ពន្ធរបស់ ត្រាំ អាចប៉ះពាល់ដល់ការងើបឡើងវិញនៃផលិតកម្មអាមេរិក

វិស័យផលិតកម្មរបស់សហរដ្ឋអាមេរិកបានកើនឡើងជាលើកដំបូងក្នុងរយៈពេលជាង ២ ឆ្នាំ កាល​ពីខែមករា ប៉ុន្តែការស្ទុះងើបឡើងវិញ​នេះ​បានធ្លាក់ចូលទៅក្នុងភាព​ស្រពិចស្រពិល បន្ទាប់ពីលោក​ប្រធានាធីបតី ដូណាល់ ត្រាំ ប្រកាសដាក់ពន្ធ​លើ​​ដៃគូពាណិជ្ជកម្មកំពូលៗ​រួម​មាន​កាណាដា ម៉ិកស៊ិក និងចិន​ កាល​ពីចុង​សប្ដាហ៍។ ​

សេដ្ឋវិទូខ្លះលើក​ឡើងថា​ ​ការ​គំរាម​កំហែង​ពីវិធានការពន្ធ​ដែល​កំពុង​បន្ត​ នឹង​រារាំង​ដល់​វិស័យផលិតកម្ម​ ដោយ​ការឡើងខ្ពស់​នៃប្រាក់ដុល្លារ ដែលធ្វើ​ឱ្យ​ទំនិញ​នាំចេញ​របស់​សហរដ្ឋ​អាមេរិក ​ពិបាក​នឹង​ប្រកួត​ប្រជែង​នៅលើទីផ្សារ​។ ​​

ចំណែកឯប្រធានសេដ្ឋវិទូរបស់ក្រុមហ៊ុនសេវាកម្មហិរញ្ញវត្ថុ Nationwide អ្នកស្រី Kathy Bostjancic វិញ បាន​លើកឡើងថា៖ «ពន្ធគយអាចបង្កការប្រែប្រួលជាគំហុកភ្លាមៗនៃការផ្គត់ផ្គង់ ដែល​​ប៉ះពាល់ដល់ផលិតកម្ម និង​ដំឡើងតម្លៃ។ ដូចគ្នា​នឹង​វិបត្តិកូវីដ​ ប៉ុន្តែស្រាលជាង​នោះ»។ អ្នកស្រីបន្តយ៉ាងដូច្នេះថា៖ «ជុំថ្មីនៃ​ពន្ធរបស់សហរដ្ឋអាមេរិកនឹងពង្រីកផលប៉ះពាល់យ៉ាងធ្ងន់ធ្ងរទៅលើអតិផរណា និងកំណើន GDP (ផលិតផលក្នុងស្រុកសរុប)។

គួរគូស​បញ្ជាក់ថា ការស្ទង់មតិពីវិទ្យាស្ថានសម្រាប់ការគ្រប់គ្រងការផ្គត់ផ្គង់ (ISM) ដែលបានចេញផ្សាយកាលពីថ្ងៃចន្ទ ​បានបង្ហាញថា ស្តុកវត្ថុធាតុដើមនៅរោងចក្រអាមេរិក​ បានធ្លាក់ចុះរួចហើយកាលពីខែមុន ដោយបង្កើនតម្លៃសម្រាប់ខែទី ៤ ជាប់ៗគ្នា។

យ៉ាងណាមិញ ISM បាននិយាយថា សន្ទស្សន៍អ្នកគ្រប់គ្រងការបញ្ជាទិញរបស់​រោងចក្រ (PMI）​បានកើនឡើងដល់ ៥០,៩ ពិន្ទុ នៅខែ​មករា ដែលជា​ពិន្ទុខ្ពស់​បំផុត រាប់​តាំង​ពី​ខែកញ្ញា ឆ្នាំ ២០២២។ ពិន្ទុលើសពី ៥០ ពិន្ទុ បង្ហាញ​ពីកំណើននៃវិស័យផលិតកម្ម ដែលរួមចំណែកប្រមាណ ១០,៣ ភាគរយ នៃសេដ្ឋកិច្ចអាមេរិក​។ ​

