អ្នកលក់អនឡាញ Madam da ត្រូវមហាជនរិះគន់យ៉ាងខ្លាំង ក្រោយជិះម៉ូតូមិនពាក់មួក ប្រសេចប្រសាចពេញទីក្រុង

ផ្ទុះការរិះគន់យ៉ាងខ្លាំងចំពោះក្រុមអ្នកលក់អនឡាយល្បីឈ្មោះដែលនាំគ្នាជិះម៉ូតូក្នុងភូមិសាស្ត្ររាជធានីភ្នំពេញដោយមិនគោរពច្បាប់ចរាចរណ៍ មិនពាក់មួកសុវត្ថិភាព ថតរូបបង្ហោះលើគណនីហ្វេសប៊ុកមួយឈ្មោះ Chumrain Madam da។

តាមរយៈវីដេអូឃ្លីបដែលបានបង្ហោះនៅក្នុងបណ្ដាញសង្គមហ្វេសប៊ុកមួយនេះ កាលពីយប់ថ្ងៃទី៦ ខែកញ្ញា ឆ្នាំ២០២៤ បានបង្ហាញពីសកម្មភាពអ្នកទាំងនោះ នាំគ្នាជិះម៉ូតូរេចុះឡើងពេញផ្លូវថតបង្ហោះ ដោយគ្មានពាក់មួកសុវត្ថិភាពធ្វើឱ្យមហាជនទោះការរិះគន់យ៉ាងខ្លាំង។

មានការបញ្ចេញមតិជាច្រើននៅក្នុងវីដេអូឃ្លីបដែលបានបង្ហោះដោយមិនពាក់មួកសុវត្ថិភាព និងមានការឌឺដងផ្លែផ្ការវាងម្ចាស់វីដេអូឃ្លីប និងមហាជនផងដែរ ដោយលើកឡើងថា «ចាំមើល បងៗ សមត្ថកិច្ចហ៊ានចាប់ ពួកអភិជនដែរឬអត់?»។ ចំណែកអ្នកខ្លះទៀតបានខមិនថា «ល្បីក្នុងសង្គមដែរ តែទង្វើដែលធ្វើបែជាបំពុលសង្គម ចេះច្បាប់ចរាចរណ៍អត់? មនុស្សដេកលក់ពិតប្រកដមិនពិបាកដាស់ទេ តែអាអ្នកធ្វើពត់ជាដេកលក់បានវាពិបាកដាស់ អ្នកមានគិតទេពេលក្មេងៗវាយកតម្រាបតាម ព្រោះពួកគេឃើញទង្វើដែលបង្ហោះ អ្នកល្បីមិនខ្វះទេ ក្មេងដែលវាមិនចេះគិតហើយចង់ធ្វើឱ្យដូចនោះ»។

យ៉ាងណាមិញ មហាជនក៏បានសំណូមពរឱ្យកម្លាំងមានសមត្ថកិច្ចចាត់វិធានការតាមផ្លូវច្បាប់ចំពោះក្រុមអ្នកលក់អនឡាញទាំងនេះ ដែលបើកបរដោយមិនគោរពច្បាប់ចរាចរណ៍ និងមិនពាក់មួកសុវត្ថិភាព ក្នុងពេលបើកបរ៕

 អត្ថបទ ៖ ម៉េង