ព័ត៌មានជាតិ

កម្ពុជានិងថៃឯកភាពគ្នារំកិលព្រំដែនលេខ៥៨និង៥៩ទៅទីតាំងដើមពិតប្រាកដវិញ

បានផុស

៨ ខែ មុន

នៅ

ថ្ងៃអាទិត្យ ៣០ វិច្ឆិកា ២០២៥

ដោយ

អគ្គនាយកបច្ចេកទេសនៃរដ្ឋលេខាធិការដ្ឋានកិច្ចការព្រំដែនលោក ស្រ៊ឺ បូរ៉ា បានបញ្ជាក់ថានាពេលខាងមុខកម្ពុជានិងថៃនឹងរំកិលព្រំដែនលេខ៥៨ និង៥៩ នៅព្រំដែនកម្ពុជា-ថៃ ក្នុងស្រុកកំរៀង ខេត្តបាត់ដំបង ទៅកាន់ទីតាំងដើមពិតប្រាកដវិញក្រោយរកឃើញថាបង្គោលទាំងពីរនេះមិនស្ថិតនៅទីតាំងដើមនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចពិភាក្សាពិសេសស្ដីពីការបោះបង្គោលព្រំដែនបណ្ដោះអាសន្នដែលចេញផ្សាយនៅចុងសប្ដាហ៍នេះលោក ស៊្រឺ បូរ៉ា មិនបានបញ្ជាក់ពីមូលហេតុអ្វីដែលបង្គោលទាំងពីរនេះត្រូវបានបោះខុសទីតាំងដើមនោះទេក្នុងពេលដែលរកឃើញក្នុងឆ្នាំ២០០៨នោះ។ លោកបញ្ជាក់ថាបង្កោលលេខ៥៨ និង៥៩ ដែលកំពុងមានបច្ចុប្បន្នគឺមិនស្ថិតក្នុងទីតាំងដើមទេ។

លោកថា៖ «ភាគីទាំងពីរបានឯកភាពដាំជាបង្កោលបេតុងរាងធំដែរចំនួន២បង្គោលលើដីជាក់ស្ដែងចំទីតាំងដើមពិតប្រាកដមិនមែននៅទីតាំងដែលមានបង្គោលរាល់ថ្ងៃលេខ៥៨ និង៥៩ទេបាទ។ ហើយនាថ្ងៃខាងមុខនេះគឺយើងឯកភាពគ្នារំកិលទីតាំងដែលមានបង្គោលបច្ចុប្បន្នហ្នឹងប៉ុន្ដែមិនស្ថិតចំទីតាំងដើមដើម្បីយកមកដាក់ចំទីតាំងដែលយើងឯកភាពគ្នាឡើងវិញ»។

លោកបញ្ជាក់ថាការពិនិតបង្គោលព្រំដែននេះគឺធ្វើឡើងដោយយោងតាមឯកសារបារាំង-សៀម ឆ្នាំ១៩០៤ ឆ្នាំ១៩០៧ ព្រមទាំងកំណត់ហេតុបោះបង្គោលព្រំដែនឆ្នាំ១៩០៨-១៩០៩ និងឆ្នាំ១៩១៩-១៩២០ ដែលជាឯកសារអន្តរជាតិទទួលស្គាល់ជាផ្លូវការ។

កម្ពុជានិងថៃ បានសម្រេចក្នុងការបោះបង្គោលព្រំដែនបណ្ដោះអាសន្នលេខ ៥២ ដល់៥៩ លើផ្ទៃដីប្រវែងជាង៨គីឡូម៉ែត្រ នៅខេត្តបាត់ដំបង កម្ពុជា ជាប់ខេត្តចន្ទបុរី ប្រទេសថៃ កាលពីថ្ងៃទី៨ ខែវិច្ឆិកាកន្លងទៅ។ គិតរហូតដល់ថ្ងៃទី២៦ ខែវិច្ឆិកា ក្រុមការងារបានបោះបង្គោលបណ្ដោះអាសន្នបាន១៦៦បង្គោលរួចហើយ៕

អត្ថបទដោយ ហ៊ុន សិរីវឌ្ឍន៍