នាយករដ្ឋមន្ត្រី ប្រាប់ពលរដ្ឋកុំជឿតាមមេខ្យល់ ព្រោះគ្មានគោលការណ៍ចែកដីសម្បទាននោះទេ

សម្ដេចធិបតី ហ៊ុន ម៉ាណែត បានអំពាវនាវដល់ប្រជាពលរដ្ឋកុំជឿតាមការឃោសនារបស់មេខ្យល់ ដែលដើរប្រាប់ថា ចុះឈ្មោះដើម្បីបានដីសម្បទានពីរដ្ឋ។ ជាមួយការអំពាវនាវនេះ​ សម្ដេចនាយករដ្ឋមន្ត្រី បានបញ្ជាឱ្យអាជ្ញាធរមានសមត្ថកិច្ចចាត់វិធានការច្បាប់លើមេខ្យល់ទាំងនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងបញ្ជាក់យ៉ាងដូច្នេះថា៖«មានមេខ្យល់ទៅដើរបំផុសប្រជាពលរដ្ឋ ដើម្បីចុះឈ្មោះយកដីសម្បទាន ខ្ញុំសូមបញ្ជាក់ អត់មានទេ អត់មានមេខ្យល់ណាឱ្យទៅបំផុស ដើម្បីមកយកដីសម្បទាននោះទេ»។ ការបញ្ជាក់របស់សម្ដេចធិបតី នាយករដ្ឋមន្ត្រី ធ្វើឡើងក្នុងឱកាសអញ្ជើញជាអធិបតីពិធីសម្ពោធដាក់ឱ្យប្រើប្រាស់ជាផ្លូវការទំនប់អូរតេធិបតី នៅខេត្តមណ្ឌលគិរី នាព្រឹកថ្ងៃព្រហស្បតិ៍ ទី២៤ ខែតុលា ឆ្នាំ២០២៤។

សម្ដេចធិបតី បានបន្ថែមថា បើមានគោលការណ៍ចែកដីសម្បទាននេះ ក៏ត្រូវធ្វើឡើងតាមរយៈយន្តការរដ្ឋ ដូចដែលកន្លងទៅ គឺយន្តការផ្ដល់ដីសម្បទាន តាមការដាក់ពាក្យមកអាជ្ញាធរឃុំ ខណៈបច្ចុប្បន្ន រាជរដ្ឋាភិបាល ក៏កំពុងរៀបចំបង្កើតនូវគណៈកម្មការបន្ទុកលើកិច្ចការនេះផងដែរ។

ក្នុងន័យនេះ សម្ដេចនាយករដ្ឋមន្ត្រី បានអំពាវនាវប្រជាពលរដ្ឋកុំជឿលើមេខ្យល់ ដែលកំពុង​ដើរបំផុសបំផុលយកលុយ​ ដើម្បីជាថ្នូរ ទទួលបានដីឡើយ។ សម្ដេចធិបតី ក៏បញ្ជាឱ្យអាជ្ញាធរមានសមត្ថកិច្ចតាមដាន និងវែកមុខមេខ្យល់ទាំងនោះ យកមកអនុវត្តច្បាប់ មិនដូច្នេះទេ ដើរបោកប្រជាពលរដ្ឋបន្តទៀត ពិសេសតាមដំណឹងដែលសម្ដេចទទួលបាន គឺករណីនេះ បានកើតឡើងនៅស្រុកពេជ្រាដា ខេត្តមណ្ឌលគិរី។

គួរជម្រាបថា ក្រោយមានដំណឹងឃោសនាបោកប្រាស់នៅស្រុកពេជ្រាដានេះ រដ្ឋបាលខេត្តមណ្ឌលគិរី បានចេញមកអះអាងថា រដ្ឋបាលខេត្តគ្មានគោលការណ៍​ណែនាំ ឬទទួលបានការអនុញ្ញាតពីរាជរដ្ឋាភិបាល ដើម្បីបែងចែកដីដូចការបំផុសបំផុលឡើយ។

សេចក្ដីបំភ្លឺ ចុះថ្ងៃទី១៨ ខែតុលា​ រដ្ឋបាលខេត្តមណ្ឌលគិរី ចាត់ទុកការផ្សាយព័ត៌មានមិនពិតនេះ ថា គឺជាចេតនាក្នុងការបំផុសបំផុលពីសំណាក់ក្រុមមេខ្យល់ ក្នុងគោលបំណងបោកប្រាស់ប្រជាពលរដ្ឋស្លូតត្រង់។ អាជ្ញាធរខេត្តភាគឦសានមួយនេះ បានអំពាវនាវដល់ប្រជាពលរដ្ឋ កុំឱ្យចាញ់បោកតាមការសន្យារបស់ក្រុមមេខ្យល់ ដែលនាំឱ្យខាតបង់ទ្យព្យសម្បត្តិ។

បន្ថែមពីការអំពាវនាវ អាជ្ញាធរខេត្ត ក៏ព្រមានចាត់វិធានការផ្លូវច្បាប់ចំពោះជនខិលខូច ក្រុមមេខ្យល់ ដែលបានប្រើប្រាស់ប្រជាពលរដ្ឋ ពាក់ព័ន្ធនឹងការចុះឈ្មោះដើម្បីទទួលបានដីសម្បទាននេះផងដែរ៕

អត្ថបទ៖ ធឿន វ៉ាន់សុង