“ទូកទៅ កំពង់នៅ” មុនមរណភាព ផលិតករល្បីឈ្មោះ កៅ សីហា បន្សល់ទុកស្នាដៃចុងក្រោយមួយ ខណៈទើបចាក់ផ្សាយថ្មីៗ

ដ្បិតរូបឃ្លាតឆ្ងាយពីលោកនេះទៅហើយក៏ពិតមែន ប៉ុន្តែអ្នកដឹកនាំដ៏មានប្រជាប្រិយប្រចាំផលិតកម្មរស្មីហង្សមាសរូបនេះ បានបន្សល់នូវស្នាដៃដឹកនាំរឿង និង MV ចម្រៀងជាច្រើន ពិសេសរឿងរាជិនី​ភូមិគ្រឹះ​ ដែលជាស្នាដៃដឹកនាំនិងនិពន្ធដំបូងរបស់លោក នៅចុងឆ្នាំ២០២១៦ ដើមឆ្នាំ២០១៧ ក្រោមស្លាកក្រុមហ៊ុននិងទូរទស្សន៍រស្មីហង្សមាស។

ក្រៅពីអនុស្សាវរីយ៍ដឹកនាំរឿងភាគធំៗឱ្យស្ថានីយ៍ទូរទស្សន៍ដ៏ល្បីឈ្មោះមួយនេះ លោក កៅ សីហា ក៏បានបន្សល់នូវស្នាដៃដឹកនាំរឿងចុងក្រោយមួយ គឺរឿង «កញ្ញាម្ទេសខ្មាំង» ស្នាដៃនិពន្ធរបស់លោក យូ សុភា និងដឹកនាំដោយលោក កៅសីហា កាលនៅមានជីវិត។

យ៉ាងណា ជិត១ឆ្នាំនៃមរណភាពរបស់អ្នកនិពន្ធនិងដឹកនាំសម្តែងល្បីឈ្មោះរូបនេះ ស្នាដៃដឹកនាំរឿងចុងក្រោយរបស់លោក ក៏ត្រូវបានចាក់ផ្សាយលើប៉ុស្តិ៍ទូរទស្សន៍ហង្សមាស កាលពីដើមសប្តាហ៍កន្លងទៅថ្មីៗ ពោលគឺចាក់ផ្សាយកាលពីច័ន្ទ ទី១៦ ខែមិថុនានេះ។ តួយ៉ាង ភាពយន្តភាគមនោសញ្ចេតនា ស្នេហាយុវវ័យបែបកំប្លែងកាច់កុងមួយរឿងនេះ ហាក់ទទួលបានការគាំទ្រគួរកត់សម្គាល់ផងដែរ ខណៈទស្សនិកជនភាគច្រើន ក៏បានបង្ហាញការនឹករលឹក និងនៅតែគាំទ្រស្នាដៃដឹកនាំរបស់លោក ទោះបីរូបកាយកាយឃ្លាតឆ្ងាយទៅហើយក្តី។

គួររំលឹកថា មុនប្រឡូកនឹងការងារក្នុងវិស័យដឹកនាំភាពយន្តភាគ និង MV ចម្រៀង អំឡុងឆ្នាំ២០២០ លោក កៅ សីហា ក៏បានចុះឈ្មោះចូលរៀនផ្នែកប្រលោមលោកនៅសមាគមអ្នកនិពន្ធខ្មែរ។ ក្រោយមកក៏ក្លាយជាអ្នកការសែតឱ្យទស្សនាវតី្តមួយ និងក្លាយជានិពន្ធនាយកផងដែរ។ ប៉ុន្តែកំឡុងពេលនោះ លោកក៏ចាប់អារម្មណ៍លើវិស័យតែងនិពន្ធ និងចាប់ផ្តើមនិពន្ធរឿងប្រលោមលោកជាបណ្តើរៗ។

ក្រោយមក លោក កៅ សីហា ក៏បានបោះបង់អាជីពជាអ្នកការសែត ចាប់ក្តីស្រមៃក្នុងមានជាអ្នកដឹកនាំភាពយន្តចម្រៀងឱ្យផលិតកម្មធំក្នុងស្រុក គឺរស្មីហង្សមាស។ ខណៈស្នាដៃដឹកនាំនិងនិពន្ធរឿងដំបូងរបស់លោកគឺ “រាជនីភូមិគ្រឹះ” ដែលផលិតនៅចុងឆ្នាំ២០២១៦ ដល់ដើមឆ្នាំ២០១៧ ។

តាមរយៈភាពយន្តចម្រៀងជាច្រើនបទ និងរឿងដែលលោកបានដឹកនាំសម្តែងភាគច្រើន សុទ្ធតែទទួលបានការចាប់អារម្មណ៍ និងគាំទ្រពីសំណាក់ទស្សនិកជន ក្នុងកិច្ចការជាអ្នកដឹកនាំផលិតវិញ ក្រុមការងារដែលធ្លាប់ធ្វើការជាមួយលោក សុទ្ធតែអះអាងថា លោកជាមនុស្សខំប្រឹងណាស់និងមិនសូវបានសម្រាកគ្រប់គ្រាន់ឡើយ។

ក្តីស្រលាញ់ និងការខំប្រឹង បានធ្វើឱ្យកេរ្តិ៍ឈ្មោះរបស់លោកត្រូវបានមហាជនស្គាល់ ប៉ុន្តែជីវិតរបស់លោកលើវិថីនេះ បែរជាមិនអាចបន្តវែងឆ្ងាយបាន ព្រោះជំងឺដាច់សរសៃឈាមខួរក្បាលធ្ងន់ធ្ងរមិនអាចជួយសង្គ្រោះជីវិតបាន ក៏ត្រូវឃ្លាតឆ្ងាយពីទស្សនិកជនកាលពីថ្ងៃទី២០ ខែតុលា ឆ្នាំ២០២៤ កន្លងទៅ បន្សល់ត្រឹមក្តីអាឡោះអាល័យជាទីបំផុត៕