ព័ត៌មានអន្ដរជាតិ

ប្រធានយោធាណាតូ៖ ទាហានរុស្ស៊ីមានចំនួនច្រើនជាង២ឆ្នាំមុន តែគុណភាពអន់ជាងមុន

បានផុស

២ years មុន

នៅ

ថ្ងៃអង្គារ ២៦ វិច្ឆិកា ២០២៤

ដោយ

Chheang

ក្រោយការឈ្លានពានពេញទំហឹងទៅលើអ៊ុយក្រែនក្នុងខែកុម្ភៈឆ្នាំ២០២២ រុស្ស៊ីបានបង្កើនកងកម្លាំងជើងគោករបស់ខ្លួនឲ្យមានចំនួនច្រើនជាងមុន ប៉ុន្តែគុណភាពនៃកងកម្លាំងទាំងនោះបែរជាមានការធ្លាក់ចុះទៅវិញ។ នេះជាការលើកឡើងរបស់លោក Rob Bauer ប្រធានគណៈកម្មការយោធាអង្គការណាតូ កាលពីថ្ងៃទី២៥ខែវិច្ឆិកាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Bauer បានលើកឡើងថា រុស្ស៊ីបាត់បង់គុណភាពនៃកងកម្លាំងរបស់ខ្លួន នេះក៏ព្រោះតែកង្វះខាតសម្ភារៈយោធា និងកម្រិតនៃការហ្វឹកហាត់។ លោកបាននិយាយថា៖ «នៅពេលឥឡូវនេះ ជនជាតិរុស្ស៊ីទាំងនោះមិនមានការគំរាមកំហែងដូចកាលពីខែកុម្ភៈឆ្នាំ២០២២ទេ ដូច្នេះយើងអាចមានពេលខ្លះដើម្បីរៀបចំខ្លួន» ដោយសំដៅលើការបង្កើនការវិនិយោគទុននៅក្នុងឧស្សាហកម្មការពារជាតិ។

គួររំឭកថា ក្រៅតែពីលោក Bauer លោក Christopher Cavoli មេបញ្ជាការសម្ព័ន្ធមិត្តកំពូលអឺរ៉ុប បានប្រាប់ថា កងកម្លាំងរុស្ស៊ីនឹងខ្លាំងក្លាជាងពេលបច្ចុប្បន្ន ដោយបន្ថែមថា៖ «កងកម្លាំងរុស្ស៊ីកំពុងរៀនសូត្រ ពួកគេកំពុងរីកចម្រើន ពួកគេកំពុងដកយកបទពិសោធន៍ដែលទទួលបានពីសង្គ្រាម»។

លោក Cavoli បានអំពាវនាវឲ្យណាតូ ត្រូវរៀបចំឲ្យលឿនចំពោះការគំរាមកំហែងនេះ ដោយសាររុស្ស៊ីនឹងក្លាយជាសត្រូវ ដែលមានសក្ដានុពលយោធាធំធេង។

ចំណែកឯលោក Bruno Kahl ប្រធានទីភ្នាក់ងារចារកម្មបរទេសរបស់អាល្លឺម៉ង់ ជឿថា រុស្ស៊ីនឹងអាចមានសមត្ថភាពវាយប្រហារលើទឹកដីណាតូនៅក្នុងរយៈពេល៦ឆ្នាំខាងមុខ៕

ដោយ៖ ឈាង