ព័ត៌មានអន្ដរជាតិ

ខណៈបំណុលជាតិលើស១២២% ការយកពន្ធក្លាយជាចំណុចក្តៅក្នុងនយោបាយអាមេរិក

បានផុស

២ years មុន

នៅ

ថ្ងៃសុក្រ ១៣ កញ្ញា ២០២៤

ដោយ

ឆ្លងកាត់ការជជែកដេញដោលសាធារណៈលើកដំបូងរបស់បេក្ខជនប្រធានាធីបតីនៃគណបក្សសាធារណៈរដ្ឋតំណាងដោយលោក ដូណាល់ ត្រាំ និងគណបក្សប្រជាធិបតេយ្យតំណាងដោយ លោកស្រី កាម៉ាឡា ហារីស កំពុងកាន់តំណែងអនុប្រធានាធិបតីស្រាប់នោះ បេក្ខជនទាំងពីរបង្ហាញពីរបៀបដោះស្រាយបញ្ហាសង្គមផ្សេងគ្នា តាមរយៈការកៀរគចំណូលជាតិនិងការចំណាយសាធារណៈ ស្របពេលពលរដ្ឋអាមេរិកម្នាក់ជំពាក់បំណុលជាង១០ម៉ឺនដុល្លារ។

លោក ដូណាល់ ត្រាំ និង លោកស្រី កាម៉ាឡា ហារីស ក្នុងកម្មវិធីជជែកដេញដោល។

នៅក្នុងការជជែកដេញដោលកាលពីថ្ងៃទី១០ខែកញ្ញា បេក្ខជនប្រធានាធិបតីទាំងពីបានបង្ហាញគំនិតខ្វែងគ្នាយ៉ាងខ្លាំងលើមូលដ្ឋាននៃការគិតពន្ធ ដោយលោកស្រី កាម៉ាឡា ហារីស ដាក់មូលដ្ឋាននៃការកាត់ពន្ធច្រើនពីក្រុមហ៊ុនធំៗ ដើម្បីយកប្រាក់សម្រាប់ការចំណាយដែលអាចកាត់បន្ថយការចំណាយរបស់ប្រជាជនដែលមានចំណូលមធ្យម (Middle-Class) សម្រាប់លើកកម្ពស់សេវាថែទា ការបង្កើតធុរកិច្ចថ្មី (Start-Up)។

ចំណែក លោក ដូណាល់ ត្រាំ បានគាំទ្រការកាត់បន្ថយការយកពន្ធពីសាជីវកម្មក្រុមហ៊ុនធំដើម្បីឲ្យពួកគេអាចបង្កើនការវិនិយោគដើម្បីបន្តបង្កើតឱកាសការងារ។ យោងការស្រង់សម្តីរបស់ Newsnationnow។ លោកស្រី ហារីស បានវាយប្រហារគោលនយោបាយរបស់លោកដូណាល់ ត្រាំ ថា វានឹងបង្កើនការចំណាយសម្រាប់អ្នកចំណូលមធ្យមសម្រាប់ការកាត់បន្ថយពន្ធពីមហាសេដ្ឋីនោះ។

សហរដ្ឋអាមេរិកត្រូវគេដឹងថាជាប្រទេសមានសេដ្ឋកិច្ចរីកចម្រើនលួតលាស់ខ្លាំងបំផុត និងជាប្រទេសដែលមានឥទ្ធិពលនយោបាយធំបំផុតរបស់ពិភពលោក ខណៈសង្គ្រាមនៅអឺរ៉ុបនិងនៅមជ្ឈឹមបូព៌ាកំពុងបន្ត សហរដ្ឋអាមេរិកបានបន្តចំណាយយ៉ាងខ្ពស់ដើម្បីគាំទ្រដល់សកម្មភាពយោធារបស់អ៊ុយក្រែនិងអ៊ីស្រាអែល និង ប្រតិប្រតិការរបស់អង្គការណាតូ។

