ជីវិតកម្សាន្ដ

តាមពិតបាត់មុខយូរ តួជំនាន់ចាស់ Chintara ប្រាប់ថា ចាញ់បោកលុយក្នុងជំនួញនៅ ថៃ-ចិន

បានផុស

១ year មុន

នៅ

ថ្ងៃព្រហស្បតិ៍ ៦ កុម្ភៈ ២០២៥

ដោយ

ទស្សនិកជនដែលនិយមតាមដានរឿងភាគថៃ ប្រាកដជាស្គាល់យ៉ាងច្បាស់លើតារាសម្ដែងជើងចាស់ Chintara Sukapatana ដែលជារឿយៗគាត់តែងតែលេចមុខលើកញ្ចក់ទូរទស្សន៍ ក្នុងនាមជាតួម្ដាយ។ យ៉ាងណា កាលពីពេលថ្មីៗនេះ គាត់បានទម្លាយអំពីជីវិតថា ធ្លាប់ចាញ់បោកលុយអស់រាប់លានដុល្លារ ដោយសារតែទុកចិត្តគេពេក។

តារាស្រីជំនាន់ចាស់រូបនេះបាននិយាយថា «ខ្ញុំបានឃ្លាតឆ្ងាយពីកញ្ចក់ទូរទស្សន៍មកជាយូរហើយ។ យ៉ាងណា នាពេលនេះខ្ញុំបានត្រៀមវិលចូលវិស័យសិល្បៈក្នុងពេលឆាប់ៗនេះ ដោយត្រឡប់មកសម្ដែងភាពមួយក្រោមចំណងជើងថា Banlang Marn ហើយពេលនេះកំពុងត្រៀមចាប់ផ្តើមថតហើយ ដោយមានចាក់ផ្សាយលើកញ្ចក់ទូរទស្សន៍ប៉ុស្តិ៍លេខ ៣១»។

ទន្ទឹមនឹងរង់ចាំទស្សនារឿងភាគថ្មីនេះ ស្រាប់តែថ្មីៗនេះ តារាស្រីវ័យ៦០ឆ្នាំស្រាប់ទម្លាយដែរថាមូលហេតុដែលលោកស្រីបាត់មុខបាត់មាត់តាមរយៈការផ្សាយផ្ទាល់លើកញ្ចក់ទូរទស្សន៍ VLOG OFFICIAL ថា គាត់បានចាញ់បោកឲ្យវិនិយោគ រហូតបាត់បង់រាប់សិបលានបាត កាលពី ១ឬ២ ឆ្នាំមុន។

តារាសម្ដែង Chintara បាននិយាយថា មានមនុស្សម្នាក់បានផ្តល់អនុសាសន៍ឲ្យគាត់វិនិយោគលើអាជីវកម្មដែលទាក់ទងនឹងផលិតផល ដោយផ្តល់ជូននូវវេទិកាលក់អនឡាញ និងបណ្តាញចែកចាយ ការអះអាងថាផលិតផលអាចត្រូវបានលក់នៅក្នុងប្រទេសចិន។ មិនតែប៉ុណ្ណោះ ការលក់អនឡាញនោះថែមទាំងហ៊ានធនាអះអាង តារាល្បីៗក្នុងប្រទេសថៃជាច្រើនក៏ចូលរួមក្នុងមុខជំនួញនេះដែរ។ វាជាក្រុមហ៊ុនរបស់ថៃ ប៉ុន្តែជំនាញក្នុងទីផ្សារចិន អាចនិយាយភាសាចិនបាន។ ម្យ៉ាងវិញទៀត ដោយសារតែគាត់បានមើលប្រវត្តិរូប ហើយគិតថាវាមើលទៅគួរឲ្យទុកចិត្ត ដូច្នេះទើបជឿលង់បង់ប្រាក់ឲ្យយ៉ាងច្រើនអនេក។

បន្ទាប់ពីបង់លុយឲ្យគេរួចរាល់ទើបគាត់បានដឹងថា ជននោះគឺជាមនុស្សបោកប្រាស់ដោយប្រើឈ្មោះអ្នកដទៃ និងផ្សព្វផ្សាយពាសពេញ ធ្វើឲ្យតារាល្បីៗជាច្រើននាក់ទៀត ត្រូវបានគេបោកប្រាស់ផងដែរ។ បច្ចុប្បន្នរឿងនេះកំពុងស្ថិតនៅក្នុងដំណើរការរបស់តុលាការ ទាំងនៅប្រទេសថៃ និងចិន។

យ៉ាងណាមិញ តារាស្រីចំណាំដើរតួម្ដាយបាននិយាយបន្ថែមទៀតថា ទោះបីជាគាត់រងនូវការបោកប្រាស់យ៉ាងណាក្ដី ប៉ុន្តែនេះក៏បានផ្ដល់ជាមេរៀនដល់គាត់និងអ្នកផ្សេងទៀត ឲ្យមានការប្រុងប្រយ័ត្នបន្ថែមទៀត ប្រសិនបើយើងចង់ធ្វើអាជីវកម្មណាមួយ ជាពិសេសនៅបរទេស យើងត្រូវសិក្សាឲ្យជ្រៅនិងដឹងថាក្រុមហ៊ុននោះមានពិតប្រាកដដែរទេ៕