ហ៊ាទី ប្រកាសថា សច្ចាមិនទទួលផ្សព្វផ្សាយកម្មវិធីហ្គេមអនឡាញដាច់ខាត (មានវីដេអូ)

ហ៊ាទី ត្រូវបានគេស្គាល់ថា ជាអ្នកផលិតមាតិកាបែបកំប្លុងកំប្លែងមួយរូប ដែលចាប់ដៃគ្នាជាក្រុមនឹងសមាជិកល្បីឈ្មោះ ២រូបទៀត គឺអ្នកនាង ស៊ូស៉ី និង ចែជឿន ហើយតែងធ្វើឱ្យសាធារណជនទទួលបានអារម្មណ៍រីករាយ និងសើចក្អាកក្អាយ។ តួយ៉ាង ក្នុងកិច្ចការផលិតវីដេអូរបស់អ្នកទាំង៣ កន្លងមក ក៏មានទីផ្សារខ្លាំង រហូតឈានដល់ការប្រូម៉ូតអាជីវកម្មផ្សេងៗផងដែរ លើកលែងតែប្រភេទអាជីវកម្មមួយប៉ុណ្ណោះ ដែលហ៊ាទី បានចេញមុខមកបញ្ជាក់ជាសាធារណៈ មិនទទួលផ្សាយដាច់ខាត គឺកម្មវិធីល្បែងអនឡាញ។

ដើម្បីជាការបញ្ជាក់ទៅកាន់ក្រុមភ្នាក់ងារ ដែលទាក់ទងការងារឱ្យលោក និងក្រុមជួយផ្សព្វផ្សាយពីកម្មវិធីល្បែងអនឡាញ (Game Online) កាលពីយប់ថ្ងៃមិញនេះ ហ៊ាទី បានចេញមកប្រកាសជាសាធារណៈថា កន្លងមកលោក និងសមាជិកក្រុម មិនដែលទទួលផ្សព្វផ្សាយកម្មវិធីហ្គេមអនឡាញនោះឡើយ ហើយក៏សច្ចាថាមិនទទួលការងារប្រូម៉ូតបែបនេះនោះដែរ។

តាមរយៈវីដេអូខ្លីជិត ១នាទី ហ៊ាទី បានរៀបរាប់ថា មូលហេតុដែលលោកចេញមកបញ្ជាក់លើការលើកឡើងខាងលើ ក៏ព្រោះតែកន្លងមកពិសេសមួយរយៈនេះ លោកទទួលបានការទំនាក់ទំនងពីភ្នាក់ងារខាងល្បែងអនឡាញជាច្រើននាក់ ក្នុងបំណងចង់ទាក់ទងការងារឱ្យលោកផ្សព្វផ្សាយកម្មវិធីទាំងនោះ។ លោកថា ការបញ្ជាក់នេះ ក៏សម្រាប់ជាដំណឹងដល់ភ្នាក់ងារកម្មវិធីទាំងនោះ ឱ្យដឹងកាន់តែច្បាស់ពីឆន្ទៈរបស់លោក ក៏ដូចក្រុមលោក។

ទន្ទឹមនឹងឃ្លីបដែលលោកផ្សាយលើគណនីហ្វេសប៊ុកផ្ទាល់ខ្លួន បានសរសេរបញ្ជាក់បន្ថែមដែរថា “ខ្ញុំបាទ សច្ចាថាបើខ្ញុំនៅបន្តបានដល់ពេលណា គឺខ្ញុំមិនទទួលផ្សព្វផ្សាយល្បែងទេ ដាច់ខាត” ៕ អត្ថបទ៖ សុធាវី