ហ្វូស៊ីលពងដាយណូស័រតូចបំផុតលើពិភពលោក ត្រូវបានរកឃើញនៅចិន

ក្រុមអ្នកស្រាវជ្រាវចិនបានរកឃើញហ្វូស៊ីលពងដាយណូស័រប្រភេទថ្មីនៅក្នុងខេត្ត Jiangxi ភាគខាងកើតប្រទេសចិន ដោយមួយមានប្រវែងត្រឹមតែ២៩មីលីម៉ែត្រ ដែលជាទំហំតូចបំផុតមិនធ្លាប់មាននៅលើពិភពលោក។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី១៨ខែតុលានេះ។

បន្ទាប់ពីការសិក្សារយៈពេល៣ឆ្នាំ ក្រុមការងារដែលមានក្រុមអ្នកស្រាវជ្រាវមកពីវិទ្យាស្ថានស្រាវជ្រាវ និងរុករក ភូគព្ភ​សាស្ត្រ ​Jiangxi (JGSEI) សាកលវិទ្យាល័យភូមិសាស្ត្រចិន (Wuhan) និង វិទ្យាស្ថាន Vertebrate Paleontology និង Paleoanthropology នៃបណ្ឌិត្យសភាវិទ្យាសាស្ត្រចិន បានបញ្ជាក់ពីហ្វូស៊ីលស៊ុតចំនួន៦​គ្រាប់​ដែលបានរកឃើញ ដែលស្ថិតនៅយុគសម័យ Cretaceous ជាង៨០លានឆ្នាំមុន។

លោក Lou Fasheng ប្រធាននៅ JGSEI បាននិយាយថា ដោយប្រើមីក្រូទស្សន៍អេឡិចត្រុងស្កែន និងការស្កែន​អេឡិចត្រុង backscatter diffraction ក្រុមអ្នកស្រាវជ្រាវបានវិភាគមីក្រូរចនាសម្ព័ន្ធនៃសំបកពង ហើយបានកំណត់ថា morphology និង microstructure របស់ពួកវាបង្ហាញថាវាជាពងរបស់ដាយណូស័រ theropod ដែលមិនមែនជាសត្វស្លាប (ពពួកដាយណូស័រ​ដែល​មាន​លក្ខណៈ​ដោយ​ឆ្អឹង​ប្រហោង និង​ម្រាម​ជើង​បី និង​ក្រញ៉ាំ​នៅ​លើ​អវយវៈ​នីមួយៗ)។ Theropods ជាទូទៅត្រូវបានចាត់ថ្នាក់ជាក្រុមដាយណូស័រ saurischian។

យោងតាមលោក Lou ពងដែលមានសភាពពេញលេញបំផុតមានប្រវែងអតិបរមាត្រឹមតែ ២៩មីលីម៉ែត្រប៉ុណ្ណោះ ដែលបង្កើត​កំណត់ត្រាថ្មីមួយសម្រាប់ហ្វូស៊ីលពងដាយណូស័រតូចជាងគេ។

ការរកឃើញចុងក្រោយនេះបាន​ពង្រីកភាពចម្រុះនៃពងដាយណូស័រពីចុងយុគសម័យ Cretaceous និងផ្តល់នូវការយល់ដឹងដ៏មានតម្លៃចំពោះការវិវត្តន៍របស់ដាយណូស័រ theropods ក្នុងអំឡុងពេលនោះ ខណៈក្រុមស្រាវជ្រាវនឹងប្រើប្រាស់ការស្កែនមីក្រូ CT ដើម្បីបង្កើតឡើងវិញនូវស្ថានភាពកប់សាកសពហ្វូស៊ីលពង សិក្សាដំណើរការកកើតរបស់ពួកវា និងបញ្ជាក់បន្ថែមអំពីប្រភេទដាយណូស័រដែលជាមេរបស់ពងណូស័រដាយទាំងនេះ ក៏ដូចជាវិធីសាស្ត្របន្តពូជរបស់ប្រភេទសត្វទាំងនេះផងដែរ៕

អត្ថបទ៖ ប៊ុន សុភាព