ព័ត៌មានអន្ដរជាតិ

ទឹកជំនន់ភាគខាងត្បូងថៃ អាចប៉ះពាល់ដល់ផលិតកម្មកៅស៊ូរហូតដល់ ៧ ភាគរយ

បានផុស

២ years មុន

នៅ

ថ្ងៃពុធ ៤ ធ្នូ ២០២៤

ដោយ

អាជ្ញាធរកៅស៊ូថៃ បានឱ្យដឹងកាលពីថ្ងៃអង្គារថា ទឹកជំនន់ធ្ងន់ធ្ងរនៅភាគខាងត្បូងនៃប្រទេសថៃ អាចកាត់បន្ថយផលិតកម្មកៅស៊ូប្រហែល ៧ ភាគរយ។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានស្ដីទីរបស់អាជ្ញាធរ លោក Sukatus Tarngwiriyakul បានថ្លែងថា អាជ្ញាធរកៅស៊ូថៃ បានកំណត់គោលដៅទិន្នផលកៅស៊ីចំនួន ៤,៧៨ លានតោន សម្រាប់ឆ្នាំ ២០២៤ ប៉ុន្តែទឹកជំនន់អាចធ្វើឱ្យតួលេខនេះធ្លាក់ចុះតិចជាងគោលដៅ មកត្រឹម ៤,៤៦ លានតោន។

លោក Sukatus បានថ្លែងយ៉ាងដូច្នេះថា៖ «ទឹកជំនន់ បានរារាំងកសិករមិនឱ្យទៅចៀរកៅស៊ូ»។ លោកបន្តថា ការធ្លាក់ចុះនៃទិន្នផល ក៏អាចប៉ះពាល់ដល់ការប្រើប្រាស់កៅស៊ូក្នុងស្រុកផងដែរ។

គួរគូសបញ្ជាក់ថា ថៃជាប្រទេសនាំចេញកៅស៊ូធំជាងគេរបស់ពិភពលោក ដោយបាននាំចេញកៅស៊ូចំនួន ២,៨៦ លានតោន ក្នុងរយៈពេល ៩ ខែដំបូង នៃឆ្នាំនេះ ធ្លាក់ចុះ ៥,៩ ភាគរយ ធៀបនឹងរយៈពេលដូចគ្នាកាលពីឆ្នាំមុន។ ប្រទេសនេះ នាំចេញកៅស៊ូសរុបប្រមាណ ៤ លានតោន កាលពីឆ្នាំមុន។

ខេត្តនៅតំបន់ភាគខាងត្បូងចំនួន ៨ របស់ថៃ បានរួមចំណែងយ៉ាងសំខាន់សម្រាប់ផលិតកម្មកៅស៊ូរបស់ប្រទេស។ យ៉ាងណាមិញ តំបន់ឧបទ្វីបម៉ាឡេ ដែលរួមមានភាគខាងត្បូងថៃ និងម៉ាឡេស៊ី កំពុងជួបប្រទះនឹងគ្រោះទឹកជំនន់ធ្ងន់ធ្ងរ ដោយសម្លាប់មនុស្សរាប់សិបនាក់ និងបង្ខំឱ្យមានការជម្លៀសខ្លួនប្រជាជនរាប់ម៉ឺននាក់។

ខណៈទឹកជំនន់មិនទាន់ស្រកស្រាន្តស្រួលបួល អាជ្ញាធរឧត្តុនិយមថៃនៅតែបន្តព្រមានពីកម្រិតទឹកភ្លៀងធ្លាក់ខ្លាំងជោគជាំ ដែលអាចបង្កើតបានជាទឹកជំនន់ភ្លាមៗ នៅតាមតំបន់ផ្សេងៗ។

គួរគូសបញ្ជាក់ថា ឆ្នាំ ២០២៤ នេះ ថៃបានជួបប្រទះនៅទឹកជំនន់ធ្ងន់ធ្ងរ ស្ទើរតែទូទាំងប្រទេស ដោយកាលពីពាក់កណ្ដាលឆ្នាំ ថៃបានរងនូវគ្រោះធម្មជាតិដដែលទូទាំងតំបន់ភាគខាងជើង និងតំបន់ទំនាបកណ្ដាល ដោយឆក់យកជីវិតមនុស្សរាប់សិបនាក់ ដែលធ្វើឱ្យប៉ះពាល់ទាំងវិស័យផលិតកម្ម និងកសិកម្ម៕