវពឹងផ្អែកលើជំនួយពីក្រៅប្រទេសដូចជា អូស្ត្រាលី នូវែលសេឡង់ សហរដ្ឋអាមេរិក និងចិន។

អូស្ត្រាលី និងនូវែលសេឡង់ បាននិយាយនៅក្នុងសេចក្តីថ្លែងការណ៍មួយថា ការបង្កើតឃ្លាំងជំនួយមនុស្សធម៌ នឹងអនុញ្ញាតឲ្យប្រទេសប្រជុំកោះប៉ាស៊ីហ្វិកចំនួន១៤អាចចាត់វិធានការសង្គ្រោះជីវិតទាន់ពេលវេលាក្នុងរយៈពេល៤៨ម៉ោងដំបូងបន្ទាប់ពីគ្រោះមហន្តរាយ។

រដ្ឋមន្ត្រីក្រសួងការបរទេសអូស្ត្រាលី លោកស្រី Penny Wong បាននិយាយថា វានឹង «ធានាឲ្យមានការគាំទ្រ និងការផ្គត់ផ្គង់ដែលអាចចូលទៅដល់បានយ៉ាងងាយស្រួលសម្រាប់សហគមន៍នៅពេលមានគ្រោះមហន្តរាយកើតឡើង»៕

ដោយ៖ ឈាង