ព័ត៌មានអន្ដរជាតិ

តម្លៃអង្ករវៀតណាម នៅតែខ្ពស់ជាងគេបំផុតលើទីផ្សារសកល

បានផុស

៤ ខែ មុន

នៅ

ថ្ងៃចន្ទ ២៥ វិច្ឆិកា ២០២៤

ដោយ

តម្លៃអង្ករវៀតណាម នៅតែខ្ពស់ជាងគេបំផុតនៅលើទីផ្សារសកល ទោះបីជាឥណ្ឌាទម្លាក់ចោលបំរាមនាំចេញអង្ករ ដែលធ្វើឱ្យការផ្គត់ផ្គង់ពីប្រទេសគូប្រជែងកើនឡើងក៏ដោយ។ នេះបើតាមការចុះផ្សាយរបស់កាសែត VnExpress។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេមើលឃើញថា ក្រោយឥណ្ឌាទម្លាក់ចោលបំរាមរបស់ខ្លួននៅចុងខែតុលា តម្លៃអង្ករសកលបានធ្លាក់ចុះគួរឱ្យកត់សម្គាល់។ តម្លៃអង្ករបាក់ ៥ ភាគរយ របស់ប៉ាគីស្ថាន និងថៃ បានធ្លាក់ចុះ ៥-១០ ភាគរយ ដោយលក់នៅត្រឹម ៤៥៧-៤៩០ ដុល្លារ/តោន។ នេះបើយោងតាមទិន្នន័យពីសមាគមស្បៀងអាហារវៀតណាម។

តម្លៃអង្ករវៀតណាមបានធ្លាក់ចុះក្នុងអត្រាដូចគ្នា ជិតដល់ ៥០០ ដុល្លារ/តោន យ៉ាងណាមិញ បានកើនមកវិញ ដោយជួញដូរនៅតម្លៃ ៥២២ ដុល្លារ/តោន កាលពីថ្ងៃព្រហស្បតិ៍ សប្ដាហ៍មុន។

ការស្ទុះងើបឡើងវិញនៃតម្លៃ ត្រូវបានជំរុញដោយការរឹតបន្តឹងការផ្គត់ផ្គង់ នៅពេលដែលរដូវប្រមូលផលខិតជិតដល់ទីបញ្ចប់។ ក្រៅពីនេះ កសិករវៀតណាមបានផ្លាស់ប្តូរទៅដាំដុះពូជស្រូវដែលផ្តល់ទិន្នផលខ្ពស់ជាងមុន និងអាចប្រកួតប្រជែងជាមួយអង្ករពីប្រទេសផ្សេងៗបានកាន់តែប្រសើរ។

គួរគូសបញ្ជាក់ថា ក្នុងរយៈពេល ១០ ខែដំបូងនៃឆ្នាំនេះ វៀតណាមបាននាំចេញអង្ករជិត ៧,៨ លានតោនក្នុងតម្លៃ ៤,៩ ប៊ីលានដុល្លារ កើនឡើងជាង ២៣ ភាគរយ ធៀបនឹងឆ្នាំមុន។ នេះបើយោងតាមស្ថិតិរបស់ក្រសួងកសិកម្ម និងអភិវឌ្ឍន៍ជនបទវៀតណាម។ ជាមធ្យម អង្ករវៀតណាមលក់នៅតម្លៃ ៦២៦,២ ដុល្លារ/តោន ដោយកើនឡើង ១២ ភាគរយ ក្នុងអត្រាប្រចាំឆ្នាំ។

នាយកដ្ឋានផលិតកម្មដំណាំ បានព្យាករថា វៀតណាមនឹងផលិតអង្ករបានប្រមាណ ៤៣ លានតោននៅឆ្នាំនេះ ដែលគ្រប់គ្រាន់សម្រាប់ការនាំចេញចំនួន ៨ លានតោន ខណៈនៅតែអាចបំពេញតម្រូវការក្នុងស្រុក។ លើសពីនេះ តម្លៃនៃការនាំចេញអង្កររបស់វៀតណាម រំពឹងថានឹងឈានដល់កម្រិតខ្ពស់បំផុតចំនួន ៥ ប៊ីលានដុល្លារនៅឆ្នាំនេះ៕