រដ្ឋមន្ត្រីកិច្ចការព្រំដែន៖ ការបោះបង្គោលព្រំដែន គឺផ្អែកលើផែនទីដែលបារាំងបន្សល់ទុក ច្បាប់អន្តរជាតិ និងពលរដ្ឋ

រដ្ឋមន្រ្តីទទួលបន្ទុករដ្ឋលេខាធិការដ្ឋានកិច្ចការព្រំដែន  លោក ឡាំ ជា អះអាងថា ការបោះបង្គោលព្រំដែននៅកម្ពុជាជាមួយប្រទេសជិតខាង គឺផ្អែកលើផែនទីដែលបានបន្សល់ទុកពីសម័យអាណានិគមបារាំង ច្បាប់អន្តរជាតិ និងពលរដ្ឋ។ លោក ឡាំ ជា លើកឡើងដូច្នេះ ក្នុងពេលផ្ដល់បទសម្ភាសជាមួយទូរទស្សន៍ជាតិកម្ពុជា(ទ.ទ.ក) នាថ្ងៃទី៣១ ខែសីហា​ ឆ្នាំ២០២៤ នេះ។

បទសម្ភាសន៍មួយនេះ​ ធ្វើឡើងបន្ទាប់ពីទណ្ឌិតសម រង្ស៊ី បានចេញមកចោទប្រកាន់ថា បង្គោលព្រំដែនកម្ពុជាដែលបានបោះរួចជាមួយភាគីវៀតណាមចេះដើរ ចេះរំកិល ដែលការលើកឡើងរបស់ទណ្ឌិត សម រង្ស៊ី គឺផ្អែកលើ Google Map។

នៅក្នុងបទសម្ភាសលោករដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែនលើកឡើងដូច្នេះ៖«កិច្ចការងារព្រំដែន ដែលរដ្ឋលេខាដ្ឋានទទួលបន្ទុកកិច្ចការព្រំដែនទទួលបន្តកសាងកិច្ចការដ៏សំខាន់​ ដែលមានសារៈប្រយោជន៍បំផុតសម្រាប់ជាតិនេះ គឺក្នុងការងារកំណត់ព្រំដែននេះ យើងផ្អែកទៅលើគោលការណ៍ធំ៣។ ទី១ផ្អែកទៅលើផែនទីដែលបន្សល់ទុកពីអាណានិគមបារាំង ដែលជាផែនទីគោល យើងយកធ្វើជាមូលដ្ឋាន គឺជាផែនទីដែលយើងកំណត់ថាជាមរតកខ្សែព្រំដែនមិនកែប្រែ។ ទី២ គឺយើងផ្អែកទៅលើគោលការណ៍ច្បាប់អន្តរជាតិ និងឧត្ដមានុវត្តន៍អន្តរជាតិ និងទី៣ យើងផ្អែកទៅលើការកាន់កាប់រស់នៅជាច្រើនជំនាន់របស់ប្រជាពលរដ្ឋ»។

តាមលោក ឡាំ ជា ការពន្យល់របស់បុគ្គលមួយចំនួនដែលផ្អែកលើផែនទីពីGoogle Map គឺមិនអាចយកជាការបានឡើយ ព្រោះកិច្ចការងារបោះបង្គោលព្រំដែន ដែលកម្ពុជា បានធ្វើកន្លងមកជាមួយ​ប្រទេសជិតខាងដូចជា ថៃ ឡាវ និងវៀតណាម គឺជំនាញការ​មិនអាចយកផែនទីណា ដែលក្រៅពីផែនទីដែលបន្សល់ទុកពីក្រុមភូមិសាស្ត្រឥណ្ឌូចិន បារាំង ដែលបានបោះពុម្ពជាផ្លូវការណ៍ ហើយបានកំណត់ព្រំដែនរដ្ឋកម្ពុជាជាមួយវៀតណាម កម្ពុជាជាមួយឡាវ និងកម្ពុជាជាមួយថៃ៕