អ្នកនាង​ ខ្ញុង ស្នើសុំចិត្តមហាជនកុំប្រមាថការឈឺចាប់របស់ខ្លួន

តារាកំប្លែងអ្នកនាង ស្រេង សុកាន់ដា ហៅ ខ្ញុង បានស្នើសុំចិត្តអ្នកគាំទ្រនិងមហាជន កុំប្រមាថលើការឈឺចាប់របស់ខ្លួន និងប្រាប់ថា នេះពុំមែនការលេងសើចឡើយ។

គួរជម្រាបថា ដោយសារតែរឿងបញ្ហានៃការជំពាក់បំណុលនេះហើយ ទើបអ្នកនាង ខ្ញុង បានធ្លាក់ខ្លួនដល់ចំណុចសូន្យព្រោះការលក់ទ្រព្យសម្បត្តិអស់ខ្ទេចខ្ទីគ្មានសល់ពីខ្លួន។ ប៉ុន្តែអ្វីដែលគួរឱ្យសរសើរ គឺការតស៊ូរបស់តារាកំប្លែងរូបនេះ ខណៈបច្ចុប្បន្ន អ្នកនាងបានខិតខំតក្នុងការរកស៊ីស្ទើរគ្មានពេលសម្រាកឡើយ ឯអាជីពកំប្លែង ក៏ចាប់ផ្តើមលេចមុខឡើងវិញនៅក្នុងក្រុមលោក សុវណ្ណរិទ្ធី ហៅលោកតា វ៉ិចទ័រ ផងដែរ។

ស្របពេលដែលតារាកំប្លែងរូបនេះ កំពុងតស៊ូលើវិថីជីវិតដើម្បីដោះបំណុល អ្នកនាង ខ្ញុង បានស្នើដល់អ្នកគាំទ្រដោយលើកហេតុផលថា គ្រប់មនុស្សម្នាក់ៗមានសេចក្តីសុខនិងទុក្ខផ្សេងៗគ្នា ដោយហេតុនេះ អ្នកដទៃមិនអាចដឹងពីបញ្ហារបស់ខ្លួន ឯខ្លួននាងក៏មិនអាចស្វែងយល់ពីបញ្ហារបស់អ្នកណាដែរ ដូច្នេះកុំតែប្រមាថការឈឺចាប់របស់អ្នកនាងគឺបានហើយ។

តារាកំប្លែងខ្ញុងនិយាយទៀតថា “នេះមិនមែនជាកាលេងសើចដូចដែលអ្នកគិត ព្រោះខ្ញុំជឿថាអារម្មណ៍ដែលគេប្រមាថការឈឺចាប់របស់យើង…វាមានអារម្មណ៍យ៉ាងណា ពេលនេះអ្នកអាចសើចខ្ញុំបាន តែមិនប្រាកដទេថាអ្នកមិនចេះយំនៅថ្ងៃណាមួយ”។

សូមបញ្ជាក់ដែរថា កាលពីកន្លងទៅ តារាកំប្លែងអ្នកនាង ស្រេង សុកាន់ដា ហៅ ខ្ញុង ដែលបច្ចុប្បន្នត្រូវបានគេដឹងថានា ងកំពុងរួមរឹតដោយការជំពាក់បំណុលគេវ័ន្តកនោះ ធ្លាប់បានប្រកាសរក្សាជំហររបស់ខ្លួនដោយភាពជឿជាក់ថា នាងមិនរត់ចោលបំណុលឬគិតខ្លីសម្លាប់ខ្លួនទេ បើទោះបីត្រូវមានទោស និងរកបានព្រឹកខ្វះល្ងាចក្តី៕ អត្ថបទ៖ ចាន់រ៉ា