លោក ដូណាល់ ត្រាំ បានព្រលយពីការបញ្ចប់សង្គ្រាមនៅអ៊ុយក្រែន និងនៅអ៊ីស្រាអែល បើសិនលោកឈ្នះឆ្នោតនៅក្នុងខែវិច្ឆិកា ខណៈលោកស្រី ហារីស បានបង្ហាញជំហរជាមួយអ៊ុយក្រែននិងអ៊ីស្រាអែលសម្រាប់ការប្រយុទ្ធរបស់ពួកគេ។

ទាំងសង្គ្រាមនៅអ៊ុយក្រែន និងសង្គ្រាមនៅតំបន់ហ្គាហ្សា សហរដ្ឋអាមេរិកជាអ្នកបណ្តាក់ទុនធំជាងគេ ដែលធ្វើឱ្យការចំណាយសាធារណៈរបស់សហរដ្ឋអាមេរិក បានហក់ឡើងយ៉ាងខ្លាំងក្នុងអាណត្តិរបស់លោកប្រធានាធិបតី ចូ បៃដិន។

បំណុលជាតិរបស់សហរដ្ឋអាមេរិកកើនដល់ជាង៣៥ពាន់ពាន់(ទ្រីលាន) លានដុល្លារ ដែលមានន័យថា ប្រជាជនអាមេរិកម្នាក់ជំពាក់រដ្ឋខ្លួនឯង ១០៤១២២ ដុល្លារ។ យោងតាម Peter G. Peterson Foundation ដែលតាមមើលស្ថានភាពបំណុលសាធារណៈ។

ទិន្នន័យបង្ហាញពីបំណុលសាធារណៈរបស់សហរដ្ឋអាមេរិក។ snipping

បំណុលរដ្ឋាភិបាលសហព័ន្ធសហរដ្ឋអាមេរិកបានហក់ឡើងយ៉ាងគំហុកចាប់តាំងពីសង្គ្រាមអ៊ុយក្រែនបានផ្ទុះឡើយ។ បំណុលរដ្ឋាភិបាលសមមូលទៅនឹងតម្លៃ១២២,៣០ភាគរយនៃផលិតផលក្នុងស្រុកសរុបក្នុងឆ្នាំ២០២៣។ បំណុលសាធារណៈរបស់សហរដ្ឋអាមេរិកមានមធ្យមភាគ៦៣,៧០ភាគរយចាប់ពីឆ្នាំ១៩៤០ ដល់២០២៣ ប៉ុន្តែរឿងដែលគួរកត់សម្គាល់គឺនៅឆ្នាំ២០២០ កម្រិតបំណុលឡើងហក់ឡើងដល់ ១២៦,៣០ភាគរយធៀប ផសស ខណៈដែលទិន្នន័យទាបបំផុតនៅត្រឹម៣១,៨០ភាគរយធៀបផសសក្នុងឆ្នាំ១៩៨១។ យោង Trading Economics ដែលផ្អែកទិន្នន័យពីការិយាល័យគ្រប់គ្របនិងថវិកានៃសេតវិមាន។

ការសងបំណុលសាធារណៈ គឺត្រូវប្រើមធ្យោបាយសាធារណដើម្បីកៀរគរប្រភពចំណូលដើម្បីដោះបំណុល។ មធ្យោបាយដ៏មានសក្តានុពលក្នុងការទាញប្រភពចំណូលដើម្បីដោះបំណុល គឺ ការយកពន្ធ។ ផែនការយកពន្ធដែលពេលនេះបានក្លាយជាតតរបៀបវារៈនយោបាយដ៏ក្តៅគគុកសម្រាប់គណបក្សទាំងពីរក្នុងការវាយប្រហារគ្នាដើម្បីយកប្រជាប្រិយភាព ដើម្បីទទួលបានការគាំទ្រនៅក្នុងការបោះឆ្នោតក្នុងខែវិច្ឆិកាខាងមុខនេះ៕

ដោយ រ៉ាន់ រើយ