វិទ្យាស្ថាន NPIC ផ្ដល់​ជំនាញ​ខាង​អគ្គិសនី​ស្រប​តាម​ស្ដង់ដារ​អន្តរជាតិ ដើម្បី​ឆ្លើយតប​តាម​តម្រូវការទីការងារលើសកលលោក

ភ្នំពេញ ៖ វិទ្យាស្ថានជាតិ​បច្ចេកទេស​កម្ពុជា (NPIC) នៃ​ក្រសួង​ការងារ និងបណ្ដុះបណ្ដាលវិជ្ជាជីវៈ បាននឹង​កំពុងផ្តល់ការបណ្តុះបណ្តាលជំនាញ​អគ្គិសនី​តាម​ស្ទង់ដារ​អន្តរជាតិ ដើម្បី​ឆ្លើយ​តាម​តម្រូវការ​កំណើន​ទីផ្សារ​ការងារ​នៅកម្ពុជា និង​ប្រទេស​ក្នុង​តំបន់ ខណៈវិទ្យាស្ថានមានកិច្ចសហប្រតិបត្តិការជាមួយក្រុមហ៊ុនកូរ៉េ និងជប៉ុន។

លោកបណ្ឌិត ចេង ហ៊ឈង នាយក​មហាវិទ្យាល័យអគ្គិសនីនៃវិទ្យាស្ថាន NPIC បាន​ថ្លែង​ថា « វិទ្យាស្ថាន NPIC បណ្តុះបណ្តាល​សិស្ស​ទៅ​តាម​បែប​ស្តង់ដារ​បរទេស ក្រោយបញ្ចប់ការសិក្សា និស្សិត​ក៏​អាច​មាន​ឱកាស​ទៅធ្វើ​ការនៅតាមស្ថាប័នក្នុងស្រុក ឬ អាច​ធ្វើ​នៅក្រុមហ៊ុនធំៗក្រៅប្រទេសផងដែរ»។

លោក​បន្ថែម​ថា « ខ្ញុំ​លើកទឹកចិត្ត​ឱ្យ​និស្សិតនៅតែបន្តមកដាក់ពាក្យ​ចូលរៀន​ក្នុងវិស័យ​បច្ចេកទេស​អគ្គិសនី ឱ្យ​កាន់​តែ​ច្រើន ស្របពេលនេះទីផ្សារការងារទាំងក្នុង និងក្រៅស្រុកនៅតែសម្បូរ នៅមិនទាន់លើស​តម្រូវការ​នោះទេ»។

លោក​បន្ត​ថា និស្សិត NPIC ភាគ​ច្រើន​បាន​ចូលប្រឡូកក្នុងវិស័យការងារ​ក្នុងអំឡុងពេល​ដែលពួក​គាត់កំពុងទទួលបានការបណ្តុះបណ្តាល​ជំនាញបច្ចេកទេសអគ្គិសនី ដើម្បី​ដកស្រង់បទពិសោធន៍​ទីផ្សារការងារ ដែលទាក់ទងនឹងជំនាញពួកគាត់កំពុងសិក្សានៅសាលា និង​ទទួលបានប្រាក់ចំណូលបន្ថែមផងដែរ។

ជាមួយ​គ្នា​នេះ លោក​ថា វិទ្យាស្ថាន NPIC តែងតែ​លើកទឹកចិត្តសិស្សនិស្សិតដែលមានជីវភាពខ្វះខាត ហើយមានបំណងចង់សិក្សាជំនាញបច្ចេកទេសអគ្គិសនី ដោយនិស្សិតស្រីទទួលបានអាហារូបករណ៍ ៣០% និងអាហារូបករណ៍ទៅតាមនិទ្ទេសរបស់ខ្លួន ខណៈ​ដែលសិស្សជាបុរសមានការលើកទឹកចិត្ត បញ្ចុះតម្លៃសិក្សាជាច្រើនទៀត ដើម្បី​ឱ្យ​ពួកគាត់មានឱកាសសិក្សាជំនាញជាមួយសិស្សដទៃទៀត។

ម្យ៉ាងទៀតសិស្សនិស្សិត ដែលមិនមានលទ្ធភាពបង់ថ្លៃសិក្សា និង​ពុំ​មានការងារធ្វើនោះ លោកនាយក​បាន​លើកទឹកចិត្តឱ្យពួកគាត់គួរតែចូលសិក្សាក្នុងកម្មវិធី ១,៥លានប្រាំសែន ដែលដាក់ចេញដោយរាជរដ្ឋាភិបាលអាណត្តិទី៧នេះ ដោយ​ទទួលបានការឧបត្ថម្ភ​ពីរាជរដ្ឋាភិបាល និងទទួលបានការប្រាក់លើកទឹកចិត្ត រៀន​មិន​ចាំ​បាច់បង់ថ្លៃសិក្សា និង​ទទួលបានជំនាញសិក្សាស្របតាមស្ទង់ដារបរទេសថែមទៀត​ផង។

គួរ​រំឭក​ថា នៅក្នុងឆ្នាំសិក្សា២០២៣-២០២៤នេះ និស្សិត NPIC ដែល​ត្រូវ​ប្រឡងចេញកម្រិតថ្នាក់បរិញ្ញាប័ត្ររង​ជំនាញបច្ចេកទេសអគ្គិសនីចំនួន ១១៨នាក់ ថ្នាក់​វិស្វករ​ខាងអគ្គិសនីចំនួន ៣៧៣នាក់ ជា​មួយ​នឹង ១១៤គម្រោងសម្រាប់ការសិក្សាស្រាវជ្រាវ ដើម្បីប្រឡងបញ្ចប់ការ​សិក្សា។

ដោយ​គម្រោង​សិក្សា​ស្រាវជ្រាវនៅឆ្នាំនេះ សិស្សនិស្សិត​បាន​អនុវត្តល្អប្រសើរជាងឆ្នាំមុន បើធៀបនឹងឆ្នាំដែលមានវិបត្តិកូវីត-១៩ ពោល​គឺ​សិស្ស​និស្សិតមានការយកចិត្តទុកដាក់ពីលោកគ្រូ អ្នកគ្រូ និងការ​អនុវត្តផ្ទាល់ក្នុងថ្នាក់រួមគ្នា៕