សមិទ្ធផល​ផ្លូវខេត្តពីរខ្សែក្នុង​ខេត្តក្រចេះ គ្រោង​ស្ថាបនា​រួច​ទាំងស្រុង នៅមុនពិធីបុណ្យចូលឆ្នាំ​ខ្មែរ

ផ្លូវខេត្តលេខ ៣៧៧ ស្ថិតនៅតាមបណ្តោយដងទន្លេមេគង្គ តភ្ជាប់ពីរង្វង់មូលព្រាបស ក្នុងក្រុងក្រចេះ ឆ្ពោះទៅទីរួមស្រុកសំបូរ ប្រវែង ៣៥.៥គីឡូម៉ែត្រ និងផ្លូវខេត្តលេខ ៣៧៧A តភ្ជាប់ពីសណ្តាន់ទៅសង្គម ប្រវែង ១៣.៦គីឡូម៉ែត្រ គ្រោងនឹងបញ្ចប់ការស្ថាបនាជាស្ថាពរ នាខែមេសា ឆ្នាំ២០២៥ មុនពិធីបុណ្យចូលឆ្នាំថ្មីប្រពៃណីខ្មែរចូលមកដល់ ខណៈដែលកិច្ចសន្យាស្ថាបនាសាងសង់ផ្លូវគ្រោងបញ្ចប់នៅត្រឹមចុងខែធ្នូដំណាច់ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានមន្ទីរសាធារណៈការ និងដឹកជញ្ជូនខេត្តក្រចេះ លោក សាំង ប៊ុនថេន បានឲ្យកម្ពុជាថ្មីដឹងនៅរសៀលថ្ងៃទី២ ខែមករា ឆ្នាំ២០២៥ នេះថា យោងតាមកិច្ចសន្យា គឺគម្រោងស្តារ ជួសជុល និងថែទាំផ្លូវខេត្តលេខ ៣៧៧ និង ៣៧៧A ដោយក្រាលកៅស៊ូ AC និងសំណង់សិល្យការ្យមួយចំនួនប្រវែងសរុប ៤៩.១០គីឡូម៉ែត្រ ក្នុង​នោះ​ផ្លូវខេត្តលេខ ៣៧៧ តភ្ជាប់ពីក្រុងក្រចេះទៅស្រុកសំបូរប្រវែង ៣៥.៥គីឡូម៉ែត្រ និងផ្លូវខេត្តលេខ ៣៧៧A តភ្ជាប់ពីសណ្តាន់ទៅសង្គម ប្រវែង ១៣.៦ គីឡូម៉ែត្រ គឺត្រូវបញ្ចប់ការងារស្ថាបនាជាស្ថាពរ នៅក្នុងខែធ្នូ ឆ្នាំ២០២៤ ប៉ុន្តែយោងតាមស្ថានភាពជាក់ស្ដែងត្រូវបានពន្យាពេល។

ពាក់ព័ន្ធជុំវិញការយឺតយ៉ាវក្នុងការស្ថាបនា​ផ្លូវខេត្តទាំងពីរខ្សែនេះ ប្រធានមន្ទីរសាធារណៈការខេត្តបានបញ្ជាក់ថា ក្នុងករណីដែលក្រុមហ៊ុនទទួលគម្រោងស្តារជួសជុល និងថែទាំផ្លូវ អនុវត្តមិនបានត្រឹមត្រូវតាមកិច្ចសន្យាទេនោះ អាចពន្យាពេលបានពីរដង ក្នុងរយៈពេលពីមួយខែទៅពីរខែនៅក្នុងកិច្ចសន្យា ប៉ុន្តែបើមានលើកទីបីនោះនឹងត្រូវរងការផាកពិន័យ។

មន្ទីរសាធារណៈការ និងដឹកជញ្ជូនខេត្តគឺមានតួនាទីចូលរួមសហការ ក្នុងការសម្របសម្រួលដោះស្រាយ​នៅពេលមានបញ្ហាណាមួយ​កើតឡើងតែប៉ុណ្ណោះ។

តាមការបញ្ជាក់ពីក្រុមការងារស្ថាបនា​ផ្លូវ​ខេត្តលេខ ៣៧៧ ត្រង់ចំនុចភូមិក្រគរ សង្កាត់ក្រគរ ក្រុងក្រចេះ បានឲ្យដឹងថា ផ្លូវខេត្តលេខ ៣៧៧ និង ៣៧៧A នឹងត្រូវបញ្ចប់រួចរាល់ជាស្ថាពរនៅមុនពិធីបុណ្យប្រពៃណីជាតិខ្មែរចូលមកដល់ ហើយបញ្ចុប្បន្ន គឺក្រុមការងារបាននឹងកំពុងស្ថាបនាជួសជុលផ្លូវ និងស្ពាននៅសង្កាត់ក្រគរ និងនៅទីរួមស្រុកសំបូរ តែប៉ុណ្ណោះ នឹងអាចបើកឲ្យបងប្អូនប្រជាពលរដ្ឋធ្វើដំណើរជាផ្លូវការ។

គូសបញ្ជាក់ដែរថា ផ្លូវខេត្តទាំង២ខ្សែខាងលើនេះ បានសម្ពោធបើកការដ្ឋានកាលពីថ្ងៃទី ៤ ខែមេសា ឆ្នាំ២០២៣ ក្រោមវត្តមានសម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍ និង​លោក ស៊ុន ចាន់ថុល អតីត​ដ្ឋមន្ត្រី ក្រសួងសាធារណការ និងដឹកជញ្ជូន ដែល​ថវិកាក្នុង​ការ​ប្រើប្រាស់ក្នុងការ​ស្ថាបនា​គឺ​ប្រើប្រាស់​ថវិកាពី​ធនាគារពិភពលោក(World Bank) ប្រចាំកម្ពុជា៕

អត្ថបទ៖ ប្រុញ វិធិន