អាកាសយានដ្ឋានអន្តរជាតិតេជោនឹងផ្លាស់ប្តូរការគិតរបស់ភ្ញៀវទេសចរអង់គ្លេស

ប្រទេសកម្ពុជាកំពុងតែសាងសង់នូវអាកាសយានដ្ឋានថ្មីដ៏ធំនិងទំនើបមួយ​ ប៉ុន្តែប្រទេសនេះតែងតែត្រូវបានមើលរំលងដោយភ្ញៀវទេសចរ​អង់គ្លេស ដោយសារតែពួកគេជ្រើសរើសប្រទេសជិតខាងកម្ពុជាសម្រាប់ថ្ងៃឈប់សម្រាករយៈពេលយូរ។ នេះបើយោងតាម​សារព័ត៌មាន The Sun របស់ចក្រភពអង់គ្លេសចុះផ្សាយនៅថ្ងៃទី២៨ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​សារព័ត៌មាន The Sun បានលើកឡើងថា​ ប្រទេសកម្ពុជាតែងតែត្រូវបានភ្ញៀវទេសចរពីចក្រភពអង់គ្លេសបំភ្លេចចោល ដោយតែងតែជ្រើសរើសយកការទស្សនាទៅកាន់ប្រទេសថៃនៅក្បែរនោះសម្រាប់ថ្ងៃឈប់សម្រាករយៈពេលវែងរបស់ពួកគេជំនួសវិញ​។

«ប៉ុន្តែបញ្ហានេះនឹងត្រូវបានផ្លាស់ប្តូរនាពេលឆាប់នេះ ដោយសារតែការដាក់ឱ្យដំណើការនូវអាកាសយានដ្ឋានអន្តរជាតិដ៏ធំមួយនាពេលដ៏ខ្លីខាងមុខនេះ»។ នេះបើយោងតាម The Sun។

​​​ឯកអគ្គរាជទូតអង់គ្លេស លោក Dominic Williams បានសរសេរនៅលើបណ្តាញសង្គមផ្លូវការរបស់ខ្លួននៅព្រឹកថ្ងៃទី២៩នេះថា៖« ការផ្សព្វផ្សាយដ៏អស្ចារ្យនៅក្នុងសារព័ត៌មានចក្រភពអង់គ្លេស សម្រាប់ប្រទេសកម្ពុជា និងសម្រាប់អាកាសយានដ្ឋានភ្នំពេញថ្មី ដែលរចនាដោយស្ថាបត្យករជនជាតិអង់គ្លេស Foster+Partners!»។

បើយោងតាមសារព័ត៌មាន The Sun អាកាសយានដ្ឋានអន្តរជាតិតេជោតាខ្មៅដែលមានទីតាំងស្ថិតនៅរាជធានីភ្នំពេញប្រហែល ១២ ម៉ាយពីទីប្រជុំជនក្រុង។

​អាកាសយានដ្ឋានអន្តរជាតិតេជោ បានចាប់ផ្តើមដំណើរការសាងសង់នៅឆ្នាំ២០១៩ ​នៅលើ​ទំហំដី ២ ៦០០​ហិកតា ​ដោយប្រើទឹកប្រាក់វិនិយោគចំនួន ១ ៥០០ លានដុល្លារ សាងសង់ដោយក្រុមហ៊ុន OCIC ដែលមាន​​ភូមិសាស្ត្រ​នៅ​ក្នុង​ខេត្តកណ្តាល​ជាប់​ខេត្តតាកែវ និង​មានចម្ងាយ​ប្រមាណ ២០ គីឡូពីរាជធានីភ្នំពេញ។

គម្រោងសាងសង់អាកាសយានដ្ឋានអន្តរជាតិតេជោមាន៣ដំណាក់កាល គឺដំណាក់កាលទី១ សាងសង់រួចរាល់នៅឆ្នាំ ២០២៤ អាចទទួលអ្នកដំណើរ ១៣ លាននាក់ក្នុងមួយឆ្នាំ ដំណាក់កាលទី២ នឹងបញ្ចប់នៅឆ្នាំ ២០៣០ អាចទទួលបានអ្នកដំណើរ ៣០ លាននាក់ក្នុងមួយឆ្នាំ និងដំណាក់កាលចុងក្រោយ នឹងបញ្ចប់នៅឆ្នាំ ២០៥០ អាចនឹងទទួលបានអ្នកដំណើររហូតដល់ ៥០ លាននាក់ក្នុងមួយឆ្នាំ៕

គិតត្រឹមថ្ងៃទី ០៦ ខែមិថុនា ​ឆ្នាំ ២០២៤ ​គម្រោងសាងសង់អាកាសយានដ្ឋានអន្តរជាតិតេជោ (TIA) សម្រេចបានការងារសាងសង់ជាង ​៧៥% និងចំណាយថវិកាអស់ជាង ១​ ១០០ លានដុល្លារ​អាមេរិក។ ​

ក្នុងពេលចុះពិនិត្យវឌ្ឍនភាពគម្រោងព្រលានយន្តហោះអន្តរជាតិតេជោកាលពីខែមិថុនា ​លោកឧកញ៉ា ឆារស៍ ​វ៉ាន់ ​អភិបាលក្រុមហ៊ុន Cambodia Airport Investment Co., Ltd និងជាអភិបាលក្រុមហ៊ុនកាណាឌីយ៉ាគ្រុបបានថ្លែងថា ​ដំណើរការសាងសង់ព្រលានយន្តហោះ​​សម្រេចបាន ៧៥% ​ពោលគឺស្របទៅតាម​ផែនការ នឹងគ្រោងដាក់ឱ្យដំណើរការហោះ​ហើរ​​នៅ​ដើម​ឆ្នាំ ២០២៥ ខាងមុខ។​

បច្ចុប្បន្នការសងសង់អាកាសយានដ្ឋានអន្តរជាតិតេជោជំហានទី១នេះ ​សម្រេចបានរួចរាល់មានដូចជា ស្ថានីយអ្នកដំណើរ ​ផ្លូវរត់ ផ្លូវបរយន្តហោះ និងផ្លូវតាក់ស៊ីក៏រួចរាល់ដែរ។​