ព័ត៌មានជាតិ

ក្រសួងអប់រំ នឹងបំប៉នសមត្ថភាពឌីជីថលដល់យុវជនកម្ពុជាឱ្យក្លាយជា ពលរដ្ឋឌីជីថលប្រកបដោយការទទួលខុសត្រូវខ្ពស់

បានផុស

២ years មុន

នៅ

ថ្ងៃចន្ទ ២៥ វិច្ឆិកា ២០២៤

ដោយ

ក្រសួងអប់រំ យុវជន និងកីឡា នឹងបំប៉នសមត្ថភាពឌីជីថលដល់យុវជនកម្ពុជា ឱ្យក្លាយជាពលរដ្ឋឌីជីថលប្រកបដោយការទទួលខុសត្រូវខ្ពស់ និងជាអ្នកដឹកនាំនាពេលអនាគត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងវគ្គបូកសរុប និងប្រកាសជ័យលាភី កម្មវិធីអក្ខរកម្មឌីជីថល នៅមជ្ឈមណ្ឌលជាតិបណ្ដុះធុរកិច្ចថ្មី នៃកម្ពុជា(NICC) ដែលរៀបចំឡើងដោយនាយកដ្ឋានអភិវឌ្ឍន៍កម្មវិធីយុវជន កាលពីចុងសប្ដាហ៍កន្លងទៅនេះ លោក វង ភិរុណ អនុរដ្ឋលេខាធិការ នៃក្រសួងអប់រំ យុវជន និងកីឡា បានមានប្រសាសន៍ថា «អក្ខរកម្មឌីជីថល» ជាកម្មវិធីមួយដែលបានផ្ដួចផ្ដើមដោយនាយកដ្ឋានអភិវឌ្ឍន៍កម្មវិធីយុវជន នៃអគ្គនាយកដ្ឋានយុវជន ក្រសួងអប់រំ យុវជន និងកីឡា កាលពីឆ្នាំ ២០១៩ ក្នុងគោលបំណងផ្តល់ចំណេះដឹង ជំនាញផ្នែកឌីជីថល ពង្រឹងសុវត្ថិភាពក្នុងការប្រើប្រាស់ប្រព័ន្ធឌីជីថល និងបញ្ជ្រាប ភាពជាពលរដ្ឋឌីជីថលប្រកបដោយការទទួលខុសត្រូវ ដល់យុវជន នៅរាជធានីភ្នំពេញ និងរាជធានីខេត្តទូទាំងប្រទេសកម្ពុជា។

ជាងនេះទៀត កម្មវិធីអក្ខរកម្មឌីជីថល ក៏បានបំប៉នសមត្ថភាពយុវជនក្នុងការបង្កើតវីដេអូអប់រំខ្លីផងដែរ ដោយរួមមាន ការសរសេរសាច់រឿង ការចាប់ប្លង់ថត និងបច្ចេកទេសថតជាដើម។

លោកបានបន្តថា នៅឆ្នាំ ២០២៤ កម្មវិធីនេះបានពង្រីកវិសាលភាពរបស់ខ្លួនជាមួយការឈានទៅដល់ខេត្តចំនួនបួនបន្ថែមទៀតគឺខេត្តតាកែវ សៀមរាប ពោធិ៍សាត់ និងខេត្តរតនគីរី ជាមួយនឹងការផ្តល់អត្ថប្រយោជន៍ដល់សិស្សសរុបចំនួន ១ ២៦៨ នាក់ ស្រី ៧៩២ នាក់ បន្ថែមទៀត។ គិតមកទល់បច្ចុប្បន្ននេះ មានយុវជនសរុបចំនួន ៥ ៩៩១ នាក់ ស្រី ៣ ៣៣១ នាក់ ហើយ ដែលបានចូលរួមក្នុងកម្មវិធីអក្ខរកម្មឌីជីថល។

លោកបានបន្តទៀតថា កម្មវិធីអក្ខរកម្មឌីជីថលនេះគឺជាសក្ខីភាពមួយចំពោះការប្ដេជ្ញាចិត្តរបស់ក្រសួងអប់រំ យុវជន និងកីឡា ក្នុងការរៀបចំយុវជនរបស់សម្រាប់យុគសម័យឌីជីថល តាមរយៈការបំប៉នសមត្ថភាពឌីជីថលចាំបាច់ ដើម្បីឱ្យយុវជនយើងក្លាយជាពលរដ្ឋឌីជីថលប្រកបទៅដោយការទទួលខុសត្រូវ និងជាអ្នកដឹកនាំនាពេលអនាគត។

បន្ថែមពីលើនេះ លោកបានបញ្ជាក់ថា កម្មវិធីអក្ខរកម្មឌីជីថលមិនត្រឹមតែផ្តល់ចំណេះដឹងផ្នែកឌីជីថលដល់យុវជនប៉ុណ្ណោះទេ គឺបានផ្តល់នូវបទពិសោធ និងបំណិនជីវិតថែមទៀត។

ទន្ទឹមនឹងនេះដែរ កញ្ញា ចែម ស្រីអឿន ប្រធានផ្នែកកិច្ចការសាធារណៈ នៃក្រុមហ៊ុន Smart Axiata បានលើកឡើងថា «តាមរយៈការវិនិយោគលើកម្មវិធីអក្ខរកម្មឌីជីថល យើងកំពុងផ្តល់សិទ្ធិអំណាចដល់យុវជនជាស្ពានឈានទៅកាន់សក្ដានុពលពេញលេញរបស់ពួកគេ ក៏ដូចជាការចូលរួមចំណែកដល់ការរីកចម្រើន នៃប្រទេសរបស់យើងផងដែរ។ យើងពិតជាមានកិត្តិយស និងភាពរីករាយយ៉ាងខ្លាំងសម្រាប់កិច្ចសហការជាមួយក្រសួងអប់រំ យុវជន និងកីឡា ក្រសួងប្រៃសណីយ៍ និងទូរគមនាគមន៍ ក្រុមហ៊ុន TikTok ក្នុងទិសដៅផ្តល់នូវកម្មវិធីដ៏មានឥទ្ធិពលវិជ្ជមាននេះ។ គោលដៅរបស់យើង គឺនៅតែបន្តជាមួយគ្នាបង្កើតអនាគតដ៏ភ្លឺស្វាងសម្រាប់ប្រជាជនកម្ពុជា»។

កញ្ញា បានបន្តថា មិនត្រឹមតែប៉ុណ្ណោះ កម្មវិធីនេះបានកំពុង និងបន្តបង្កើតផលវិជ្ជមានដល់អនាគតយុវជន ការអភិវឌ្ឍវិស័យអប់រំ ក៏ដូចជាការចូលរួមចំណែកក្នុងការរីកចម្រើននៅក្នុងសេដ្ឋកិច្ចរបស់ប្រទេសកម្ពុជាផងដែរ៕

អត្ថបទ ៖ សំអឿន