កម្ពុជា-អូស្រ្តាលីសហការគ្នាក្នុងការលើកកម្ពស់ភាពប្រកួតប្រជែងវិស័យកម្មន្តសាលនៅក្នុងវិស័យ SMEs

ជាកិច្ចខិតខំប្រឹងប្រែងក្នុងការជម្រុញនូវឧត្តមភាពនៃវិស័យកម្មន្តសាល ឧស្សាហកម្មប្រតីគមន៍ និង ការអភិវឌ្ឍតំបន់ប្រមូលផ្តុំសហគ្រាសធុនតូច និងមធ្យម (SMEs) ​នៅកម្ពុជាក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) និងស្ថានទូតអូស្ត្រាលីប្រចាំប្រទេសកម្ពុជាបានរួមសហការគ្នាក្នុងការចូលរួមលើកកម្ពស់វិស័យឱ្យកាន់តែមានភាពប្រកួតប្រជែង។

​កាលពីថ្ងៃទី១៤ខែសីហាម្សិលមិញនេះ ជាមួយកិច្ចសហកានេះត្រូវបានធ្វើឡើងតាមរយៈ កម្មវិធី CAPRED បាន​រៀបចំសិក្ខាសាលាស្តីពី “ភាពប្រកួតប្រជែងវិស័យកម្មន្តសាល ឧស្សាហកម្មប្រតីគមន៍ និង ការអភិវឌ្ឍតំបន់ប្រមូលផ្តុំសហគ្រាសធុនតូច និងមធ្យម (SMEs) ក្នុងគោលដៅលើកកម្ពស់ភាពប្រកួតប្រជែងវិស័យកម្មន្តសាល របស់កម្ពុជា។

ឧស្សាហកម្មផ្នែកកម្មន្តសាលមានការវិវត្តរីកចម្រើនគួរឱ្យកត់សម្គាល់នៅកម្ពុជា ប៉ុន្តែវិស័យនេះត្រូវបានមើល ឃើញថានៅបន្តពឹងផ្អែកខ្លាំងលើការនាំចូលវត្ថុធាតុដើម ដែលទាមទារការអភិវឌ្ឍបន្ថែម ដើម្បីបង្កើនភាពប្រកួតប្រជែងជា សាកល។

ដើម្បីដោះស្រាយបញ្ហាប្រឈមទាំងនេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បាននិង កំពុងប្រើប្រាស់លទ្ធភាពរបស់ខ្លួន រួមនឹងជំនាញរបស់កម្មវិធី CAPRED ដើម្បីរៀបចំបង្កើតឧបករណ៍ អភិវឌ្ឍ គោលនយោបាយ និងកម្មវិធីដែលមានប្រសិទ្ធភាព ចាំបាច់សម្រាប់ការធ្វើពិពិធកម្មវិស័យកម្មន្តសាល ជំរុញខ្សែច្រវាក់ ផ្គត់ផ្គង់ក្នុងស្រុក និងលើកកម្ពស់ការធ្វើសមាហរណកម្មសហគ្រាសធុនតូច និងមធ្យមទៅក្នុងខ្សែច្រវាក់តម្លៃសាកល។

លោក ហែម វណ្ណឌី រដ្ឋមន្ត្រី MISTI បានលើកឡើងថា វិស័យកម្មន្តសាលរបស់កម្ពុជាមានសក្តានុពលធំធេង សម្រាប់ការលើកកម្ពស់កំណើនសេដ្ឋកិច្ច និងការបង្កើតការងារ។

លោកថា៖«សិក្ខាសាលានេះមានគោលបំណងប្រែក្លាយចំណេះដឹង និងជំនាញ ទៅជាយុទ្ធសាស្ត្រដែលអាចអនុវត្តបាន ក្នុងគោលដៅលើកកម្ពស់វិស័យកម្មន្តសាលកម្ពុជាឱ្យឈានឆ្ពោះទៅ ដំណាក់កាលថ្មីនៃការអភិវឌ្ឍ»។

លោក អនជ្រើស សាប្រាក ការជាវីស្ថានទូតអូស្ត្រាលីប្រចាំនៅកម្ពុជា ក៏បានមានប្រសាសន៍ថា​ប្រទេសអូស្ត្រាលីប្តេជ្ញា ចិត្តគាំទ្រដល់កំណើនសេដ្ឋកិច្ច និងការធ្វើពិពិធកម្មរបស់កម្ពុជា។ លោកបានថ្លែងបន្តទៀតថា៖«តាមរយៈការពង្រឹងភាពប្រកួតប្រជែងវិស័យកម្មន្តសាល យើងកំពុងបង្កើតឱកាសសម្រាប់អាជីវកម្មក្នុងស្រុកនានាឱ្យរីកចម្រើន និងសម្រាប់វិបុលភាពរបស់ប្រជាជនកម្ពុជា»។

គិតរហូតមកដល់បច្ចុប្បន្ន ​​កម្ពុជាមានសហគ្រាសធុនមីក្រូ តូច និងមធ្យមចំនួន ៤៤.៥៥០ មូលដ្ឋាន ដែលបានចុះបញ្ជីជាផ្លូវការ​។   ជាមួយគ្នានេះដែរ សហគ្រាសធុនមីក្រូ តូច និងមធ្យម មានប្រមាណ៩០% លើមូលដ្ឋានផលិតកម្ម អាជីវកម្មសរុប និងបានផ្តល់ការងារពី ៦០% ទៅ៧០% និងរួមចំណែក ៥០% នៃផលិតផលក្នុងស្រុកសរុបនៅទូទាំងពិភពលោក៕