ពលរដ្ឋប្ដេជ្ញាមិនចូលរួមជាមួយក្រុមជ្រុលនិយម ខណៈផែនការពួកគេត្រូវបានបរាជ័យ

ប្រជាពលរដ្ឋរស់នៅរាជធានីភ្នំពេញ បង្ហាញគោលជំហរមិនចូលរួមជាមួយសកម្មភាពបះបោរទាំងឡាយណា មានចេតនាទុច្ចរិត បង្កភាពវឹកវរដល់សង្គមជាតិ ខណៈប្រទេសជាតិកំពុងស្ថិតក្នុងសម័យសុខសន្តិភាព។

ពលរដ្ឋលើកឡើងថា សកម្មភាពនៃការញុះញង់របស់ជនអគិតិ និងក្រុមជ្រុលនិយមក្រៅច្បាប់មួយចំនួន វាពុំមែនជាការនាំយកភាពរីកចម្រើនមកឱ្យកម្ពុជានោះឡើយ ផ្ទុយទៅវិញវាជាចេតនាទុច្ចរិតចង់ឱ្យខ្មែរឈ្លោះគ្នាឯងជាមួយជាតិសាសន៍ឯង និងនាំឱ្យកម្ពុជាអាចនឹងធ្លាក់ចូលទៅក្នុងភ្លក់ភ្លើងសង្គ្រាម។

ពលរដ្ឋបន្តទៀតថា សម័យកាលបច្ចុប្បន្ន ក្រោមការដឹកនាំរាជរដ្ឋាភិបាលដោយសម្តេចធិបតី ហ៊ុន ម៉ាណែត គឺប្រទេសជាតិ មានសុខសន្តិភាពពេញលេញហើយ ដូច្នោះហើយក្នុងនាមពលរដ្ឋ ត្រូវបន្តចូលថែរក្សាសន្តិភាពឱ្យបានគង់វង្សទាំងអស់គ្នាផងដែរ។

គួរបញ្ជាក់ថា ផែនការណ៍របស់ក្រុមជ្រុលនិយមក្រៅច្បាប់ ដែលបានញុះញង់ពលរដ្ឋកម្ពុជា ប៉ងធ្វើកុបកម្មផ្តួលរំលំរដ្ឋាភិបាលស្របច្បាប់ កាលពីថ្ងៃទី១៨ ខែសីហា ឆ្នាំ២០២៤ គឺមិនអាចកើតឡើងបាននោះឡើយ ព្រោះមិនមានពលរដ្ឋចូលរួមជាមួយអំពើទុច្ចរិតនេះឡើយ ខណៈមេខ្លោងបះបោរមួយចំនួន ត្រូវសមត្ថកិច្ចបង្ក្រាប។

បើទោះបីជាស្ថានភាពទូទៅក្នុងសង្គម មានភាពស្ងប់ស្ងាត់ល្អក៏ប្រសើរក៏ដោយ កម្លាំងអាជ្ញាធរមានសមត្ថកិច្ចនៅតាមមូលដ្ឋាននីមួយៗ នៅតែបន្តបង្កើនការយកចិត្តទុកដាក់ ក្នុងការការពារសន្តិសុខសុវត្ថិភាពជូនពលរដ្ឋដដែល ពិសេសគឺប្រឆាំង និងបង្ក្រាបដាច់ខាត លើក្រុមឧទ្ទាមក្រៅច្បាប់ទាំងឡាយណា ដែលមានបំណងរៀបចំផែនការណ៍បះបោរផ្តួលរំលំរដ្ឋាភិបាលស្របច្បាប់៕

អត្ថបទ៖ សុភា