គួរគូស​បញ្ជាក់ថា វិស័យផលិតកម្មអាមេរិក​បាន​ធ្លាក់ចុះ​ នៅពេលធនាគារកណ្ដាលសហព័ន្ធអាមេរិក​ ដំឡើងការប្រាក់ខ្ពស់ដល់ ៥,២៥-៥,៥ ភាគរយ នៅឆ្នាំ ២០២២ និង ២០២៣ ដើម្បីទប់ទល់នឹងអតិផរណាខ្ពស់។

មកទល់ពេលនេះ​ ធនាគារ​បាន​បន្ថយអត្រាត្រឹមតែ​ ១ ភាគរយ ប៉ុណ្ណោះ ចំ ពេល​មានភាពមិនច្បាស់លាស់អំពីផលប៉ះពាល់សេដ្ឋកិច្ចនៃគោលនយោបាយរបស់រដ្ឋបាល ត្រាំ រួមទាំងពន្ធ និង​ការនិរទេសជនអន្តោប្រវេសន៍ជាដើម​។ អ្នកជំនាញព្រមានថា គោលនយោបាយទាំងនេះ អាច​ធ្វើឱ្យ​អតិផរណា​អាមេរិក​ហក់ឡើងជាថ្មី។

សេដ្ឋវិទូនៅធនាគារវិនិយោគ Citigroup អ្នកស្រី Veronica Clark ​បាននិយាយថា ហានិភ័យនៃពន្ធគយដែលកំពុងបន្ត ​នឹងពង្រឹងប្រាក់ដុល្លារអាមេរិក ហើយអាច​ពាល់ដល់វិស័យផលិត ដោយសារពាក់កណ្តាលនៃទំនិញផលិតរបស់​អាមេរិក ជាទំនិញ​នាំចេញ​។ ​

កាល​ពី​ខែ​មុន ឧស្សាហកម្ម​ចំនួន​ ៨ ​បាន​មើល​ឃើញ​ពី​​កំណើន​ រួមមាន​រោង​ម៉ាស៊ីន​វាយនភណ្ឌ លោហធាតុ គ្រឿងចក្រ និង​ឧបករណ៍​ដឹក​ជញ្ជូន។ ទោះជាយ៉ាងណាក៏ដោយ ឧស្សាហកម្មផ្សេងទៀតដូចជាការផលិតផ្សេងៗ ឈើ និងផលិតផលកុំព្យូទ័រ/អេឡិចត្រូនិក បានរាយការណ៍ពីការធ្លាក់ចុះ។

ក្រុមហ៊ុនផលិតឧបករណ៍ដឹកជញ្ជូនបានកត់សម្គាល់ថា ការកែលម្អលក្ខខណ្ឌខ្សែចង្វាក់ផ្គត់ផ្គង់កំពុងចាប់ផ្តើមផ្លាស់ប្តូរទៅរកការខ្វះខាតធ្ងន់ធ្ងរជាថ្មី ជាមួយនឹងការព្រួយបារម្ភកាន់តែខ្លាំងឡើងអំពីបញ្ហាកាន់តែច្រើន​សម្រាប់ខ្សែចង្វាក់ផ្គត់ផ្គង់។ ពន្ធ​ខ្ពស់​ ក៏ប៉ះពាល់ដល់​​វិស័យ​សំណង់​អាមេរិក​ផងដែរ ដោយ​ការ​​ឡើង​ថ្លៃ​ឈើ ដែលជាធាតុសំខាន់សម្រាប់​​ការ​សាងសង់​​ផ្ទះ​ និងការឡើង​ថ្លៃនៃ​សមាសធាតុ​សំណង់ផ្សេងៗ​ទៀត៕