ថៃ ប្រាប់ឲ្យ១១ខេត្ត ប្រយ័ត្នខ្លួន ព្រោះទំនប់ចៅប្រាយ៉ា នឹងបើកបញ្ចេញទឹកកាន់តែខ្លាំង

នាយកដ្ឋានជលសាស្រ្តថៃ បានចេញការព្រមានឲ្យខេត្តក្រុងចំនួន១១ ត្រូវប្រុងប្រយ័ត្នព្រោះថា ទំនប់ ចៅប្រាយ៉ា នឹងបើកបញ្ចេញទឹកកាន់តែខ្លាំង ដោយសារភ្លៀងធ្លាក់ខ្លាំងធ្វើឲ្យកម្រិតទឹកនៅអាងស្តុក ហក់ឡើងខ្លាំង។

តាមការចុះផ្សាយរបស់ Khaosod នៅថ្ងៃព្រហស្បតិ៍ទី២៤ខែតុលាឆ្នាំ២០២៤, លោក Jirayu Huangsap ទីប្រឹក្សា​នាយក​រដ្ឋមន្ត្រី និង​ជា​អ្នក​នាំ​ពាក្យ​មជ្ឈមណ្ឌល​ប្រតិបត្តិការ​សង្គ្រោះ​គ្រោះ​ទឹក​ជំនន់ ព្យុះ និង​ការ​រអិល​បាក់​ដី (FSOC) បានឲ្យដឹង ទំនប់ចៅប្រាយ៉ា នឹងបើកបញ្ចេញទឹក ១ ៦០០ម៉ែត្រគូបក្នុងមួយវិនាទី ដូច្នេះហើយខេត្តក្រុងចំនួន១១នៅខ្សែទឹកខាងក្រោមត្រូវប្រុងប្រយ័ត្ននិងត្រៀមខ្លួន ព្រោះថាកម្ពស់ទឹកទន្លេនឹងហក់ឡើងប្រហែល៣០ទៅ៥០សង់ទីម៉ែត្រ។

ខេត្តក្រុងទាំង១១នោះមានដូចជា Uthai Thani, Chai Nat, Sing Buri, Ang Thong, Phra Nakhon Si Ayutthaya, Suphan Buri, Lop Buri, Pathum Thani, Nonthaburi, Samut Prakan និងទីក្រុង Bangkok។

ទោះបីជាយ៉ាងណាក៏ដោយ នាយកដ្ឋានជលសាស្រ្តអះអាងថា ថៃកំពុងទទួលរងឥទ្ធិពលព្យុះ ត្រាមី ទើបប៉ះពាល់បែបនេះ ប៉ុន្តែស្ថានភាពនឹងធូរស្រាលវិញ នៅប៉ុន្មានថ្ងៃខាងមុខ។

សូមបញ្ជាក់ថា បច្ចុប្បន្ន ព្យុះត្រាមី កំពុងវាយប្រហារប្រទេសហ្វីលីពីនយ៉ាងចាស់ដៃ ដោយបង្កឲ្យមានបំណាក់ដីនិងគ្រោះទឹកជំនន់ធំធេង ខណៈគិតត្រឹមរសៀលថ្ងៃព្រហស្បតិ៍ទី២៤ខែតុលាឆ្នាំ២០២៤ តួលេខមនុស្សស្លាប់ដោយសារឥទ្ធិពលព្យុះនេះ កើនដល់២៤នាក់ហើយ។

ជាមួយកម្លាំងខ្យល់​ល្បឿន​ថេរ​ជា​​អតិបរមា ៩៥​​គីឡូម៉ែត្រ​ក្នុង​១​ម៉ោង និង​ខ្យល់​កន្ទ្រាក់ ១៦០​គីឡូម៉ែត្រ​ក្នុង​១​ម៉ោង, ព្យុះ ត្រាមី បានចូលវាយប្រហារតំបន់ Cordillera ភាគឦសានប្រទេសហ្វីលីពីន កាលពីថ្ងៃពុធ ដោយបង្ខំឲ្យរដ្ឋាភិបាលចេញការព្រមានជម្លៀសប្រជាជននៅតាមតំបន់មានហានិភ័យ បិទសាលារៀន និងថែមទាំងផ្អាកជើងហោះហើរមួយចំនួន ទៀតផង៕

អត្ថបទ៖ សុខ សុវណ្ណ

ចុចអាន៖ ព្យុះ ត្រាមី វាយប្រហារហ្វីលីពីន ចាស់ដៃ, មនុស្សស្លាប់កើនដល់ ២៤នាក់