តួឯកថៃ Weir Sukollawat នាំប្រពន្ធភ្លក់ម្ហូបខ្មែរ ភ្ញាក់នឹងរសជាតិ សរសើរមិនដាច់ពីមាត់

កាលពីថ្មីៗនេះ តារាសម្ដែងប្រុស ប្រចាំប៉ុស្តិ៍លេខ៧​ ដ៏ល្បីល្បាញនៃប្រទេសថៃ លោក Weir Sukollawat បាននាំប្រពន្ធ និង កូនស្រី ធ្វើដំណើរមកកម្សាន្តនៅខេត្តសៀមរាប ទឹកដីអង្គរ ហើយលោកក៏បានថតជាវីឌេអូដំណើរកម្សាន្តរបស់លោក បង្ហោះទៅក្នុងឆានែល យូធូប Weircation ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ នៅក្នុងវីដេអូមួយរបស់ Weir បានធ្វើដំណើរទៅទទួលទានអាហារថ្ងៃត្រង់នៅភូមិព្រះដាក់ ដែលជាទីកន្លែងអាហារដ៏ល្បីល្បាញនៅខេត្តសៀមរាប។ អ្វីដែលគួរឲ្យចាប់អារម្មណ៍ទៀតនោះ​ តារាប្រុសរូបនេះ បានអង្គុយសរសើរម្ហូបគ្រប់មុខរបស់ខ្មែរយើង ព្រមទាំងបង្អួតទៅកាន់កាមេរ៉ា សរសើរមិនដាច់ពីមាត់ថា ឆ្ងាញ់ជាប់ចិត្ត។

មិនតែប៉ុណ្ណោះ ភរិយារបស់លោក ក៏បានបង្វែកាមេរ៉ា មកនិយាយសរសើរ លើកមេដៃ បង្ហាញថា ម្ហូបរបស់ខ្មែរ ឆ្ងាញ់គ្រប់មុខផងដែរ។ នៅក្នុងនោះ Weir បានកម្មង់ម្ហូបនៅក្នុងភោជនីយដ្ឋានមួយនៅក្នុងភូមិព្រះដាក់ ដែលមានដូចជា ប្រហុកអាំងលើជ្រុញ មាន់អាំង និងម្ហូបមួយមុខទៀត។

តាមរយៈវីឌេអូមួយនេះ​ បានបង្ហាញថា តួឯកប្រុសរូបនេះ មានការស្រឡាញ់ជាប់ចិត្តនឹងម្ហូបខ្មែរជាខ្លាំង មិនត្រឹមតែម្ហូបនោះទេ លោកក៏បានបង្ហាញនូវការសប្បាយរីករាយនៅក្នុងដំណើរកម្សាន្តមកស្រុកខ្មែរផងដែរ។ បើក្រឡេកទៅមើលជីវិតរបស់ Weir វិញ លោកហាក់ដូចជាមានក្ដីសុខ និង សុភមង្គលជាមួយនឹងគ្រួសារតូចជាខ្លាំង​ ដោយលោកប្រើប្រាស់ជីវិតយ៉ាងសាមញ្ញ ពិសេស លោកតែងតែចំណាយពេលជាមួយនឹងភរិយា និង កូនស្រីសំណព្វចិត្ត៕

ប្រភព៖ Weircation