សប្ដាហ៍ក្រោយ រដ្ឋលេខាធិការដ្ឋានកិច្ចការព្រំដែន នឹងធ្វើបទបង្ហាញនៅឧត្តមក្រុមប្រឹក្សាពិគ្រោះ និងផ្តល់យោបល់ ពីការងារព្រំដែន

ឆ្លើយតបទៅនឹងសំណើរបស់ឧត្តមក្រុមប្រឹក្សាពិគ្រោះ និងផ្តល់យោបល់, រដ្ឋលេខាធិការដ្ឋានកិច្ចការព្រំដែន ដឹកនាំដោយលោករដ្ឋមន្ត្រី ឡាំ ជា នឹងធ្វើបទបង្ហាញអំពីការងារព្រំដែនរបស់កម្ពុជាជាមួយនឹងប្រទេសជិតខាង នាសប្ដាហ៍ក្រោយ។

តាមលិខិតរបស់លោក ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន ផ្ញើជូនលោក ឈឹម ផលរវុណ រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកជាប្រធានលេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់ បានឱ្យដឹងដូច្នេះថា៖ «ឆ្លើយតបទៅនឹងសំណើរបស់ឧត្តមក្រុមប្រឹក្សាពិគ្រោះ និងផ្តល់យោបល់ រដ្ឋលេខាធិការដ្ឋានកិច្ចការព្រំដែន ឯកភាពធ្វើបទបង្ហាញអំពីព្រំដែននៃព្រះរាជាណាចក្រកម្ពុជាជាមួយប្រទេសវៀតណាម ឡាវ និងថៃ នាថ្ងៃទី១៨ ខែកញ្ញា ឆ្នាំ២០២៤ វេលាម៉ោង ៨:៣០នាទីព្រឹក»។

ការចូលទៅបំភ្លឺជូនបណ្ដាគណបក្សនយោបាយក្នុងក្របខណ្ឌឧត្តមក្រុមប្រឹក្សាពិគ្រោះ និងផ្ដល់យោបល់នេះ ក្រោយមានការឯកភាពពីសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា តាមរយៈចំណារលើលិខិតស្នើរបស់លោកស្រី ពោធិតី សាវត្ថី ប្រធានប្រតិភូគណបក្សធម្មាធិបតេយ្យ នៃឧត្តមក្រុមប្រឹក្សាពិគ្រោះ និងផ្តល់យោបល់។

ថ្លែងប្រាប់«កម្ពុជាថ្មី»នៅរសៀលថ្ងៃទី១០ ខែកញ្ញានេះ លោក ឈឹម ផលវរុណ ប្រធានលេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់ បានបង្ហាញក្ដីរំពឹងថា ក្រោយការពន្យល់បកស្រាយរបស់រដ្ឋលេខាធិការដ្ឋានកិច្ចការព្រំដែន ដែលជាស្ថាប័នជំនាញលើការងារព្រំដែន នឹងផ្ដល់ជាមូលដ្ឋានយល់ដឹងកាន់តែច្បាស់ និងជាក់លាក់បន្ថែមទៀតដល់បណ្ដាគណបក្សក្នុងក្របខណ្ឌឧត្តមក្រុមប្រឹក្សាពិគ្រោះ និងផ្ដល់យោបល់ ទៅលើតួនាទីភារកិច្ចរបស់រដ្ឋលេខាធិការដ្ឋានកិច្ចការព្រំដែន ពិសេសដំណើរការនៃការបោះបង្គោលព្រំដែនរវាងកម្ពុជាជាមួយនឹងប្រទេសជិតខាង។

លោក ឈឹម ផលវរុណ បន្ត ការធ្វើបទបង្ហាញពីស្ថាប័នជំនាញរបស់រាជរដ្ឋាភិបាល ក៏នឹងផ្ដល់ជាភាពជឿជាក់ដ៏រឹងមាំ ថែមទៀតពីសំណាក់បណ្ដាគណបក្សក្នុងក្របខណ្ឌឧត្តមក្រុមប្រឹក្សាពិគ្រោះ និងផ្ដល់យោបល់ ចំពោះកិច្ចខិតខំរបស់រាជរដ្ឋាភិបាលកម្ពុជាទៅលើកិច្ចការពារព្រំដែន អធិបតេយ្យភាព បូរណភាពទឹកដី ពិសេសដំណើរបោះបង្គោលព្រំដែន៕