ជីវិតកម្សាន្ដ

កៅ សីហា បួងសួងសូមឲ្យកម្មពៀរ ឬ បណ្ដាសា រលាយសាបសូន្យ រសាត់ចេញពីជីវិត សឿ សុធារ៉ា

បានផុស

២ years មុន

នៅ

ថ្ងៃពុធ ១៤ សីហា ២០២៤

ដោយ

ដោយសារមើលឃើញពីទុក្ខលំបាករបស់តារាសម្តែងស្រីធ្លាប់ទទួលបានកេរ្តិ៍ឈ្មោះល្បី និងមានប្រជាប្រិយភាពអ្នកនាង សឿ សុធារ៉ា ជួបទុក្ខផ្ទួនៗ បាត់បង់មនុស្សជាទីស្រលាញ់រហូតដល់ ៣ នាក់ ក្នុងពេល ២ ឆ្នាំ នោះ លោក កៅ សីហា ដែលជាអ្នកដឹកនាំសម្តែងល្បីឈ្មោះបានធ្វើការបួងសួងសូមឲ្យកម្មពារ ឬក៏បណ្ដាសារលាយសាបសូន្យរសាត់ចេញពីជីវិតរបស់នាងឆាប់ៗ ផងដែរ។

ជាការពិតណាស់ តារាសម្តែងអ្នកនាង សឿ សុធារ៉ា ថ្មីៗ នេះ បាននិងកំពុងតែមានទុក្ខដ៏ក្រៀមក្រំ និងសោកសៅជាទីបំផុត ខណៈបងស្រីជាទីស្រលាញ់របស់នាងម្នាក់ទៀតបានទទួលមរណភាពដ៏គួរឲ្យសោកស្ដាយជាពន់ពេក ដោយគ្មានថ្ងៃត្រឡប់វិញឡើយ។

ឃើញបែបនេះ លោក កៅ សីហា អំឡុងពេលចូលរួមបុណ្យ ៧ ថ្ងៃ របស់បងស្រីអ្នកនាង សឿ សុធារ៉ា លោកបានលើកឡើងថា «..មកចូលរួមបុណ្យគម្រប់ ៧ ថ្ងៃ សឿ សុធារី ដែលត្រូវជាបងស្រីរបស់ប្អូនស្រី សឿ សុធារ៉ា នៅវត្តវិហារត្រាញ់»។

លោក កៅ សីហា និយាយទៀតថា «បងបួងសួងសូមឲ្យជីវិតរបស់ប្អូនស្រីឆាប់រកឃើញពន្លឺថ្មី ងើបពីភក់ជ្រាំ ហើយសូមកម្មពៀរ ឬ បណ្ដាសាណាក្ដី ឲ្យរលាយសាបសូន្យ រសាត់ចេញពីជីវិតរបស់ប្អូនពីពេលនេះតទៅ ហើយពើបប្រទះតែនឹងភាពរីករាយ សុខដុម និងរកសុភមង្គលផ្លូវចិត្ត និងគូជីវិតមកឃុំគ្រងកូនៗ ទាំង ២ ឆាប់ៗ»។

គួរបញ្ជាក់ថា តារាសម្តែងអ្នកនាង សឿ សុធារ៉ា កន្លងមកនាងជាតារាស្រីម្នាក់ដែលមានភាពលេចធ្លោខ្លាំងនៅក្នុងអាជីពសិល្បៈ ពិសេសបើកត់សម្គាល់ជីវិតរស់នៅរបស់នាងក៏មានភាពហាយសូ ប្រើប្រាស់សុទ្ធរបស់ទំនើបៗ ទៀតផង។ ប៉ុន្តែក្រោយបាត់មុខមួយរយៈ ស្រាប់តែធ្លាយដំណឹង នៃការធ្លាក់ខ្លួនដុនដាប លង់ខ្លួននឹងបំណុល ខណៈគ្រួសារក៏ត្រូវបែកបាក់គ្នាទៀត៕

អត្ថបទ ៖ ចាន់រ៉ា